LIBRO IV
(Sal 90–106)
Moisés Yuuska atakea nuisha tuke pujutnaiti tusa timau
Moisés Yuus etegkamu ajakua nu Yuusjai chichasmau.
90
Apuru, ameka yaunchuk nagkamsamii ainatinka tuke ayamkartinaitme.
2 Ameka nugka aina, nain aina
nusha najantsuk yaunchuksha,
tura atak atina nuisha ina Yuusrig tuke atinaitme.
3 Ii ainatin jakarum ataksha nugka najanatarma
tusa takuminka:
“Ii ainatika jakar nugka najanainaji”.
4 Ame iismaka mil uwíya nuka
wári nagkamawai.
Tura mil uwíya nuka káshi wári
nagkamamaina numamtinaiti.*
5 Tura entsa chichiram ejekmaina numamtuk
shuar ainaka utsame.
Tura ina pujutiya nuka karanam
wainu pujauti shintaku ikutia numamtinaiti.
6 Tura ii ainatika nupaya numamtin ainaji.
Nupa káshikmas yagkuruk pegker jas au,
tsupikam etsa agkuantai kaak
awa numamtin ainaji.*
7 Ame kajeakmeka, ii ainatinka awakkartame.
Ame senchi kajekmeka inka ijikkartame.*
8 Ameka ina tunauri aina,
tura uuka pegkerchau enentaimmau ainasha
shir nekame.
9 Ame kajekam, jakarti tusam takuminka,
shuar mayairamu wári nagkamauwa numamtuk,
wári jamain ainaji.
10 Shuar ainatika setenta uwík iwáku pujusa jau ainaji.
Antsu kakaram akurka ochenta uwí pujumainaitji.
Turasha iman uwí pujakrisha
waitamu tura nukap takat aina nu awai.
Uwí aina nuka ina pujutijai metek wári nagkamawai.*
11 Ame senchi kajekmaurminka
chikichkiksha pegke nekainatsui.
Ame kajekmauram ashammaina nunasha pegke nekainatsui.
12 Apuru, ii ainatisha uruk pujumainaitjia nu
pachisam jintinkartuata.
Nu turukratawakmin pegker pujut unuimarmi.
13 ¡Ina Yuusriya!
¿urutia ii ainatincha yaigkratkattam?
¡Ii aminu ainatin wait anenkarturta!
14 Amina anegkrattairam káshikmasam tuke sukartita.
Turukratawakminka isha shir aneakur
ashi tsawantin ame emematkur kantamtatji.
15 Ii nukap uwítin waitaku pujusaj
turusmek shir aneasar pujusarti tusam ataksha yaigkratkata.
16 Ii aminu ainatin tura ii weantu ainasha
wainkarti tusam ame turamuram aina,
tura amina senchiram iwainakta.
17 Ina Yuusriya, amina anenkaram
inisha atii,
ame ina takatri ainasha
pegker arti tusam titá.
¡Ee, ame ina takatri ainaka pegker arti tusam titá!