Saúl amonita shuar ainan nepetkamu
11
Shuar Nahas naartin amonita ainan apuri, Galaad nugkanam yaakat Jabésnumia shuar ainajai maaniattsa uminas suntar ainan yaruak wuwaiti. Nuna nekawar nuiya shuar aina Nahasan chichaman akuptuinak: ¡Jutijaigka maaniawaipa, nuka tumatsuk chicham umikmi, tura amina inatairam armi taji! tusa tuina. 2 Turasha Nahas nitan ayak: Chicham umikmi ju enentaijai. Wii atumin untsur jiya nuna ashi ukuitratjarme. Turam israelita aina wishikramainakai natsaama matsamtarma, tusa tinaiti. 3 Takai Jabésnumia apu aina chichainak: Nuigka siete tsawan nakamsata, ashi israelita aina matsatmaunam ina yainmamain atsuash tusan chichaman akupkatjai. Tura nekaan ina yainmamain atsakaigka ame tame nuke uminkati, tusa tinaiti.4 Tusar chichaman etserin ainan yaakat Guilbeánam Saúl pujamunam ishiakuiti. Tura jeawar Nahas timaunka imatiksag ashi ujakaruiti. Nu tusa etsermaun antukar senchi útiaruiti. 5 Nu tumainai Saúl ajarinia vaca ainan yaruak winajkama útainan antuk inimuk: ¿Urukamtai shuar ainasha útainawa? takai, Jabésnumia shuar aina kaunkar chichaman etserkarmatai nuna antukar útainawai tusa ujakaruiti. 6 Tusa tamaun antak Saúl wajaun, Yuusa Wakaní taruawaiti. Turam shir senchi kajekuiti.
7 Tuma jimar vacan achik juki tsupik maawaiti. Tura tsupir shuar chichaman etserkartin ainan ju ashi israelita aina inaktusarta tusa akateak: Shuar aina wijai, tura Samueljaimak iruunar atuk maanitan nakitainaka nita tagkuri ainasha jutika tsupira mantam artatui, tusa tinaiti. Takai antukar shir senchi ashamkaruiti. Tumaina asar chikichik shuar amaina numamtuk Saúljai atukartasa jiintraruiti. 8 Tuma shiakar yaakat Bezec iruuntraruiti. Tumamtai Saúl Israel shuar ainan trescientos mil shuaran irumrauwaiti. Tura Judá shuar ainanka treinta mil shuar iruumrauwaiti. 9 Tuma nui Saúl chichaman etserin ainan kaunkarun chicharuk: Waketkirum Jabésnumia shuar aina ujakrum kashin etsa tutupnira ai, nita ainan ayamrakun maaniattaji tusa tawai titá tinaiti. Tutai jeawar Jabésnumia shuar ainan ashi ujakaruiti. Nu tusa ujam antukar shir aneasaruiti. 10 Tura Jabésnumia chichaman etserin aina nuna Nahas ujaktarum tusa chichaman akuptuinak: Kashin ni wakeramun umikti tusar amini kaunattaji, tusa tiaruiti.
11 Kashin tsawak Saúl tresa imani suntar ainan akanar iruumrauwaiti. Tura shir tsawatsu aig ishiintukar nita shuari aina matsatmaunam jeawaruiti. Tumawar amonita shuar ainan mai mainakua etsan tutupin amajsaru ainawai. Tura ni iwáku juaru ainaka chiki chikichik tsekearar megkaararu ainawai.
12 Tuma nui israelita ainanmaya shuar Samuelan chicharainak: ¡Saúlka ina apurigka amaitsui tusa tiarma nuka ii kajegmi! tuina. Tusar nu shuarka ii kajegmi tusa seamaina. 13 Turasha Saúl chichaak: Yuus Israel shuar ainan ayamruku asamtai ju tsawanta juigka chikichik shuarkesha mantamnashtatui, tusa tinaiti. 14 Takai Samuel shuar ainan ashi chicharuk: Saúl apu jas puja nu yaakat Guilgalnum jear Yuusa emtin Saúl yamaika ina apuriyaiti tusar iwainakmi. Tuma asamtai shiakarmi, tusa tinaiti. 15 Takai shuar ainaka yaakat Guilgalnum shiakaruiti. Tumawar Yuus ememattasa iruuntai jeanam Saúlan apu amajsar chichainak: Saúlaiti ina apurigka, tusar tuina. Yuus ina tunaurin tsagkurtamratji tusar Yuusan eme anentas iiyainak tagku ainan maa epenak nuna namagken ajamnaisaru ainawai. Tura Saúl israelita ainajai iruunar shir aneasuiti.