David Yuusan wika amina tuke emematatjame timau
David kantamamu
103
Wika ima ninig enentaimsannina emematkun,
naari pegkera nuna pachisan
pegkernum chicharkattajai.
2 Wika ninig enentaimsan
wina Yuusrun pachisan pegkernum
chicharkattajai.
Tura wina pegkernum yainkauwa
nunasha pegke kajinmatkishtatjai.
3 Wii tunaun takakaisha
niyaiti wina tunaurun tsagkurtauka,
niyaiti wii jakaisha pegker amajtauka.
4 Wika jakattsan pujai,
niyaiti wina wait anentrur
yainkauka.
Tura wina anentu asa, winaka wait anentrawai.
5 Wina Yuusur ashi pegker ainan tuke surawai.
Wika untach jasnasha churuwi senchi nanamna
numamtuk atakea nui natsa jasan tuke pujustinaitjai.
6 Chicham umiktarma tusa timauwa
nuna umina asar,
chikich shuar aina shir pujuschamnau
amajenam waitu pujuinancha Yuus
agkanmamtikiawai.
7 Moisésan, israelita ainajai,
ni turamuri ainan,
tura nita umiktintri ainancha
nekamtikawaiti.
8 Yuuska wait anenkartinaiti.
Wári kajechuiti,
nigka senchi anegkratnaiti.*
9 Yuuska tunau takasakrin
waittan sukartuscha
kajekmautkeka pujuchuiti.
Tura tuke waitu pujuti tusasha inaikartichuiti.
10 Tumau asa ii ainati tunau takau asar,
waitat jumain akurincha,
waittanka shir senchika suramsachuitji.
11 Nina chichamen umin ainan
aneamurigka nayaim uunta nuna
nagkasau shir uuntaiti.
12 Etsa watai
tura etsa akataijai akankamu asa,
shir jeashat kanaki a numamtuk,
Yuus incha tunaun takascharti tusa
agkanmamtikramawaitji.
13 Yuuska nina umirin ainanka
chikichik uun nina uchirin
shir anentas kuitamna imatikas,
kuitameawai.
14 Ina Yuusrigka ii urukuk ainaj nunaka
nigka shir nekarmaji.
Yuuska nugka juyujuyuntujai najatmawaitaj
nunasha nigka shir nekawai.
15 Shuarti pujutigka
nupa tsapai wári yagkurina numamtinaiti.
16 Turasha yagkur ainanka nase senchi nasentuk umpui
yaja utsainaiti,
turamtaigka atak awenagka wainnachuiti.
17 Turasha Yuusa anenkariya nuka,
nina umirin aina nuigka tuke atinaiti.
Tura nita uchiri ainanmasha,
tura nuna uchiri ainanmasha ni pegker takamurigka tuke atinaiti.
18 Yuus nitajai chicham umikmauwa nuna
metek umin ainan,
nuiyasha chicham umiktin diez aarmauwa nunasha
inaitsuk umin ainan tuke yaigtinaiti.
19 Ina Yuusri pujusa inamtairigka
nayaimpinam awai.
Nui pujusag ashi nugkanam inamui.
20 ¡Nayaimpinmaya shuar senchirtin ainatiram,
Yuusa chichame metek umirin ainatirmeka,
Yuus ememattarma!
21 Atum Yuusau ainatiram
nina chichame umirin ainatirmesha
Yuus ememattarma.
22 Yuus najankamu ainatiram
ashi nugkanam pujuinatiram
Yuus ememattarma.
Tura wisha turusnak ima ninak
enentaimtusan
wina Yuusrun ememattajai.