Yuus ni najankamuri ainan kuitamui
104
Wika ima ninig enentaimsannina naari pachisan
pegkernum chicharkattajai.
Apu wina Yuusru,
ameka chikich apu aina nu nagkasau apuitme,
ameka senchirmijai tsaaptin jasam pujame.
2 Ameka tsaaptin jasam pujame.
Ame nayaimpika jaanch ajamaina
numamtuk, agkarunam inanasuitme.*
3 Turam nu awin
entsanam ekenim
ame pujustintrum yaki umikuitme.
Amina carretermin yuragminam
pachitkau wekame.
Ameka nasenmasha wekainaitme.
4 Ameka nase ainasha
amina chichamrumin etserin amajnaitme.
Tura ji keainasha amina takartamin amajnaitme.*
5 Yuusru ame
nugkaka najanawaitme,
tura muchitkashti tusam tinaitme.
6 Nayants
nugkan amuak,
tura nain ainancha ashi amuruiti.
7 Turasha kuyuak nugkan ukumati
tusam chichaakum
ipamat uruka imatmaurmin antuk
wári kuyuawaiti.
8 Entsa nujagkrak nugkan ashi amur au
kuyuak nain ainan,
tura nugka paka ainancha
ukuma ame juig kuyua nagkankati
tusa timaunmag nuig nagkankauwaiti.
9 Tumamtai atak awenagka entsa
nugkan amurchatin atii tusam
tinaitme.
10 Tura entsa aina nainnum pukuni jiinin
aina nu wea weakua pakarin jeakka
entsa uuntri jasarti tusamsha tinaitme.
11 Tura asaakmin kuntin ikamia aina,
tura burro ikamia ainasha kitamainak
nuna entsan umarar kitakan mikin ainawai.
12 Nu entsa ainan yantamen númi
aina irunmaunam nuna kanawe ainanam
chigki ainasha pasugmakar petsainak chichainawai.
13 Wina Yuusru,
ameka nayaimpinam pujusmek
yumi yutumtikam nain aina
pegker amajeame.
chirichiri aina tsapatmamtikme.
Tura shuar ainati yuatnusha
árak aina tsapatmamtikme.
15 Shuar ainatinka yutai yuinak ichichmamrar pujusarti,
umutain umuinak shir aneasar pujusarti,
tura aceite kugkuinnasha iyashnum yakartinan
kugkuinan umikuiti.*
16 Yuusru, númi aina ame najankamua nuka,
tura cedro aina Líbanonam iruna nusha
yumi yutak nugkan inijakai shir irunui.
17 Nu númi ainanam chigki aina pasugmainawai.
Tura nanamtin cigüeña tutai ainasha nu numinam pujuinawai.
18 Nain aina nuka
cabra tagkuchu aina pujutai ainawai.
Tura muchig aina nuka wapukrush aina ajamaka pujutai ainawai.
19 Shuar aina tsawantan nekaawarti tusam
nantuka najanawaitme.
Antsu etsagka iman arus kintamin atii
tusam ame timau asa tumasag kintamnaiti.*
20 Etsa akaiki káshi jasmatai,
kuntin yujau atii tusa
timauram aina nu yujau ainawai.
21 Káshi uun yawa aina
yujasar nita yumaintri
atsakai amina seatmainak
shinin ainawai.
22 Antsu tsawaar etsa jinmataigka
wanam waigkar tepen ainawai.
23 Antsu shuar ainatika tsawai ina takatri
taká takakuar, etsa kiakai ikukir
jea waketin ainaji.
24 Yuusru,
ameka shir nukap
najankauwaitme,
nuka ame yacha asam
ashi umikuitme.
¡Nugka ame najanamua nuigka
ashi ame najankamu aina nu
iruinui!
25 Nayants shir uun
pegkesha nagkatkachu ame najanamu awai.
Nuigka kuntin uun aina,
kuntin shikapchich ainasha
pegkesha nekapmamainchau irunui.
26 Tura nuigka lancha ainajai yujainawai.
Tura kuntin uun leviatán tutai najanawaitam nusha
nayantsanam shir aneak nakurinaiti.
27 Nu kuntin aina nuka
tsawan jeamtai ii
yuatnun suramsatji tusar
amina ashi nakarmainawai.
28 Tumainakai nita
yuatnuka ame suame.
Turamu asar nuna yuinawai.
29 Antsu ame nita yuatin suachmaka
wake mesemar pujuinawai.
Tura yamai jakati tusa ame
tamaka jakar nugka najanainawai.*
30 Turasha Wakan pujutan sukartina
nu ame akuptukmaka aneantar
ataksha ju nugkanam pujumain ainawai.
31 ¡Yuusa senchiriya nuka tuke atinaiti!
¡Yuuska ni najankamuri ainan iis shir aneawai!
32 Yuus, urkati tusa tama nugkaka urnaiti.
Tura nainnum yuragkim mukuintuina nunaka Yuus antiam tumawai.
33 Wika iwáku pujaknaka,
wina Yuusrun emematkun
tuke kantamrittajai.*
34 Yuusru, wii enentaimmau
amina pegker amajtamsati,
tumasag wii amini shir aneamusha arutti.
35 Shuar tunaun takau aina,
tura Yuusan umirtan nakitin ainasha
ashi jinawar megkarati.
Wina Yuusrun ima ninak enentaimtusan emematkun
nina naarin pachisan pegkernum chicharkatnaitjai.
¡Yuus ememattarma!