3 Tama Natán ayak: “Yuus yainmau asamtai, ame turattsam enentaimmauka metek umikta”, tusa tinaiti.

4 Turasha Yuus Natánkan káshi karanam chicharuk: 5 “Wina umirtin David werim chicharkum”, Yuus chichaak: “Wii pujustin jeanka nigka jeamkashtinaiti”. Tuma asamtai wii pujustin jeanka jeamkashtatui. 6 Wika nina uuntri ainan Egipto nugkanam pujuinan jiiran yaruakan wuwaitaj nuisha jaanch jeanmag pujujakuitjai. Tuma asan yamaiya juisha jaanch jeanmag pujajai. 7 Nina uuntri ainajai wekajakuitaj nuisha chikichik apunkesha, wii pujustin jea cedrojai pegker jeamturkata tusanka tichauwaitjai. 8 David wina umirtina nu ujakum, Yuus chichartamuk:

“Wii Yuus ashi senchirtin asan, ninka oveja ainan kuitamuk pujaun, wii etegkamu Israel shuar ainan apuri amajsauwaitjame. 9 Tura asan ni wekakaisha wika nijai tuke wekaimiajai. Tuma asan nina shuari ainajai maaniakaisha, nina shuari ainanka wii ijitamiajai. Wii ninka shuar eme anentsa iitai ju nugkanam iruna nujai metek amajsauwaitjai 10 Nuiyasha wii etegkamur nita pujusartinan nugka pegkeran umikuitjai. Nu nugkanam apujsaruiti. Nuigka shuar pegkerchau enentaimkau aina, yaunchuk waitkajakarua numamtukka pegkesha waitkascharu ainawai.

11 Atumin ayamrutmaktin apu chichaman iwarin ainan wii etegkan apujsaruitjai. Wii tura asan atumi shuari ainajai maaniakrumincha nepetmakarti tusan wii yaigkuitjarme. Nuiyagka nita shuari ainaka waitkascharu ainawai. Tura ninka agkan pujusti tusan yamai nagkamsan yaigtatjai. Amee weantu ainanmaya tuke apu chikichik atinaiti. Nina uchiri apu artina nuiya jea pegker jeamkamu tuke pujuwa numamtuk wii apu amajsam nukap uwí inamratnaiti. 12 Ni jakamtaisha nina uchiri aishmag aina nuiyan pegkesha nepetmainchau atinan, chikichkinak apu amajsatnaitjai. 13 Nu wii pujustinan jean jeamkatnaiti. Nu apunka ni weantunmayan wii shuar ainan inartinan tuke atinan apu amajsatnaitjai. 14 Wii nina apari atinaitjai, tura ni wina uchir atinaiti. Wina chichamrun metek umiachkaigka, chikichik uun nina uchiri jintintiak suimna numamtuk waittan susatnaitjai. 15 Turasha Saúlan inaisauwaitaj numamtukka ninka pegkesha inaisashtinaitjai. 16 Ni weantu ainanka wii kuitamkan ayamrukartatjai. Ni weantu aina nuiyan chikichkinak wii etegkamu ainan apuri amajsatnaitjai”, tusa Yuus turamui tusam David ujakta tusa Natánkan tinaiti.

17 Yuus timau asa Natán ni antukmaurinka imatiksag Davidtan ashi ujakuiti. 18 Turam David Yuusan ememattasa iruuntai jaanchjai jeamkamu pujamunam wuwaiti. Tuma nui waya nuna aujeak: “Yuusa, wika pegkerchau aig ame pegkernum yaintu asam, apu amajtusuitme”. 19 Nu turutawaitam nuka shir pegker turutawaitme. Tura nu turutawaitiatkum amee weantu ainan pegkernum yaigtinaitjai tusam nuiyasha yamai turutme. Chikichkiksha Yuusa ame pegker aina iwainam imauka atsawai. 20 Yuusa, ame ima shir winaka nekarme. Tuma asaakmin wii amina ujamaina nuka atsawai. 21 Ame wina chichartakum, ame weantu ainanka turatnaitjai tusam turutnaitam nuka, ame wakeruku asam nuna turatin atajai tusam tinaitam nuka wina nekamtikruattsa tinaitme.

22 Yuusa ameka ashi senchirtinaitme. Amea imau chikich Yuuska atsawai, tusa tamau ima ik nekawaitji. Tura ima ameketme Yuusmeka. 23 Ii Israel shuar ainatika ame etegkramu ainaji tumau asar, aminu ainaji. Ame imauka ju nugkanmagka chikichka shuarka atsawai. Ame Egipto nugkanam waitkatai pujuinarin jiikratkinaitme. Chikich shuarka ina yainmakaj jutika yainmamainka atsawai, ima inak Yuuska yainmakuitji. Tura asam yaunchuk wainkachmau aina iwainakam ina shuari aina nepettukam agkanmamtikkartuawaitme. Nu turakum nita yuusrimtai ainajaimak jiiruitme. Turukratam aminu ainatinka eme anentsa iitai amajkartusuitme. 24 Turamu asar Israel shuar ainaka amee shuar tuke artinaiti. Antsu ameka ina Yuusri atinaitme. 25 “Tumatin asam Yuus, wii weantu artina nu pachisam apu atinaiti tusam wina turutam nuka metek umiktin atá. 26 Yuusa, ashi nugkanmaya shuar ainaka amina tuke pachitmasar eme anentramas iirmainak emematramiarti. Tura Israel shuar ainan Yuusriya nuka ashi senchirtinaiti tusa turamiarti. David amina umirtamin ajaku nuu weantunmaya apu artina nuiyan chikichkinak tuke atinan apu amajsatnaiti”, tusa tiarti.

27 Ameka Yuus ashi senchirtinaitme. Ina Yuusriya, ameka ashi senchirtinaitme. Ame wina chichartakum: “Amee weantu ainanmaya tuke apu chikichik atinaiti. Tuma jea pegker jeamkamu asa nukap uwí pujuwa numamtuk, nukap uwí inamratnaiti, tusam nekamtikruawaitme. Nu turuta asaakmin amina inatairam ayatnak, juna pachisan aujsattsan wakerajme. 28 Yuusa, ameka Yuusaitme, ameka nekasa nuke chichauwaitme. Wika amina inatairam aig shir amajtinaitjame tusam turutnaitme. 29 Nu tusam turutin asaakmin, wii weantu artina nuka ame ayamramu asar, tuke pampa pujuartin arti tusam pegkernum chicharkarta. Yuusa ame wina anajmatruawaitam turusag wii weantu ainaka, pegkernum pachisa chichartai atii, tusa David Yuusan tinaiti”.