David Yuusan tunaur tsagkurturta tusa timau
David Betsabén takasu asamtai Yuusa chichamen etserin Natán jiakuiti, turam pujus juna aaruiti.
51
Yuusru, amina anegkrattairmijai,winasha wait anentrurta,
tura ame wait anenkartutairmijaig,
wii tunaun takasu akaisha tsagkurturta.
2 Wina tunauruka tuke nijattrusmeke atá,
tura tunaur japirturam pegker amajtusta.
3 Wii pegkerchauwaitaj nunaka shir nekamajai,
tura wii tunaun takasuitaj nunasha kajinmattsuk aneakjai.
4 Ame nakitamun
amina emtimin
tunaun takarsauwaitjame.
Tura nekas tunaun takasu asamtai
waittaka surustatme.
Ame turutam nuka nekasaiti tajai.
Wika pegkeraitjai tusanka tumammaitsujai.*
5 Wika nukuru ampujen egkemsanak tunaurtin ajakuitjai.
Tumau asan akinkuncha tunaurintin akinawaitjai.
6 Ameka nekas shuar pegkeran enentaima nu aneame.
Winasha pegkeran enentaimrati tusam yachamat surusuitme.
7 Tura wii tunau takasmau tsagkurturta,
turam pegker amajtusta,
Turutawakminka yuragkim pujua nuna nagkasau atatjai.
8 Wii tunau takasmaunam waitat surusu akumsha,
ataksha shir aneasa pujut surusta.
9 Wii tunau takatai ainaka ashi tsagkurturta.
Turakum wii pegkerchau enentaimtair ainasha emegkatrurta.
10 Yuusru, wina enentair pegker amajtursata.
Nutikakum pegker takastasa enentaimta nu surusta.
11 Yuusru, aminiyagka ajapruawaipa.
Tura Wakan Pegker surusuitam nusha jurutkipa.*
12 Wika nekas uwemrauwapitja tusa shir enentaimta nu awaigkim ataksha surusta.
Tura amina Wakanim wait anenkartina nujai kuitamrukta.
13 Turutawakmin
shuar ainan amina chichamrumin
umitan nakitin aina nuna jintintawartajai.
Turam nitasha tunau takatan inaiyainak
amina umirtamkarti.
14 Yuusru, ametme wina uwemtikrinmeka,
tumau asam maawarti tusamka tsagkamrukaipa.
Turutawakminka amina pachisan,
ameka pegkeraitme tu kantamruatjame.
15 Apuru, winasha kantamati turutta,
turutiakmin wisha amina
emematkun kantamruatjame.
16 Wika shir aneasan ovejan maan epeakun emematmainaitjame.
Turasha aminka nuka shir amajtamchau asamtai
nunaka turumain nekapeatsjai.*
17 Yuusa, ameka
shuar wika tunauwapitja tusa,
wake mesemar enentaimuk waita nu shir anentame.
Tura shuar wika tunauwapitja tusa tunaur tsagkurturta,
tusa turama nuka yaitskeka inaichauwaitme.*
18 Yuusru, yaakat Jerusalén ataksha pegker jastii tusam titá.
Turakum Jerusalénkan yumpugkarua nuna,
ataksha pegmararti tusam shuar aina enentaimtikrarta.
19 Turamu asar Jerusalénkan iwararti.
Turawarmatai vaca ainan maawar,
amina eme anentramas iirmainak yaunchuk epejakarua turusag epenak, pegker enentaimtikramiarti.