Yuuska inii pujau asa ichichmamtan suramji
46
Ima Yuusketi ina ajamatairigka.Tumau asa iturchatnum pujuinakrincha,
ni ayamrutmak ichichtamji.
2 Tuma asamtai nugka urkai
nain aina yumpuunar
nayantsanam wayakaisha ashammaitsuji.
3 Yuus nayants ainan senchi tsukatmamtikuk utmamtikkaisha,
tura nain ainan senchi umuchiakaisha, ii ninu ainatika ashammaitsuji.
4 Chikichik entsa ni tsegkearmauri ainajai,
shuar Yuusan yaaktarin pujuinan shir enentaimtikainawai.
Nu yaaktaka Yuusa pujutairi asa,
chikich yaakat aina nuna nagkasau shir pegkeraiti.
5 Yuuska yaakat ajapeen pujau asamtai,
chikichkiksha yumpuumain ainatsui.
Tura Yuus shuar ninu aina nui pujuinan tuke kuitamui.*
6 Ashi shuar nugkanam puju aina,
apu ainajai Yuus chichamun antuk ashamainak senchi pampainawai.
Tura nugkasha yumpunainawai.
7 Ina Yuusri ashi senchirtina nuka ijai pujawai.
Jacob ajakua nuna Yuusri incha ayamrutmaktatji.
8 Shuar ainati turumainchau ainan ju nugkanam
ina Yuusri turawa nu atumsha iistarma.
9 Ashi nugkanam maanitsuk pujusarti, tusa tinaiti.
Tusa tinu asa flecha ainan, nagki ainan kupiruiti,
tura maaniaku wekatai carrete ainancha ashi ekeemakuiti.
10 Maanitsuk pujakrum:
¡Wii Yuusaitaj nu nekaratarma!,
ashi nugkanmaya aina wina umirtukartatui.
11 Ina Yuusri ashi senchirtina nuka ijai pujawai.
Jacob ajakua nuna Yuusri incha ayamrutmaktatji.