amina anenkarmin,

tura nekasa nujai eme anenmamta.

2 Shuar tunaun takau aina ina chichartamainak:

¿Atumi Yuusrisha tui pujawa? tusar ininmainaji.

3 Ina Yuusrigka nayaimpinam pujawai.

Tura ni wakeramu ainanka ashi najankauwaiti.

4 Yuusan umirchau aina nuna yuusri ainaka orojai,

tura jiru plata tutaijai najanamu ainawai.

Tuma asamtai nita yuusrimtai aina nuka shuar najankamu ainawai.

5 Nita yuusrigka wenentin ainayat

chichachu ainawai.

Tura jiisha aramaitiat

wainmachu ainawai.

6 Kuishtin ainayat antichu ainawai.

Nujintin ainayat kugkuamun nekapchau ainawai.

7 Uwejtin ainayat takachu ainawai.

Nawentin ainayat wekaichu ainawai.

¡Chichamurisha pegkesha anturchataiyaiti!

8 Shuar nuna yuusrimtain najanin aina nu,

tura nuna yuusrimin aina nuka

nita yuusrijai metek ainawai.

9 ¡Israelita ainata

Yuusa nuke nekaspapita tusarum enentaimtustarma!

Ni inka yainmaji,

tura kuitamramji.

10 Sacerdote ainatirmesha

Yuusa nuke nekaspapita tusarum enentaimtustarma.

Ni inka yainmaji,

tura kuitamramji.

11 Ashi Yuus umirin ainatirmeka,

Yuusa nuke nekaspapita tusarum enentaimtustarma.

Ni inka yainmaji,

tura kuitamramji.

12 Ina apuri Yuus ninu ainatinka

kajinmattramtsuk pegkernum yainmaktinaitji.

¡Israelita ainan pegkernum yaigtinaiti!

Sacerdote ainancha,

pegkernum yaigtinaiti.

13 Yuuska ni umirmaka uun ainan,

tura uchi ainancha,

pegkernum yaigtinaiti.

14 Yuus ina pegkernum yainmak,

tura ina uchiri ainancha nukap napamkatnaiti.

15 Ina apuri nayaimpin,

tura nugkancha najanawa nu atumin pegkernum yainmaktatrume.

16 Nayaimpika Yuusnauwaiti.

Antsu nugkanka shuar ainatin suramsauwaitji.

17 Shuar jinawaru ainaka chichamainchau asar,

Yuusnaka emematmainchau ainawai.

18 Antsu ii iwáku ainatika,

ina apurigka yamaika tuke emematiartatji.

¡Ina apuri emematiarmi!