Apu David Betsabén takasmau
11
Númi yagkurut tsawan jeakaigka, apu aina nita shuari ainajai maani jakaru aina nu tsawan jeawaiti. Tumamtai apu David maaniatarma tusa suntara apurin Joabpan nina suntaari ainajai akupkauwaiti. Nu turam Joab suntar ainajai we amonita ainajai maaniak nepetak yaakat Rabánam jeawaru ainawai. Turasha Davidka Jerusalénnumag juakuiti. 2 Tuma pujus chikichik tsawantin etsa tenta ai David nina peakrin ayamuk tepau nantaki jea tuntupen wakauwaiti. Tuma wekajkama nuwa shir shiram entsanam mak pujaun wainkauwaiti. 3 Tura nina inatairin untsuk chicharuk: “Au nuwa puja ausha yakit iniasam nekaata”, tusa akupkauwaiti.Turam wear inias nekaa tawar, Davidtan chicharainak: “Auka Eliaman nawantri Betsabéyaiti, hitita shuar Uríasan nuweyaiti”, tusar tuina.
4 Takai utitarma tusa inatairi ainan akupturuiti. Turam jukiar itarmatai, David Betsabén kanaruiti. Turam nina jeen waketkinaiti. Betsabéka nantun wainu pujau yama nagkanak ni tunamarmaurin entsa mai pegkermattsa pujaun kanaruiti.
5 Turamu asa Betsabé ajaprukuiti. Tuma Davidtan chichaman akuptak: “Wika ajaprukjai, tusa tinaiti. 6 Turam nuna David antuk, Betsabén aishri Uríasan akupkati tusa Joabpan chichaman akuptukuiti. Turam David pujamunam Uríasan Joab akupkauwaiti. 7 Turamu asa Urías maaniamunam pujau David pujamunam jeawaiti. Tumamtai Joabpan, tura nina suntaari ainajaimak pachis shirak pujuarma, tura amonita ainajai maaniamusha uruk awa”, tusa ashi iniasuiti.
8 Tusa takai ashi ujakuiti. Turam nuna nekaa, jeemin weme nawem nijaram ayamrata, tusa tinaiti.
Tusa tama yama jinaig, juna Urías yuati tusa yutai pegker umikmaun susatarma tusa nina inatairin David akupkauwaiti.
9 Turasha Urías, nina jeenka wetsuk, apu pujusa inamtainam jeen waitiri ainan suntar kuitamin aina pujuinamunam kanaruiti.
10 Tura kashin tsawara ai Uríaska nina jeenka wechayi tusar Davidtan ujakaru ainawai. Turam David nuna nekaa, Urías untsukrum utitarma, tusa tinaiti. Takai untsuk itarmatai David chicharuk: “Wekasauwa tawaitiatkumsha ¿urukamtai amina jeemincha wechamame?” tusa tinaiti.
11 Tusa tama Urías chichaak: “Yuusa chichame umiktin aarmau egkeamu arca jaanchjai aakmakmaunam pujaigka, ashi suntar aina tura wina apur Joabsha maaninak jaanchin aakmarar kanuinaigka wika, wina jearui jean yurumka yuan, tura umutain umaran wina nuwarjaigka kanumaitsujai. Nu turamuka pegkerchauwaiti. Wika nunaka pegkesha tumamaitsujai”, tusa tinaiti.
12 Tusa takai David chicharuk: “Yamaika juig juakta, tumawakmin kashin wetá tusan titajme”, tusa tinaiti.
Tusa tama wakettsuk kashin wetajai tusa Jerusalénnumag juakuiti. 13 Tumamtai yurumak yuami, tura umutaisha umarmi, tusa David ipaawaiti. Nampek nina nuwejai kanarti tusa umutai vino tutain nukap susa anamkauwaiti. Turamsha jeenka wetsuk apu pujusa inamtai jea waitiri ainan kuitamin aina suntar pujuinamunam ataksha kanaruiti.
14 Tumamtai kashin tsawak David papiin aar, suntaran apuri Joab susata tusa Uríasan susa akupkauwaiti. 15 Turam jeaa suntara apurin susauwaiti. Nu papiinum aak: “Maaniktasa weakrumka atumi shuari suntar aina tui ima kakaram iruna nunini Urías emtikatarma. Turarum atumi shuari ainajai igkunia maniamunam atumka waketkurum nigki ikuktarma. Turakrumin ina shuari aina maawarti”, tusa tinaiti.
16 Tu aara akuptukmau asa, Joab maanikartasa yaakat Rabán tentakar, nita shuari suntar kakaram aina irunmaunmani Uríasnaka akupkauwaiti. 17 Suntar aina yaaktan kuitamin aina Joabjai maaniawartasa jinturaru ainawai. Tura maaniamunam Davidtan suntaari apuri ainan ni mamunka maawaru ainawai, turuinak Uríasnasha maawaruiti. 18 Turawarmatai suntara apuri Joab, chichaman etsernun shir akatar David pujamunam akupkauwaiti. 19 Joab chichaman etsernun akupeak chicharuk: “Maaniamu pachisam tumamayi tusam apu ashi ujakta. 20 Turam nuna antuk apu kajek chichaak: ¿Urukamtai yaaktasha ima weamtukrumsha maaniarme? ¿Atumka yaakat tanishmarmaunmag pujusarag kaya ainan nagkimin aina nuka nekatsrumek? 21 Chikichik nuwa yaakat Tabesnumsha Jerubaalan uchirin Abimeleckan yaakat tanishmarmaunam pujusag araka jigkai neketain kayan akagketak nekeg maawaiti. Nuna turawa nu nekau asarum, yaakta tanishrinka shir weamkarmeka maanimain ainatsrume. Tusa turamkaigka ame ayakum: ‘Amina suntaarumin apurin Uríasnasha maawarmayi’ tusam titá”, tusa tinaiti.
22 Tusa tu akattram chichaman etserin wuwaiti. Tuma jeaa Joab timaunka turusag, apu Davidtan ashi ujakuiti. Turam Joab tumattawai tusa tina tumasag David senchi kajekuiti. 23 Tumamtai chichaman etserin apun chicharuk: “Ina shuari ainajai maaniamunam nita nepetkir awakearar nita yaaktari waitirin ejémji. 24 Tumawakrin arcojai flechan nagkimin aina yaakta tanishrin yaki wakar nagkimainak suntar ainan, suntara apuri ainancha ni maamunka maawarmayi. Turuinak Urías hitita shuar amina chichamrumin metek umina nunasha maawarmayi”, tusa tinaiti.
25 Tusa takai chichaman etsereak wekan chicharuk: “Joab nujaigka shir senchi enentaimiak waittsashti, maaniamunmagka tuke anis awai. Turasha senchi kakaar maanikti, shuari ainan nepetkati turak yaaktan ataiti tusa turammayi tusam ujakta”, tusa tinaiti.
26 Uríasa nuwe Betsabé, aishri jakamun antuk nukap tsawan útuk pujusuiti. 27 Turasha Betsabé nina aishri aneamun kajinmatkimtai, Betsabé jukirum itaatarma tusa David nina inatairi aina ishiakuiti. Turam weriar juki ni pujamunam itarmatai nuatkauwaiti. Turam pujus uchin jureruiti. Turasha David tumamun Yuus shir pegkerchau iisuiti.