David Jonatánkan uchirin wait anentramu
9
Chikich tsawantin David nina inatairin untsuk chicharuk: “Saúl weantu chikichkiksha iwáku pujatsuash, Jonatán wina amikur ajaku asamtai nuna enentaimtusan wait anentakun yaigtasan wakerajai”, tusa tinaiti.2 Takai Saúl ajakua nuna inatairi ainan apuri Sibá naartin pujaun untsukar itawaruiti. Turawarmatai David chicharuk:
“¿Amekaitam Sibá?” tusa tinaiti.
Takai ni ayak: “Ee, wiyaitjai apu, ame tamaun umiktasan taajai”, tusa tinaiti. 3 Takai apu David chicharuk:
“¿Yuusa anenkarijai, wii yaimain Saúl weantu chikichkiksha pujatsuak?” tusa tinaiti.
Takai Sibá ayak:
“¡Tuimpa nusha puja!” tusa tinaiti.
Takai Sibá ayak: “Amielan uchiri Maquir naartina nuna jeen yaakat Lodebar tutaiya nui pujawai”, tusa tinaiti. 5 Tusa takai werirum utitarma tusa inatairi ainan ishiakuiti.
6 Turawaram Jonatánkan uchirin apu Saúl ajakua nuna tiragken Mefi-bosetan jukiar David pujamunam ejéniaruiti. Turam apu Davidtan eme anentas iiyak tikishmatar tsuntsumruawaiti. Tumamtai apu David shir aneas chicharuk: “¡Mefi-boset!” tusa tinaiti.
Tusa tama Mefi-boset chichaak: Amina umirkattsa jui pujajai, tusa tinaiti.
7 Tusa takai David chicharuk: “Ashamrukaipa, amina apan Jonatánkan ane jakuitaj nuna enentaimtusan nina uchiri asaakmin, yamaika wina jearuin apujsattajme, tura wijai ekemsam tuke yutatme. Tura amina apachrumin Saúl ajakua nuna nugken ashi susattajme”, tusa tinaiti.
8 Turasha Mefi-boset ataksha tsuntsumaa chicharuk: “Wika amina inatairmetjai. Tura wika eme anentsarkesha iishtaiyaitjai. Tumau asan ame apuitam imauti yayámka amaitsujai, ¡wika yawa jakau atsumchatia numamtinaitjai!” tusa tinaiti.
9 Tusa timatai Saúlan inatairi ajakun Sibán untsuk chicharuk: “Amina apuram Saúlnau ajakarua nuna, tura nina patainu ajakarua nujaimak yamaika Jonatánka uchirin ashi susajai. 10 Tuma asamtai yamaika ame, amina uchiram aina, tura amina inatairam ainajaimak juna nugke ainanam ninu atin atum ashi takarsatarma. Turakrum árak aina juukrum irumratarma. Turakrumin amina apuram Saúl ajakua nuna patai aina yuartatui. Antsu Saúla tiragke Mefi-bosetka wijai mesanam tuke yutatui”, tusa tinaiti.
Tusa timatai Sibá uchiri quince ajakua nu, tura veinte inatairi ajaku aina nujai, 11 inatai chichaak: “Apuru, ame tame nunaka metek umiktatjai”, tusa tinaiti.
Jonatánkan uchiri wekaichu ajakua nu David timau asa, Jerusalénnum Davidta uchiriya numamtuk Davidjai mesanam tuke yu jakuiti. 12 Mefi-bosetnasha chikichik uchi shikapchich Micaías naartin arujakuiti. Sibá jeen pujuinaka Mefi-bosetnau atinan ashi takarujakaru ainawai. 13 Mefi-bosetka Jerusalénnum pujus apu Davidjai chikichik mesanmag tuke yu jakuiti. Nigka nawe mai chuiru ajakuiti.