Yuus Davidjai chichaman umikmau
Etán ezrahíta shuar ajakua nu kantamamu.
89
Wina apuru, wii kantamkunkaametme wait anenkartinmeka tusan
tuke tu kantamrittajme.
Tura chichamrum metek uminaitam nuna pachisan tuke ashi shuar ainan ujattajai.
2 Wina Yuusrun chicharkun:
Amina anegkrattairam nayaim tuke awa
imanua nuna pachisan tuke etsertatjai.
Tura chichamrum metek uminaitam nuna pachisan tuke chichattajai.
3 Apu atii tusam David etegkawaitam nujai ameka chicham umikuitme,
nuiyasha ame
tura asam ni anajmatkum:
4 “Ame jakakmincha
ame weantu aina nuiya chikichik apu jastinaiti,
tuma tuke inamratnaiti”, tusam tinaitme.
5 Yuusa,
ame turamuram ainan pachisar
nayaimpinmaya shuar ainaka ashi emematramainawai.
6 Nayaimpinmaya shuar aina nukesha
Yuusa amijaigka metekka ainatsui.
7 Yuusru, ameka senchirtinaitme tura ashamainaitme,
nayaimpinmaya shuar aina aminka tentea iruunturmawai.
8 Apu, ashi najankamu iruna nuna Yuusriya,
ame pegkeraitam imau tura senchirtinaitam imauka
amijai metek chichaman uminka chikich Yuuska atsawai.
9 Nayantsasha amina chichamrumnaka umirtamnaiti,
tumau asa senchi tsukateak
ashammain jakai mijaakta,
tusa ame tamaka mijamnaiti.
10 Nayantsanmaya kuntin uunta nu
nepetkam
amina shuarum ainasha
amina senchirmijai nepetkauwaitme.
11 Nayaim tura nugka aina nuka
aminu ainawai,
tura nu ainanam iruna nusha
amek ashi najankauwaitme.
12 Etsa watai tura
etsa akataisha amek
najanawaitme.
Nain Tabor, tura nain Hermónjai
amina naarmin pachisar shir aneasar kantamainawai.
13 Ameka shir senchirtinaitme,
tura amina kunturam untsura nu
yaki takuakmeka ameka nepetmauwaitme.
14 Ameka pegkernum
anenkajai inamme.
Turasha nuna nagkasau nekas
amina anenkarmijai
tuke uminaitme tura kuitamkartame.
15 Shuar amina emematramtan nekauka,
amina tsaaptintrumjai kuitamam weká asa,
shir aneastinaiti.
16 Amina naarmin pachisar
ashi tsawantin shir aneasarti,
tura amina takatrum pegkera nuna taká nuka
eme anentame.
17 Ame iman arti tusam senchimtikartame,
ame wakera asam nu nukap senchimtikartame.
18 Israelita ainan Yuusriya,
ina apurimka ametme,
ame inka kuitamkartukta.
19 Yaunchuk amina chichamrumin etserin
karanam chicharkum:
“Winau aina nuiyan,
chikichik shuaran kakarman iisan etegkajai.
20 Nuka wina inatair Davidtaiti,
ninka wii aceitejai muuknum ukattran apu amajsajai.
21 Wii ninka tuke yaigtinaitjai,
turakun tuke senchimtiktinaitjai.
22 Nina shuari ainasha
ninka nepetkachartin ainawai,
tura shuar pegkerchau ainasha
nepetkachartin ainawai”.
23 Nina shuari ainanka
nisha wainaig ijinatnaitjai.
Tura nina kajerin ainancha ijinatnaitjai.
24 Wika ninka tuke anetnaitjai.
Wii ninka nukap napamkatnaitjai,
turamu asa senchirtin jastinaiti.
25 Tura ni inammauka
nayantsanam nagkama
entsa Éufrates tutaiya imanai atinaiti.
26 Ni wina chichartak:
“Ameka wina aparuitme,
ameka wina Yuusruitme,
wina kuitamrin tura uwemtikrinaitme”, tusa turuttinaiti.
27 Tusa turuttin asamtai wina uchir iwairiya nuna, ninka,
ashi nugkanmaya apu ainan
nagkasau apu amajsatnaitjai.
28 Wika ninka tuke anetnaitjai,
tura wii nijai chichaman umikuitaj
nusha tuke atinaiti.
29 Nayaim eke megkatsaigkika,
ni weantu aina nuka
tuke apu artinaiti.
30-31 Antsu chicham umiktin
ainan jintintawaruitaj nuna
ni weantu aina metek uminachkaigka,
32 nita pegkerchaurinig
waittan susartinaitjai.
33 Turasha Davidtan wii aneaj nunaka
pegkesha inaisashtinaitjai.
34 Wii turatjai tusan
nijai chichaman umikuitaj
nunasha umitskeka inaisashtinaitjai.
35 Davidtan turattajai tusan wii anajmatawaitaj nunaka,
metek umiktatjai tusan wiki tumamjai.
36 Etsa eke megkatsaigkika,
ni weantu ainaka
apu jasar tuke inamrartin ainawai.
37 Nantu tuke awa numamtuk atinaiti.
Tura nayaim eke megkatsaigkika tuke atinaiti,
tusam Yuusa tinaitme.
38 Tusa tinu ayatkum
apu atii tusam ame etegkamuram
kajerkam, nakitram inaisauwaitme.
39 Turakum
nijai turatjai tusam chicham umikuitam nusha,
umitsuk inaisauwaitme.
Tura etsegkrutairisha jurukim nugkanam ajapruawaitme.
40 Yaakat Jerusalén
pegkramua nusha
yumpuaram inaisaume.
41 Ashi shuar aina nunii nagkamainak,
wayawar nita wakeramun kasamainawai.
Tura nita nugkeen nuig yantamnum puju aina nu
wishikainawai.
42 Davidtan shuari ainaka
nita ima senchirtin asar
shir aneasar pujuinawai.
43 Nina maanitairi ainasha atankinme,
tura asam maaniamunmasha yaigchauwaitme.
44 Yaunchuk ni eme anentu jakmauwa nuka
eme anentsa iishtai amajsaume.
Tura ni apu jasa pujusa inama jakmaurisha
imanchauwa nunin amajsam inaisaume.
45 Nukap uwí pujuschati tusam tinaitme,
tura natsaamin jasu amajsauwaitme.
46 Wina Yuusru,
¿ameka winaka umrutkamkek pujuttam?
¿Ame wina kajertukum antsamkek pujuttam?
47 ¡Apuru, wii nukap
uwí pujuschatnaitaj nu anearta!
Ameka shuarka nukap
uwí pujusti tusamka najanachuitme.
48 ¡Chikichik shuarkesha
jatsuk iwáku pujumainka atsawai!
Tura jakashtajai tusa
jatan uwemtumaincha
pegke atsawai.
49 Apu, Davidnaka tuke anetnaitjai tusam
yaunchuk tinaitam nusha
urukamtai umiatsum.
¡Ame chichakum, wii taja nunaka pegkesha
yapajiashtinaitjai, tusam tinaitme!
50 Wina Yuusru,
ii ainatinka ashi shuar aina wishikramainaji.
Nukap shuar aina ina kajertamainakaisha
ii ainatika katsuntainaji.
51 Amina shuarum aina inka kajertamainaji,
tura amina shuarum aina ame etegkamurmincha
kashi kashinig kajerainawai.
52 ¡Yuuska pegkernum tuke chichartai atii!
Maake nunis atii.