3 Tama David Jonatánkan chicharuk: Turasha ame wina amikur asam, wina anentu asaakmin wake mesemar enentaimi tusa mantumain akusha nuna pachiska ujatmamaitsui, tusa tinaiti. Tusa tamasha David chichaak: Yuusa naarin pachisan, tura amina naarmincha pachisan tajame wii mantamnatnuka ashi jeawai, tusa tinaiti. 4 Takai Jonatán iniak: Warina turati tusamea wakeram nu pachisam winasha ujatkata nuna umirkatjame, tusa tinaiti.

5 Takai David Jonatánkan chicharuk: Yuus, nantu yamaram taamu nukapek jiistamin ataarma timauwa nuka kashin atatui. Wii nu tsawantin amina apajai iruuntran yurumkan tuke yuwajai. Turasha yamaika tumatsuk ajanam uumkan jimar tsawan pujuttajai, tusa tinaiti. 6 Tura amina apa wina pachitas inimkaigka chicharkum: Chiki chikichik uwítin wina pataar aina Belén matsata nujai iruuntran tagkun maa epeakun Yuusan ememattajai takai uwemamjai tusam titaa tinaiti. 7 Wii taachmataisha pachitsuk inaiyakka kajertachu asa tumattawai. Antsu wii taachmaun waitak kajek pegkerchau chichartakka, nunaka mantuattsa wakera asa titatui, tusa tinaiti. 8 Tuma asamtai wait aneasam wii titatjam nu umirtukta. Wina amikur atá takumin ii yainaikmi tau asar Yuusa emtin chicham umikmaji. Tuma asamtai wina iturchatur akaigka amina apai ejétutsuk amek maantuata, tusa tinaiti.

9 Takai Jonatán nina ayak: ¡Nuka tuka enentaimsaipa! ¡wina apar maantamataj takaigka wii ujaktatjame! tusa tinaiti. 10 Takai David nina iniak: Turasha amina apa ujam wina pachitas chichatta nunasha ya ujatkatta, tusa tinaiti.

11 Takai Jonatán ayak: Ijai ajanam wemi ai ujaktajme tusa mai wearuiti. 12 Tura nui Jonatán Davidtan chicharuk: Israel shuar aina umirtai Yuus antai tajai. Kashin, tura nu kashin tsawaknaksha wina apar waritak chichakat nuna nekatjai. Tura ni maatjai tutsuk pegkernum chichakaigka chichaman ujaktatjame. 13 Antsu wina apar maantamataj taun wii amina ujatsuk inaiyakaigka Yuus waittan surusti. ¡Yuus wina aparun yaijakua turusag amincha yainmakti! 14 Tura wii iwáku pujaigka Yuus wait anentramak amina yainma jakua turusmek winasha wait anentrurtin atá. Tura wii jakamtaisha, 15-16 Yuus amina shuarum ainan ashi ijinamtaisha, wina uchir aina tuke wait anentratin atá, tusa Jonatán Davidjai tu chichaman umikaruiti. 17 Tuma asa Jonatán nina iyashin anemaina numamtuk anea asa Davidtan ii chicham umikmaj nuka nunisag atii, tusa tinaiti.

18 Nuna tura umik Jonatán Davidtan chicharuk: Nantu yamaram taakai jiistamrutaiya nuka kashinaiti. Tura ame ekeemsa yutaiya nuka agkan atatui, tumakai nusha urukakit, tusa turamiartatui. 19 Tres tsawan tatsuk megkaka akumin nusha urukamki tusa senchi enentaimiartatui. Tuma asamtai yaunchuk ame uumkam pujujakuitam nui wetá, tumam kaya uun irunmaunam uumkam pujusta. 20 Ame uumka pujamunmani shirash flecha ekenkam weti tusan tresa imajnia flechan ekenkan akupkattajai. 21 Turan wina inatairun chicharkun: Ju yantamnum flechan ekenkamaj nu eakam utita tusa takai antukam, iturchatka atsuttawapi tusam shir aneasam jinkita, nunaka umiktin asan ¡Yuus tuke pujuwa nu pujawai! tusa tinaiti. 22 Turasha wii nina chicharkun: Flecha imanai nagkimamu werim iista tusa takaigka Yuus weti tusa turutua tusam tsekegta, tusa tinaiti. 23 Ii jimarti chicham umikaj tumasag Yuus aminisha tura winisha pujusti, tusa tinaiti.

