Yuus israelita ainan pegkermamtikamu
105
Ina apuri maaketi tusar tiarmi.Nina naari pachisrum shuar aina ujaktarma.
Turakrum ashi ni najankamu
aina nu pachisrumsha etserkatarma.
2 Ina apuri emematkur kantamruami.
Turakur wainchatai ainan nina senchirijai
nukap iwainakua nusha pachisar etserkarmi.
3 Nina naari pegkera nu
pachisrum shir anetarma.
¡Atum Yuus umirin ainatirmeka
shir aneastarma!
4 Ina Yuusriya nu tuke aujsarmi,
tumakur nina senchiriya nu jukiarmi.
5 Ina Yuusri wainchatai ashammain ainan
iwainarua nu,
tura chicham umiktin ainan suramsauwa nusha aneararmi.
6 Ika Yuusan umirin Abraham,
tura Jacob nu ajakarua nuu weantu asar,
Yuus winau arti tusa etegkamu ainaji.
7 Yuuska, ina apuriyaiti,
tuma asa ashi nugka ainanam
iruna nunaka nigki kuitamui.
8 Yuuska ni anajmatkartuamurinka
nukap uwí nagkamasmataisha
pegkesha kajinmatchauwaiti.
9 Tumau asa Abrahamjai chichaman umikua nuna,
Isaacjaisha Yuus metek umikuiti.
10 Jacobjaisha chichaman umikuiti.
Nu turamua nu israelita ainanam
tuke atin juakuiti.
11 Yuus Jacobon chicharuk:
“Amina nugkem tuke atina nuna
Canaán nugkan susatjame”.*
12 Israelita ainatika
ujumchik ajakuitji.
Ika irara numamtuk
Canaán nugkanam puju jakuitji.
13 Tumaina asar
chikich nugkanam shiakar,
nui pujusar, nu ikuakur
chikich apu aina pujuinamunam jear,
ujumchik tsawan pujusar,
ja yujamiaji.
14 Tumakrincha Yuus
nita shuari aina waitkascharti
tusa kuitamramkamiaji.
Turutma asa ina ayamrutmak
chikich apu ainan ujakuiti.
15 “Wii etegkamur aina,
tura wina chichamrun etserin ainasha
waitkasairpa”, tusa Yuus tinaiti.
16 Arak aina tsapaishti tusa
Yuus timau asa, Canaán nugkanam
tsuka tepeawaiti.
17 Turasha Yuus nuna turatin asa,
Josén surukarti tusa Yuus tsagkamkauwaiti.
Turamu asamtai surukar Egipto nugkanam akupkaru ainawai.
18 José Egipto nugkanam jeamtai
cadenajai nawenam jigkarar
cárcelnum egkeawaruiti.
19 Nunaka José eke surachmau pujus karanam
wainkamuriya nu uminkati tusa Yuus nekapas
iiyak Josén waitkasarti tusa tsagkamkauwaiti.
20 Egiptonmaya apu nukap yaaktanam inamajakua nu Josén
cárcelnum egketun jiiktarma
tusa takai jiikiar agkanmamtikawaruiti.
21 Nuna tura wina jearui iruna ju ame ashi iin atá,
turakum Egiptonam iruna jusha amek ashi iin atá tusa nina inaitusuiti.
22 Turakum wijai takau aina,
tura apu wijai takau aina nitasha yacha arti tusam jintintaawarta, tusa tinaiti.
23 Ina uuntri Jacob chikich naari Israel tutai ajakua nusha,
Egipto nugkanam jeawaiti.
Tuma chikich nugkanmaya shuar ayat
Egipto nugkanam Cam nugka tuuta amajtaiya nui pujusuiti.
24 Tumamtai Yuus ina uuntri ajakarua nunaka
shir nukap napamkauwaiti.
Tura nita shuari ainan nagkasau
senchirtin amajsauwaiti.
25 Turasha Yuus israelita ainan,
egiptonmaya aina kajeriarti,
turuinak waitkasarti tusa tsagkamkauwaiti.
26 Tura nina inatairi ainan
Moisésan, tura Aarónjai etegka
akupkauwaiti.
27 Turamu asar Egipto nugkanam Cam nugka tuuta amajtaiya nui
Yuusa senchirijai
wainchatai ashammain ainan
iwainakaru ainawai.
28 Yuus Egipto nugkan káshi amajsauwaiti.
Nu turamun wainainaksha
egiptonmaya ainaka,
Yuusapi jutikaya ticharu ainawai.
29 Yuus entsa ainancha
ashi numpa amajsauwaiti.
Nuna turamtai namak ainaka jinawaiti.
30 Mukun ainasha
Egipto nugkan ashi enetkauwaiti,
tumak apu jeencha utsanawaiti.
31 Yuus tumati tusa timau asa,
anchi tetejaimak pachimnaik
yuragmia numamtuk,
Egipto nugkanam kaunak enetkauwaiti.
32 Yumin yutumtiktsuk,
micha katsuram ainan,
jijai pachimramun Egipto nugkanam akakekuiti.
33 Nuna turak
uva arakmau ainan,
higo ainan ijinawaiti.
Tura númi kanawe
ainancha asantrauwaiti.
34 Yuus tumati tusa timau asa,
manchi aina pegkesha nekapmamainchau
Egipto nugkanam kaunkauwaiti.
35 Iman asar árak aina ajanam irununka,
tura númi nu nugkanam irununka ashi amukaruiti.
36 Yuus nayaimpinmaya shuaran akuptuk
egiptonmaya uchi yama nagkamchak
akinkaru ainan ijinawaiti.
37 Turasha Yuus tumati tusa timau asa,
ina uuntri ajakarua nuka
Egipto nugkanmaya jinainaksha
plata tutai jiru ainan, tura oro ainan
yaruakar wenaksha jamamtinchau shiakaruiti.
38 Israelita aina
Egipto nugkanam
pujuina jinar shiakmatai,
egiptonmaya ainaka
nitan ashama pujuina asar
shir aneasaru ainawai.
39 Yuus ina uuntri ainan
uukat tusa yuragmia numamtinan akuptukuiti.
Antsu káshi wenakai jintan inaktustinnaka
jiya numamtinan kean akuptukuiti.
40 Nita yumaintri atsakai
Yuusan yutai sukartusa tusar tiaru ainawai.
Tusa tuinakai nita yuatnun
codorníz tutai ainan waya numamtinan akupturuiti.
Nuiyasha yutain maná tutain akuptukuiti,
turam nuna yuawar ejémararu ainawai.
41 Tura Yuus muchigkin awatmatai entsa jinki
aya nugkanmag entsa uuntri jas akaikinaiti.
42 Yuuska Abrahaman nina umirin ajakua nuna
anajmatamurinka pegkesha kajinmatkichuiti.
43 Yuus ni etegkamuri ainan tu jiiruiti.
Turamu asar shir anenak
senchi kantamawaru ainawai.
44 Ni etegkamuri ainan jiir yaruak nugka chikich shuar aina pujutain nitan susauwaiti,
tura árak ainancha chikich shuar aina
arakmau ainan susauwaiti.
45 Nunaka Yuus chicham umiktin ainan
wii susaruitaj nuna, tura wii jintintawaruitaj
nunasha eme enentaimtus iiyainak
metek umirtukarti tusa turawaiti.
Nuna tura asamtai, ¡ina Yuusri emematiarmi!