LIBRO V
(Sal 107–150)
Yuuska inka tuke anenmaji
107
Ina Yuusri emematiarmi.Nigka pegker asamtai, maaketi tiarmi.
Yuus ina anenmamua nuka tuke atinaiti.
2 Egiptonmaya aina kajertai
pujarin Yuus,
nina senchirijai jiirmar
agkanmamtikramawaitji, tusa tiarmi.
3 Ni inka etsa akatainmani,
tura etsa watainmani, nujinmani
tura nugkani chikich nugka
aina iruna nuiyatin yarurmak irutmaruitji.
4 Ina uuntri ajakarua nuka,
wakua numamtuk, aya nugkanmag
nita pujumaincha yaaktasha
atsamunam yujajakuiti.
5 Yumain atsau asamtai,
tura umumain atsau asamtai,
ashi jakattak yujajakaruiti.
6 Senchi waitaina asar,
yaigkratkata tusar Yuusan aujsaruiti.
Turam Yuus waitu pujuinan yaig agkanmamtikawaiti.
7 Nita pujustinnum jeawarti
tusa nita weartinan jintan inaktusuiti.
8 Yuus nina anenkarijai ina yainmak,
wainchatai ashammain ainan iwainarua
nu pachisar maaketi tiarmi.
9 Yuuska shuar umumaintri atsuram
kitakai waitu pujauncha,
tura yumaintri atsuram
tsukai waitu pujauncha suwaiti.
10 Ina apachri ajakarua nuka,
nita wemain atsau asamtai,
tura cárcelnum egkeamu pujuina asar,
tura cadenajai jigkaram pujuina asar
wake mesemar pujujakaruiti.
11 Nunaka Yuus chicham umiktarma,
tusa tina nuna metek umikcharu asar
tumawaru ainawai.
12 Tumawaru asarmatai takak waittsarti
tusa Yuus tinaiti.
Tinu asamtai nitan yaimainka
pegkesha atsusuiti.
13 Senchi waitaina asar,
yaigkratkata tusar Yuusan aujsaruiti.
Turam Yuus waitu pujuinan yaig agkanmamtikawaiti.
14 Tura cadenajai jigkaram
waitu pujuinan
agkanmamtikawaiti.
15 Yuus nina anenkarijai ina yainmak,
wainchatai ashammain ainan iwainarua
nu pachisar maaketi tiarmi.
16 ¡Waiti jiru broncejai najanamu ainan tsaikuiti!
¡Tura jiru hierrojai awajamu ainancha
Yuus ashi tsaikuiti!
17 Ina apachri ainaka enentaimkachu asar,
nita pegkerchaurin jata achikam
jainak senchi waittsaruiti.
18 Nitaka ashi yutai ainancha tsumaina asar
ashi jinattak pujujakaruiti.
19 Senchi waitaina asar,
yaigkratkata tusar Yuusan aujsaruiti.
Turam Yuus waitu pujuinan yaig agkanmamtikawaiti.
20 Yuus nina chichamen akuptuk,
ashi jinattak pujuinan pegker amajsauwaiti.
21 Yuus nina anenkarijai ina yainmak,
wainchatai ashammain ainan iwainarua
nu pachisar maaketi tiarmi.
22 Yuus yainmakua nu
eme anentsa iiyakrum emematkurum,
tagku aina maarum ajamnaisatarma.
Turakrum wainchatai aina iwainakmauri
pachisrumsha shir aneasrum senchi
chichakrum etserkatarma.
23 Ina apachri ajakarua nuka
nayantsanmani pujusaru ainaka
nayantsanam lanchajai chikich nugkanam
warí ainan suruinak yujajakaruiti.
24 Nayantsanam yujasar
Yuusapi nayants uunta junaka najanawaita,
tusar tiaru ainawai.
25 Yuus nasenkati, tusa tinaiti.
Timau asa senchi nasenkauwaiti.
Imaniak nayantsan senchi tsukatmamtikauwaiti.
26 Imatikak shuar nayantsanam
yujau ainanka,
yaki nagki nagkima ajuamu asar
kakamainchau nekapraru ainawai.
27 Tumaina asar nampekujai metek
tuku tukumrumaki iyaina.
Tumaina asar turumainchau nekapena.
28 Imanina asar,
yaigkratkata tusar Yuusan aujsaruiti.
Turam Yuus waitu pujuinan yaig agkanmamtikawaiti.
29 Yuus nase senchi nasentun imijkauwaiti,
turamtai nayants senchi tsukatmauncha mijaakuiti.
30 Tuma nase mijaakmatai
shir aneasaru ainawai.
Tura nita jeattsa enentaimsa
weamunam nui jeawartasa wearuiti.
31 Yuus nina anegkrattairi ina anenmak
wainchatai ashammain ainan iwainarua
nu pachisar
Yuus maaketi, tusa tiarmi.
32 ¡Ashi shuar ainatiram
apu ainajaimak iruuntrarum
Yuus ememattarma!
33 Yuuska entsa uuntri ainan,
tura entsa pukuni jinin ainancha ukuyua
aya nugkak muku amajnaiti.
34 Nugka árak pegker tsapau ainancha
nuiya shuar aina tunaurin
árak aina tsapamainchau amajnaiti.
35 Aya nugkak entsa atsauncha
kucha iruunin amajnaiti.
Nugka muku ainanmasha
entsa pukuni jinin amajnaiti
36 Shuar yumaintri atsurmau asa,
tsukai waitu pujuinan nu nugkanam matsasuiti.
Tura nui nita pujustinan
yaaktan najanawaru ainawai.
37 Nui pujusar ajan takasar
viñan arakar nukap nerekarmatai
juukar yujakaruiti.
38 Yuus pegkernum yayámu asar
shir nukap pampagkaru ainawai.
Tura nita tagkuri ainasha tumasag
shir nukap pampagkaruiti.
39 Antsu chikich ainaka,
shuar pegkerchau aina nu waitkainamu asar
ishichik ainawai.
40 Turasha Yuus shuar pegkerchau
waitkakratin aina nunaka
nakitawai.
Tura asa nitanka aya nugkanmag aantar yujasar jinati, tusa tinaiti.
41 Shuar atsumak waitak
wake mesemar pujauncha
Yuus yayáwai.
Tura tagku pampaina numamtuk
shir nukap napampawai.
42 Shuar pegker ainaka nuna wainainak
shir anenawai.
Turasha shuar pegkerchau aina nuka
nuna wainainaksha pachitsuk inaiyainawai.
43 Shuar ju taja juna nekaspapita tauka
Yuus ni anegkrattairijai turamua nuna
shir nekawai.