Sabá nugkanmaya nuwa apu ajakua nu Salomónkan irarsattsa wemau
(2Cr 9.1-12)
10
Sabánmaya apu nuwa ajakua nu, Salomónka Yuus yayámu asa, shir yacha jasai tusa etsermaun antukuiti. Tura shir iturchat ainan iniasan nekapsan iistajai tusa yaakat Jerusalénnum wuwaiti. 2 Tuma suntar aina eteam, kugkuin ainan, oro ainan, kaya pegker ainan yaruak camello ainan aentsak wuwaiti. Tuma Salomón pujamunam Jerusalénnum jeawaiti. Tuma iniastajai tusa ni timauri ainanka ashi iniasuiti. 3 Tura ni inimmauri ainanka nuka tu awai tusa Salomón ashi tinaiti. Apu tujinmainka pegkesha atsusuiti. 4 Ni inimmauri ainan Salomón ashi shir nekawaiti, turamtai Salomónka nekas shir yachapita tusa nekawaiti. Ni pujusa inamratin jea jeamkamuncha wainkauwaiti. 5 Nuiyasha ni yutairi pegker ainan nukap irunun wainkauwaiti. Tura nina suntaari apuri aina kanutairincha pegker ainan wainkauwaiti. Tura nuiyasha nina inatairi aina shir umirmaun, tura ni umartintrin shikik su ainasha pegker iwarmamkaru ainan, nuiyasha tagku nuweram shir pegker ainan, sacerdote aina Yuus ememattasa iruuntai jea aarin maa epenancha wainkauwaiti. Imanun wainkau asa enentain jearchauwaiti.6 Tuma Salomónkan chicharuk: “Wina nugkarui pujusan amina takatrum ainan, tura yacha jasu tusa tamaun antimaj nuka nekasaiti”. 7 Turasha wika amina yacharmin tura amina takatrum ainan pachisar ujatainakaisha jui taan ima wiki waintsukka nekaspapita tichamjai. Wii antukmauwa nuna nagkasau amina yacharmin tura aminu aina shir nukapen wainkau asan, yamaika nekaspapita tajai. 8 Amina nuwem aina, tura amina inatairam ainasha yacha asam, pegker chichamurmin anturtamainak shir aneasar pujuinawai. 9 Yuus amina umirtairam ememattai atii. Amina shir anentrama asa nina patai Israel shuar ainan inarti tusa apu amajtamsayi. Yuus israelita ainatirminka tuke anenmauwaitrume, tumau asa pegker takasti tusa apu amajtamsayi, tusa tinaiti.
10 Nuna tusa oron tres mil novecientos sesenta kilo aramun, kugkuin ainan, kaya pegker akik ainan shir nukap Salomónkan susauwaiti. Yaunchuksha imatika apu sujakchamun, nu nuwa apu Sabánmaya ajakua nu apu Salomónkan warí pegker ainan shir nukap susauwaiti. 11 Nuiyasha lancha uun ainanam Ofirnumian oro ainan, sándalo tutai númi katsuram shir pegker ainan, tura kaya pegker shir akik ainan Hiramsha ikankauwaiti. 12 Turamtai nu númi sándalo tutaijai Yuus ememattasa iruuntai jea jeamkamu nagkatkamu ainanam, tura ni pujusa inamratin jeamkamua nu nagkatkamu ainancha emetratnun matsatak umikuiti. Tura nuiyasha kantamin aina awatiartinan arpa ainan, salterio ainan ashi umikuiti. Yaunchuksha númi sándalo tutai ainaka imatika wainu jakchamu, nu tsawantin shir nukap wainnakuiti.
13 Tura Salomónsha nuwa Sabánmaya apu ajakua nu seanmaunka ashi susauwaiti. Nuiyasha nigki enentaimas chikich warí ainancha susauwaiti. Turam nuna yaruak suntara apuri aina kuitamkam nina nugken waketkinaiti.
