Yumi yutukchaktawai tusa Elías emtika etserkamu
17
Yuusa chichamen etserin Elías yaakat Tisbénmaya, nugka Galaadnumia ajakua nu, apu Acabpan jeari chicharuk: Israel shuar ainan “Yuusri Tuke Pujuwaiti”. Wika nina umirnaitjai. Ni amina chichartamuk: ¡Wii eke tumati tusan tatsaigkika nukap uwí sana kaketsuk, tura yumisha yututsuk atatui! tusa turamui tinaiti. Tusa ujak umik apu pujamunmaya jinkinaiti.*2 Tumamtai Elíasan Yuusan chicharuk: 3 “Juiyagka jiinkim etsa watainmani wetá, tumam entsa Jordánnum ashints Querit tutai etsa watainmani a nui uumkam pujusta. 4 Tumam nu entsa umittame, nui pujusam yuatnun amasarti tusan nanamtin ainan akuptittajme”, tusa tinaiti.
5 Tusa tama Elías Yuus tumata tusa timaun turusag umiak, entsa Jordánnum etsa watainmani ashints Querit tutai amaunam nui pujusuiti. 6 Nui pujaun nanamtin aina káshikmas tura agkuantaisha pankan namagjai jukiar ejétuina. Turam nuna yu jakuiti. Tura ashintsan umujakuiti. 7 Turasha yumi yutachu asamtai, ishichik tsawan pujus ashints kuyua mukujasuiti.
Sareptanmaya nuwa waje Elíasan yurumkan ayuramu
8 Tumamtai Elíasan Yuus Tuke Pujuwa nu, chicharuk: 9 “Yamaika nugka Sidónnum yaakat Sarepta tutai a nui wetá”, tumam nui pujusta. Tumam nui pujamin wii turata tusa enentaimtikmau asa, nuwa waje ame yuatnunka suramsattawai, tusa tinaiti.*
10 Tusa tama jiinki wuwaiti. Tuma wea weakua yaakat Sarepta waitirin jeajkama nuwa waje chigkimin juwak wekan wainkauwaiti. Tura untsuk chicharuk: “Wait aneasam ishichkisha entsa shikikam surusta umartajai”, tusa tinaiti.
11 Tusa tama entsan utittsa wean chicharuk:
“Pansha ishichik itartita yuatjai”, tusa tinaiti.
12 Tama nuwa waje ayak: “Ame Yuus umirnaitam nu waitrichu asamtai wisha nekasa nuna tajame. Pan najanamuka pegkesha atsurtawai. Antsu pan najanatin ichignanam ishichik arutui, tura aceitesha ichignanam ishichik arutui. Tuma asamtai nuna najanan uchirjai yuattsan chigkimin ishichik jukittsan wekajai. Turasha nu amukrika pan najanar yumain pegke atsau asamtai, tsukai jakattaji”, tusa tinaiti.
13 Takai Elías nuwa wajen chicharuk:
Juna amukan tsukai jakashtajash tusamka enentaimipa. Ame tame nuka metek umikta. Turasha pan najanam inaraam yama nagkamchakmeka winaa surusta. Turam uchirmijai yuatnusha najanata. 14 Israel shuar aina umirtairi Yuus, amina chichartamuk: “Harina ichignanam ara nu, tura aceite ichignanam ara nusha amukashtatui tusa tawai. Yuus yumin yutumtikattawai”, tusa tinaiti.
15 Tusa tama nuwa waje wuwaiti, tuma Elías turata tusa timaunka turusag umikuiti. Nuna tura asa nukap tsawan pankan najana uchirijai, tura Elíasjaimak yuawaruiti. 16 Yuus Elíasan tumattawai tusa tina tumasag harina ichignanam auka, tura aceite ichignanam ausha pegke amukachuiti.
Nuwa waje uchiri jakaun Elías inankimu
17 Nukap tsawan pujus, nuwa waje uchiri jatan nagkamnawaiti, tuma shir senchi ja asa, jakauwaiti. 18 Tumamtai nuwa waje Elíasan chicharuk: “Ameka Yuus umirnaitme. Wii tunau takau asamtai wina uchir maattsamsha, ¿urukamtai wina jearuisha tawaitme?” tusa tinaiti.
19 Tusa takai Elías nuwa wajen chicharuk:
“Uchiram jaka nu itaata”, tusa tinaiti. Tusa tama uchirin juki susauwaiti. Turam uchi jakaun minakki juki nina kanutairin yaki waka ejé peakrin awasuiti. 20 Tura Yuusan senchi aujeak: “Wina Yuusru, ju nuwaka wii nina jeen pujakai shir kuitamrau nekayatam, nina uchiri jakati tusa ame timau asa jakayi. Nu tumamtai wake mesemar pujawai”, tusa tinaiti.
21 Nuna tusa takug uchin tresa imajnia pagkuk senchi Yuusan aujeak: “¡Wina Yuusru,! wait aneasam ju uchi inankita”, tusa tinaiti.
22 Tusa tama Yuus Elías timaun metek umiak, uchi jakaun ataksha inankinaiti. 23 Turamtai Elías ni kanutairin pujau uchin juki nugka akaiki nukurtinan suak chicharuk:
“Uchirmeka aneantai”, tusa tinaiti.
24 Tama nuwa waje Elíasan chicharuk:
“Yamaika nekajme. Ameka Yuusa chichame etsernaitme, tumau asam ame etseream nuka nekas Yuus turammau etsereame”, tusa tinaiti.