24 Jonatán nina apari inatairi waketkimtai Davidcha kaya uun irunmaunam uumkattsa wuwaiti. Nui umak pujai jiisat jeamtai apu yurumkan yuattsa jeaa ekemsauwaiti. 25 Tuke ekeemsa yutairin tanisha tuntupen ekeemsauwaiti. Tumakai Jonatán nina aparijai iinias ekeemsauwaiti. Antsu Abner Saúljai tsanias ekemsauwaiti. Tura Davidta ekeemtairi agkan juakuiti. 26 Nu tsawanta nuigka Saúl nigki enentaimas: Davidka shuar jakaun achiku asa aniatsuash tu enentaimu asa pachitsuk inaisauwaiti. 27 Tura kashin jiisat tsawaarmatai Saúl yurumkan yuattsa ekeemsauwaiti. Tuma nuisha Davidtan ekeemtairi agkan au tuma asamtai, Saúl uchirin Jonatánkan iniak: “¿Davidcha urukamtai yamaisha tachaya?” tusa tinaiti. 28 Tutai Jonatán ayak: David Belén wetajai, wait aneasam tsawan surusta tusa seatkai ayu tusan timajai. 29 Nuna tusa seatuk chichartak: Wina pataar aina tagku maar epeakur Yuus emematmi tuina asarmatai, yatsur untsurkamtai Belén weajai yatsur emkau ainajai jiistamattsa weajai takai wetá timajai. Tuma asa jutijai yurumkan iruunar yuatsui, tusa tinaiti.

30 Takai Saúl, Jonatánkan shir senchi kajerak chicharuk: ¡Nuwa pegkerchau uchiriya! ¿Isaí uchiri David amina amikrumea nuna wii nekatsjak? ame apu amainan David apu jasmatai ameka nukujaigki natsanmain juaktatme. 31 David iwáku pujakaigka ameka israelita aina apurigka jaschattame. ¡Wári weme jukim jui itaata, turawakmin maami! tusa tinaiti. 32 Takai Jonatán aparin chicharuk: Turasha ¿Davidcha wari pegkerchauna takasu asamtaiya maattsamsha ima wakerame? tusa tinaiti.

33 Takai Saúl Jonatánkan kajerak aitsuk nagkin juki maatjai tusa wajaknaiti. Tumamtai Jonatán wina aparka Davidnaka nekas maattsampa wakerawa tu enentaimsauwaiti. 34 Tura Jonatán nina apari Davidtan maatjai tinu asamtai kajek wake mesemar nekapeak mesanmaya yurumkan yutsuk jiinki ikuknaiti. 35 Tuma Jonatán kashin tsawak Davidjai igkuniaktasa chichasu asa Jonatán nina inatairijai David uumak pujamunam wuwaiti. 36 Tura jea uchin chicharuk: Flecha ainan ekenkaj nu tsekenki werim eakta, tusa tinaiti. Takai inataisha flecha ainan eak tsekai, tumai Jonatán inatai weamu nuna nagkaiki jeashat flecha ainan nagkimu. 37 Tura flecha nagkimamunam inatai jeamtai, Jonatán inatairin senchi kakaar untsuak: ¡Flecha nagkimamaj nuka ame wajam nuna nagkaiki awai! 38 Tura ataksha Jonatán inatain kakaar untsuak: ¡Ishichkisha wajatsuk tsekegkim wári taata! tusa tinaiti. Takai inatai flechan juki nina apuri Jonatánkan itarawaiti.

39 Turasha Jonatán, Davidtan tu ujamunka uchika nekachuiti. Inataigka wina apur nagkimta unuimartaspa aitkawa tu enentaimta. Nu turamunka ima Jonatán Davidjai nekajakuiti. 40 Nuna nutika Jonatán umik, nina inatairin nagkimtai ainan jea ejéta tusa susauwaiti. 41 Tura susam inatai waketkimtai, David kaya pujamunmaya jiinkinaiti. Tuma Jonatánkan eme anentas iiyak: Nugkan antiastatuk tresa tsuntsumruawaiti. Tuma nui pagkunaikar mai útiaruiti. Tura Davidka Jonatánka nagkasau senchi útnaiti.

42 Tuma Jonatán Davidtan chicharuk: “Ika Yuusa naari pachisar chichamka umikmaji. Tuma asamtai iturchat enentaimtsuk shir aneasam wetá, Yuus wina tura amina uchiram weantu aina nunasha kuitamkatin atii”, tusa tinaiti.

Timatai David yaja wuwaiti, tura Jonatán nina jeen waketkinaiti.