Salomón yacha tura wiakach jasmau
14 Salomón chiki chikichik uwítin oro veintidos mil kilo tumainan yarumu jakuiti. 15 Tura nuiyasha israelita ainan nugken warín surin aina Salomónkan aki jaku ainawai. Arabia nugkanmaya ainasha, tura nugka shikapchinam apu pujuinasha ashi aki jakaru ainawai. 16 Tura ajamaka maanitain orojai docientos najanatarma tusa inamrauwaiti. Turasha chiki chikichik ajamaka maanitai shikapchich aina seis kilo orojai najanamu atatui, tusa tinaiti. 17 Nuiyasha ajamaka maanitai shikapchich aina trescientos najanatarma tusa inamrauwaiti. Tura chiki chikichik shuar ajamak maanitai aina chikichik kilo y medio tumain oro ukuirarum najanatarma, tusa tinaiti. Tutai najanawarmatai yaruak ni jea pujusa inamtairin “Bosque del Líbano” tutai ajakua nui awaya apujsauwaiti. a 18 Tura nuiyasha kuntina nai katsuram aina yaruakrum aya orok ukatkarum ekemsa inamtai atin najanatarma, tusa inamrauwaiti.b
19 Seisa imani ekeni najanamunam nina ekemtairi ajakuiti. Tura atumtairi ajakua nuka upuni najanamu ajakuiti. Antsu kuntu patai ekemtai najanamu ajakua nuna yantamen jimar león nakumkamu ajakuiti. 20 Nuiya seisa imania ekentramu ajakua nuisha chiki chikichik ekentramu aina nuna yantamen león nakumramu ajakuiti. Nunaka apu chikich ajaku aina nukesha turachmaun ni turawaiti.
21 Tura apu Salomón shikika umutairi aina, jea ni pujusa inamtairi “Bosque del Líbano” tutai ajakua nuisha apu shikika umutairi ainaka aya orok ajakaruiti. Salomónka jiru plata tutainka iman iijakchauwaiti. 22 Tura Salomónka lanchari Tarsisnum tepejakua nu Hiraman lancharijai tres uwí nukapek tuke waketu jakuiti. Nuna tumak oro ainan, jiru plata tutai ainan, leónka nai ainan, kuntin ikamau ainan, pavo real tutai ainan nuna ikanmajakuiti.
23 Tura Salomónka chikich apu ajaku aina nuna nagkasau wiakach tura yacha ajakuiti. 24 Yuus yacha amajsamu asamtai ashi shuar aina Salomónkan wainkartasa, tura ni chichakai anturkartasa wakerujaku ainawai. 25 Chiki chikichik uwítin Salomónkan wainkartasa wenakka ni susatnun oro najanamu ainan, jiru plata tutai najanamu ainan, jaanch ainan, maaniaku juutai ainan, kugkuin ainan, caballo ainan, burro ainan juki jeawar sujaku ainawai.
Salomón carro ainan tura caballo entsamka wekasa maanitai ainan sumajakuiti
(2Cr 1.14-17; 9.25-28)
26 Salomón maaniaku wekatai mil cuatrocientos carro ainan, tura maaniaku entsamka wekatai caballo ainasha doce mil ainan irumrauwaiti. Nu ainanka suntar chikich aina kuitamajakaruiti. Tura suntar chikich ainaka apun kuitamainak Jerusalénnum pujuina. 27 Salomón yaakat Jerusalénnum plata ainaka kaya shir nukap aina imau arti, tura númi cedro ainasha nugka paka weamunam higuera nukap iruna imanisag arti tusa timau asa imanisag ajakuiti. 28 Suntara apuri warín sumau aina caballo ainan Salomónnau atinan Egiptonam nugka Muzri, tura nugka Cilicia tutai ainanmayan sumakar ju jakaru ainawai. 29 Salomónka suntaari apuri aina Egiptonmayan chiki chikichik carro ainan seiscientos platajai sumajakaru ainawai. Tura chiki chikichik caballo ainan ciento cincuenta platajai sumajakaru ainawai. Nuiyan hititanmaya apu, tura Sirianmaya apusha suma jakaru ainawai.