Yuus Salomónjai chichaman umikmau
9
Salomón Yuus ememattasa iruuntai jean ashimak, tura ni pujusa inamratnuncha ashimak, nuiyasha ni umiktajai tusa timaunka ashi umikuiti. 2 Turamtai Yuus yaunchuk Gabaónnum wantintukua numamtuk ataksha wantintukuiti. 3 Tura chicharuk: “Ame seatmaunka anturkaujme. Tuma asan ame ju jea wii tuke pujustin jeamkaum junaka pegkermamtikajai, kuitamattajai tura ashi tsawantin tuke pujuttajai”.4 Tura amina apa David, wina chichamrun umijakua tumasmek, wii umikta tusan tinaitjam nu metek umiakminka, 5 wii amina apan Davidtan anajmatkun: Ame weantu ainanmayan apu jas ni patai Israel shuar ainan inarti tusan chikichkinak etegkatnaitjai tusan tinaitaj nuna amijai umiktatjai. 6 Turasha ame tura amina uchiram weantu artina nu wina chichamur umiktin aarmauwa nuna umitsuk chikich yuusrimtai ainan emematainakaigka, 7 wii Israel shuar ainan nugkan susauwaitaj nui matsataina nuiyanka jiirartinaitjai. Tura wina emematrittsa iruuntai jean wii pegkermamtikawaitaj nunasha inaisattajai. Turamtai chikich shuar aina israelita ainanka wishikiartinaiti. 8 Ju jea araantusa iitai akusha tsaikmau asa, númi aina, kaya aina yumpuarmaun shuar aina nuke nagkamainak wainkar wishikrartin ainawai. Turuina asar chichainak: ¿Urukamtai Yuuscha ju jea jui ni pujustinan israelita aina jeamrukmaitiatcha aitkawaita? tusar tiartinaiti.