Yuusru wait anenkarturta
80
Ameka israelita aina kuitamnaitme.¡Tumau asam shuar ovejarin kuitamna numamtuk,
José weantu aina ame kuitamme!
¡Ame querubín ainaka iname!
Iman asam Efraín weantu aina,
2 Benjamín weantu aina,
tura Manasés weantu ainasha
amina senchiram iwaintakum,
amina senchirmijai
uwemtikarturta.
3 Ina Yuusriya,
¡wait anenkarturam
ii yaunchuk pujuyaj turusmek pegkernum yapajkartuata!
Ame turukratawakmin ii ainatisha uwemrattaji.
4 Yuus ashi senchirtina,
ame kajekam pujam nu, aminu aina aujtamaina nusha
¿urutma asamea umirkattam?
5 Yutai sukartumainnum
waitat sukartusmiame.
Umutai sukartumainnum
waitat sukartusu asaakmin útmiaji.
6 Shuar ina nugken tijuch
pujuina nu, tura ina shuari ainasha wishiktai amajkartusume.
7 Ina Yuusriya,
¡wait anenkarturam
ii yaunchuk pujuyaj turusmek pegkernum yapajkartuata!
Ame turukratawakmin ii ainatisha uwemrattaji.
8 Ii ainatinka Egipto nugkanam pujarin
uva arattsa jumaina numamtuk jukartukim
ju nugkanam itakratawaitme.
Turukrata asam juiya shuar aina jiiram utsakum
ju nugkanam apujkartusuitme.
9 Arak arattsa nugka iwarmaina numamtuk
shuar atsau amajtamsauwaitme.
Arak aram tsapak init kagkapenna numamtuk
aminu ainaka nu nugkanam pujusar shir nukap pampagkuiti.
10 Nu senchi pampagki wea asar,
nain ainanmasha yaaktamkar enetkaru ainaji.
Númi Líbano tutai iruna imanaisha
yaaktamkau ainaji.
11 Ina nugkegka etsa watainmanigka
entsa Éufrates tutainam nagkatkau ajakuiti.
Tura etsa akatainmanigka ina nugkegka nayantsanam nagkatkau ajakuiti.
12 ¿Shuar aina nagkamainak akar yuawarti tusamsha,
urukamtai uva tanishrisha yumpuntramame?
13 Paki aina kautkar amuinawai,
¡kuntin ikamia ainasha amuinawai!
14 Ame Yuus ashi senchirtinaitme,
imanu asam wait aneasam,
nayaimpinam pujusmek
ju uva iruna nuka ame iiyaku atá,
turakum kuitamkata.
15 Amek inka ju nugkanam apujkartusuitme.
¡Amek inka kuitamkartukuitme!
16 Ina shuari aina inka nepettamkaru ainaji.
Ina yaaktari ainancha ekemararu ainawai.
Ina turutmawaru asarmatai nitasha turusmek ijinawarta.
17 Turasha shuar aminu aina
ame eme anentsa enentaimtu jakmauram,
ame chichakum ju shuar ainaka winau ainawai
tusam tinaitam nu yaigkarta.
18 Ame yaigkratkumnaka
ame umirta nuka inaisashtatji.
Ame pujut sukartusta
nu turukratawakminka ame ememattatji.
19 Ina Yuusriya,
¡wait anenkarturam
ii yaunchuk pujuyaj turusmek pegkernum yapajkartuata!
Ame turukratawakmin ii ainatisha uwemrattaji.