29 Shuar Asá naartin Judá weantunam apu jas treinta y ocho uwí pujai, Omrí ajakua nuna uchiri Acab naartin Israel shuar ainan nugken apu jas inamtan nagkamawaiti. Nigka yaakat Samarianam pujus veintidos uwí inamrauwaiti. 30 Turasha ni takamurigka Yuus iismaka chikich apu ajakarua nuna inagkas shir pegkerchau ajakuiti. 31 Nabatan uchiri Jeroboam pegkerchau taká jakua tumasag pegkerchaun takaksha inaisatjai tuka enentaimrachuiti. Tuma asa sidonio ainan apuri Et-baal ajakua nuna nawantrin Jezabelan nuatkauwaiti. Tuma nita yuusrimtairi Baal tutain eme anentas iiyak emematu jakuiti. 32 Iruuntra Baal ememattinan jean Samarianam jeamkauwaiti. Tura tagku aina maa patasa epetai atinnasha najanawaiti. 33 Tura nuiyasha yuus Asera tutai ajakua numamtinan Acab najanawaiti. Nuna tura asamtai yaunchuk apu ainan kajerujakua nuna nagkasau Israelan Yuusri tuke pujuwa nu, nina ima senchi kajerkauwaiti.

34 Acab apu ajakua nu uwítin shuar Betelnumia Hiel naartin ajakua nu, yaakat Jericó yumpuarmau ajakua nuna ataksha yaaktan najanawaiti. Nuna yaaktan najanattsa nagkama takamunam nina uchiri iwairi Abiram ajakua nu jakauwaiti. Tura yaaktan najana waitirin apujtusa ai uchiri ekeu Segub ajakua nusha jakauwaiti. Nuna tumawa nuka Yuus Josuén, Nun ajakua nuna uchirin chicharuk: “Yaakat Jericó yumpuarmauwa nuna shuar ataksha yaaktan takastasa nagkamkaigka tura nu yaaktan takas umiakaisha nina uchiri jinatnaiti”, tusa tina nu metek uminkauwaiti.