Yuus emematkurum,

uwej awatkurum shir aneakrum senchi kantamruatarma.

2 Yuus ashi senchirtina nuka ashammainaiti.

Nigka ashi nugkanmaya apu ainan nagkasau apuiti.

3 Chikich nugkanmaya ainan Yuus nepetak,

atum inartarma tusa ina inaiturmasuitji.

4 Yuuska Jacobon anea asa,

ni weantu ainati pujustinan nugka pegkeran etegka

nuna suramsauwaitji.

5 Yuus ni etegkamu aina

shir anenak senchi kantamainamunam

tura kachu aina umpuinak

pampainamunam nina pujusa inamtairin

wayaa ekemsauwaiti.

6 ¡Yuus emematkurum kantamruatarma!

¡Ina apuri emematkurum kantamruatarma!

7 Yuus ashi nugkanmaya shuar ainan apuri asamtai,

shir aneasrum kantamruatarma.

8 Yuuska ni pujutairi pegkera nui pujusag

ashi nugkanmaya shuar ainan inawai.

9 Tura chikich nugkanmaya apu eme anentsa iitai aina,

Abraham weantu aina nujai iruunar Yuusan emematainawai.

Ashi nugkanmaya shuar aina nuka

Yuusnau ainawai.