3 Nu nagkaiki weakrum yaakat Tabornum chikichik númi shir uun wajamunam tres shuar yaakat Betelnum Yuusan ememattasa wenak, chikichka tres chivon juki, chikichka tres pankan juki, tura chikichka nuap aparmaunam vinon juki wena igkugtatrume. 4 Tura amikmatmawar jimar pankan amainakaigka nakittsuk jukitarma. 5 Tuma weakrum Yuusa naintri tutainam jeastatuk filisteo suntar aina matsatmaunam jeattarme. Nu yaaktanam jeajkamarum shuar kantamainak guitarra awataina, pandero awataina, arpan awataina, flautan umpuina, tura nuna ukurin Yuus ememattasa iruuntai jeanmaya Yuusa chichamen etserkar mai aka jaina wainkattarme. 6 Tumamin Yuusa Wakaní amini pujustatui. Tumamtai Yuusa chichamen etserin chikich aina nujai metek amesha chicharkartittame. Nui nagkamas amina pujutrum yapajinattawai. 7 Wii tajam nu metek wainkumka ame pegkera nu takastasa wakerakminka, Yuus aminka yainmaktatui. 8 Tura ame emkam yaakat Guilgalnum jeam siete tsawan nakaru pujamin wii taattajai. Tuman agkan pujutnum yainmakti tusan, Yuusan eme anentsa iiyakun tagkun maa epeakun ninu atii tusa anajmatamu aina nunasha epeatjai. Turan nui ame uruk takastamek nuna ujaktatjame, tusa tinaiti.

9 Saúl Samuelan chichas wuwaiti. Tu Yuus Saúlan pujutin yapajtauwaiti. Samuel, Saúlan tina nuka imanisag nu tsawantinig uminkauwaiti. 10 Tuma Saúl nina inatairijai Yuus nain tutainam chichamen etserin aina matsatmaunam jeawaruiti. Nui jeamunam Yuusa chichamen etserin aina Saúlan igkugkaruiti. Tumai Yuusa Wakaní Saúlan pujursauwaiti. Turam nisha Yuusa chichamen etserin ainajai metek jasuiti. 11 Turasha yaunchuk Saúlan wainin nitak pempentunaiki chichainak: ¿Quisa uchiri Saúl Yuusa chichamen etserchauwa nusha urukamtai yamaisha etsereawa? ¡Saúl Yuusa chichamen etserin jasai! tusar tuina. 12 Tuinakai nuiya chikichik shuar chichaak: Ima Yuusaiti shuaran nina chichamen etserin amajnuka, Saúlsha yamaika Yuusa chichamen etserin jasai tusa timau asauwaiti.

13 Saúl nuna tuma nagkanak nui nina inatairijai Yuus nain tutainam Yuusa chichamen etserin aina jiintrarua nui wearuiti. 14 Tuma nui waketki jeawarmatai nina apari yachi Saúlan nina inatairijai iniak: ¿Tuimpa wuwaitrume? tusa tinaiti. Tutai Saúl ayak: Ika burro aina megkarau asamtai eaktasar wemaji. Tuma wainkachar Samuel pujamunam wemaji, tusa tinaiti. 15 Takai Saúla apari yachi nina ayak: ¿Wait aneasam winasha ujatkata Samuelsha wari turamma? tusa tinaiti. 16 Takai Saúl nina apari yachin ayak: Burro aina megkaaraunka wainkarai tusa ujatmakmaji tinaiti. Turasha Samuel nina chicharuk: Ame israelita ainan apuri atatme tusa tina nunaka ujakchauwaiti.

17 Tuma Samuel israelita ainan chicharuk yaakat Mizpánam jear ina Yuusri eme anentsa iiyakur aujsarmi, tusa tinaiti. Timau asar yaakat Mizpánam ashi iruuntraruiti. 18 Tumawarmatai chicharuk: Israel shuar ainan Yuusriya nu chichaak: Wii nita uuntri ainan egiptonmaya aina waitkam matsatutirmin jiiran agkanmamtikawaru ainajai tusa tawai tinaiti. 19 Turasha atum ashi iturchatnumsha nepettuka jiirmaitiatrum winaka umirtut nakitakrum iishaa apurtin armi tusarum tarume. Atum tarum nunaka imatiksanak umiktatjai. Turasha wina emtin agkan agkan atum weantu aina iruumratarma, tusa Yuus tawai tinaiti.

20 Tusa tama ashi shuar ainan untsuk chiki chikichik tribu ainan Samuel irumrauwaiti. Tura yana kayarig jinkit tusa Samuel tinaiti. Turamunam Benjamín weantunmaya kayari jinkinaiti. 21 Tumamtai Benjamín weantu aina nuiyan Matri pataiyan Yuus etegkawaiti. Tumamtai yáki apusha atii tusa tuina. Tuinakai Yuus apuka Quisa uchiri Saúl atatui, tusa tinaiti. Takai Saúlan eainaksha wainkacharuiti. 22 Tuma asa Saúl iwainturkata tusa Yuusan aujsaruiti. Tusa tama Yuus ayak: Saúlka warí aina iruumramua nui umak pujawai, tusa tinaiti.

23 Takai umak pujaun eaktasa ishiintukar wainkaruiti. Turam israelita aina iruunar matsatmaunam wuwaiti. Tuma jeamtai iiyam chikich aina nagkasau shir nayaun wainkaruiti. 24 Tura Samuel ashi shuar ainan irumar chicharuk: Yuus atumi apuri atinan etegka nu ashi iistarma, niya imau amainka chikich israelitaka atsawai tusa tinaiti. Tusa takai shir anenak, ina apuri jas nukap uwí inamrati, tusar tiaruiti. 25 Tuinakai Samuel, Saúl inamratnun pachis papiinum ashi aar, Yuus ememattasa iruuntai jeanam awayaa egkesuiti. Nuna tura israelita ainan jeemin wakettratarma tusa ishiakuiti.

26 Turamtai Saúlsha nina jeen yaakat Guibeánam wetasa pujaun Yuus nina maaniamunam ujumak shuar aina uyuuntsatnun etegtuawaiti. 27 Saúl wematai ujumak shuar pegkerchau enentaimkau aina chichainak: Ju shuarka inka ayamrutmamaitsuji tusa eme anentas iiyainachu asar chikichik warínkisha pegke susacharuiti. Turamsha Saúlka pegkesha pachikchauwaiti.