Apu pachisar Yuus seatmau
Salomón kantamamu
72
Wina Yuusru, ju apusha ame pegker inamnaitam turusag inamrati tusam yaigta.2 Nu turamu asa aminu ainan,
tura shuar waitin ainancha pegkernum yaigti.
3 Nain aina nuiya
maanitsuk agkan shir pujutan,
pegker aina nu takatan shuar ainan jintintati.
4 ¡Kuitrinchau asa waitin aina nuna ayamrukti!
¡Tura kuitrinchau asa waitin aina nuna
uchiri ainancha ayamrukti!
¡Antsu shuaran waitkau aina nunaka waittan susati!
5 ¡Etsa tura nantujai tuke awa numamtuk,
apuka tuke puju atii!
6 Nigka ajanam árak arakmaunam yumi yutuk tura sana nugkan uchupak
árak ainan shir tsapamtikna numamtuk atii.
7 ¡Ni apu jas inamratna nuigka
agkan shir pujamu,
pegker aina nu takámu atii!
¡Tura ni inammaurigka nantu megkakatna imanai nagkankatin atii!
8 Nu apu atina nuka nayants ainanam
tura ashi nugkanam inamratnaiti.
9 ¡Nina shuari aya nugkanmag puju aina nuka
ni chichamun umirkarti!
10 Tumainak Tarsisnumia apu aina,
ajuntainam puju ainan apuri aina,
Sabánmaya apu aina,
tura Sebánmaya apu aina nu,
warí ainan ikaatiarti.
11 ¡Ashi apu aina
nina tikishmatrartin ainawai!
¡Ashi nugkanmaya shuar aina
nina umirkartin ainawai!
12 Nu apuka shuar kuitrinchau
yainkata tusa tamaka yaigtinaiti.
Shuar nina yaimain atsurmau asa
wake mesemar pujuinanka nu apu yaigtinaiti.
13 Shuar kuitrinchau ainan,
shuar atsumin ainan,
tura takamainchau ainan yaigtinaiti.
14 Nu apu iismaka,
shuar waitin ainan waitkaina nuka
tura maina nuka
shir pegkerchauwaiti.
Tuma asamtai nitanka ni ayamruktinaiti.
15 ¡Nigka apu tuke pujustin atii!
¡Sabánmaya oro ainanka nina ashi susarti!
¡Ni pachisar Yuus tuke aujtai atii!
¡Nigka pegkernum tuke chichartai atii!
16 ¡Ashi ju nugkanmagka trigo aina nukap atii!
¡Trigo aina nain ainanmasha tsapakti!
¡Nain Líbano tutainam
trigo aina nukap ajakua iman atii!
¡Nupa ajanam nukap pampaina numamtuk,
shuar ainasha ju yaaktanam pampagti!
17 ¡Apu naarigka etsa tuke awa iman atii!
¡Ashi nugkanmaya shuar ainaka apu naarin pachisar
pegkernum tuke chichau arti!
18 Apu Yuus, Israel ajakua nuna
Yuusrigka pegkernum tuke
chichartai atii.
Nigkiti wainchatai ainan iwainauka.
19 Nina naari pegkera nuka
pachisar tuke pegkernum chichartai atii.
¡Nina imantriya nuka ashi nugkanam atii!
¡Nuka nunis atii!
20 Shuar Isaí naartin ajakua nuna uchiri David kantamamuka juigkiti.