Salmos 69

Waitaku pujusar Yuus aujsamu

David kantamamu

Yuusru, senchi waitakun

katsunmainchau nekapeajai,

wait aneasam yainkata.

2 Kucha tujutujutu najammain atsamunam

init wayan tepeamtai,

entsa chichiram tukuri akagketua

numamtuk nekapeajai.

3 Senchi untsu untsumkauwan sarjai,

suwersha najuakai.

Wina Yuusrun naka nakakuan pimpikjai.

4 Iturchatka atsurtaig wina

kajertin ainaka,

wina wichur nukapea nuna nagkasau shir nukap ainawai.

Iturchatka atsurtaig wina mantuawartasa

wakerutainaka nukap jasarai.

Wika kasamkachu aig

kasamkamuram awaigkita tusa imatrutainawai.

5 Yuusru, wii enentaimkachu ayaj nuka ame nekame,

wii tunau takasmau ainanka wika uurmaitsujme.

6 Apu, Yuus ashi senchirtina,

amina nekaspapita tusa turamin aina nu,

wii pegkerchau takasmaunam natsaararti tusamka tipa.

Israelita ainan Yuusriya,

amina aujtamaina nuka wii tunau takasmaunam wake mesemar nekapiarti tusamka tipa.

7 Aminu asan

kajeram pujajai.

Natsaamakun yapiruigka kapantrauwa numamtin nekapeajai.

8 ¡Wina shir yatsur ainasha

chikich shuarjai metek amajtuinawai!

9 Amina jeemin akasmatakun

senchi waitajai,

shuar aina amina kajertamainak pegkerchau chichartamaina nuka,

wina pegkerchau chichartuinak turamainawai.

10 Utkun yurumkan yutsuk

ijarman pujakai wishikruinakaisha

wika katsuntajai.

11 Wake mesemar pujaku nugkutain jaanchin nugkurmatai

wishikruinakaisha katsuntajai.

12 Ashi shuar aina,

pegkerchau chichartuinawai.

Tura shuar nampen ainasha

wishikruinak kantamrutainawai.

13 Turasha Yuusru, wika amina seajme,

wait aneasam yainkata.

Ame senchi anegkratin asam yainkata,

ameka tuke uwemtikartin asam,

winasha uwemtikrurta.

14 Shuar paakanam tepeamtai jakai tusa jiimaina numamtuk,

wina mantuawartasa kajertuina nuiya uwemtikrurta.

Shuar entsa kunanam tepeamtai jakai tusa jiimaina numamtuk,

wina mantuawartasa kajertuina nuiya uwemtikrurta.

15 Entsa chichirmanam

shuar jakea pachitsuk inaimaina numamtuk ayamruttsukka inaitusaipa.

Tura wainchi patak shuaran juki emegkaina numamtuk amajkarti tusamka tsagkamrukaipa.

16 ¡Wina Yuusru, ameka pegkeraitme, anegkratnaitme,

iman asam winasha yainkata!

Ameka wait anegkratnaitam iman asam

winasha shir anturtukta.

17 ¡Wii amina inatairam asan

seajam nu anturtutsuk inaitusaipa!

¡Iturchat ashammainnum pujajai, wári yainkata!

18 ¡Ame jui taam, wina kajertin aina

waitkaraina nu ayamrutkata!

19 Ameka wina pegkerchau chichartuinak,

inatstuina nusha shir nekame.

Tura wina kajertin aina nusha

ameka shir nekainame.

20 Pegkerchau chicha chichartuinakua ipimtukiarai,

tuma asan shir enentaimsa pujumainchau,

tura kakamainchau nekapeajai.

Yáki wait anentrur

enentairun ichichtura tusan

eaknasha wainkachmiajai.

21 Tsukamakaisha yutainam jatain egkeawar surusarmayi,

tura kitamakaisha umutain churuinan surusarmayi.

22 Nitaka jiistamainak

yurumka yuinaksha pegkerchau takaina asar, nawenam jigkam iyamaina numamtuk, waittan juinawai.

23 Nitaka wainmakarai tusam wainmachu amajsarta,

nuiyasha kakamainchau amajsarta.

24 Nitaka kajerkau asam

chikichkiksha inaitsuk ashi ijinata.

25 Nu turawakmin nita jee ainan,

tura nita yaaktari ainasha shuar atsau agkan juakartatui.

26 Ame waitat surusu asaakmin

waitakun pujaisha

wina kajertin ainaka wishikruinak nu senchi

waitkarainawai.

27 Tumaina asarmatai amesha nitaka pegkerchaunmag ikkata,

¡tura nita tunau takasmauri ainasha pegke tsagkuraipa!

28 ¡Shuar iwáku pujuina nuna naari

papiinum aatramu aina nui nita naari aatkamua

nuka ashi asakatkata!

Tura shuar amina umirtamin ainan naari aatkamua nuigka

nita naarigka pegkesha aattraipa.

29 Wina Yuusru, wii jakun

wake mesemar nekapeakun

tura kakaarchamnau nekapeajai,

tuma asamtai nu aina nuiya

winasha wait aneasam uwemtikrurta.

30 Chikich ainasha antuinamunam,

Yuusan emematkun naarin pachisan shir aneasan maaketi tusan kantamruattajai.

31 Nu Yuusnaka tagku epeamu aina nuna nagkasau vaca aishmag kachurtin, nawentin aina nu pegker enentaimtikui.

32 Shuar Yuusa umirin aina

wake mesemar pujuinaka nuna

wainkar, shir aneasartatui.

33 Yuuska, shuar waitak

wake mesemar pujak seammaunka anturui.

Ninu aina achikam pujuina nunasha

nakitragka inaiyatsui.

34 Nayaim, nugka tura nayants,

tura nu ainanam matsamin ainatirmesha

Yuus ashi ememattarma.

35 Yaakat Jerusalénnaka Yuus kuitamkatnaiti,

tura Judá weantu ainan yaaktari aina yumpugmau aina nuna ataksha iwarkatnaiti.

Tura ame etegkamu ainaka nu yaaktanam

pujusartin ainawai.

36 Nu nugkanka ni etegkamu ainan uchiri aina jukiartinaiti.

Tura nu nugkanmagka

Yuusa anen aina nu pujusartin ainawai.