Débora Baracjai kantamamu
5
Nu tsawantin Débora Baracjai kantamainak:2 “Israel shuar ainarum nuiya maaniktasa wakerincha irunui,
tura nuiyasha nita apuri aina maaniatarma
tusa tama nakittsuk ayu tusa tinusha irunui,
tuma asamtai Yuus ememattarma.
3 ¡Apu ainata,
wika Yuusan kantamruattajai.
Israel shuar ainan Yuusri nekasa nuna pachisan
wii kantamkai antuktarma!
4 Wina Yuusru,
Edom nugkanam Seír ajakua nui
ame kuitamkartusakmin yujayaj
nuigka urmiayi,
tura yumisha senchi yutimiayi.
5 Yuusa emtin nain aina urkaru ainawai.
Sinaí naintri Israel shuar ainan
Yuusriya nuna emtin
senchi urkauwaiti.
6 Anata uchiri Samgar,
tura Jael pujujakarua nu tsawantinka
ashammain asamtai,
jinta ainanmagka
wekatsuk menaantar
jintachunmani yuja jakaru ainawai.
7 Tumaina asar
Israel shuar ainaka
kanarar chiki chikichik
pujuina asar kajinmatkimu
apurtinchau pujuinan
chikichik nuwa Débora naartin nina uchirin yaimaina
numamtuk yaigtasa werinaiti.
8 Ashi israelita ainaka
yuusrimtai najanamu ainan
emematiaruiti.
Tumaina asarmatai
nitajai maaniawarti tusam nita
shuari aina ishitkauwaiti.
Turasha nitaka cuarenta mil shuar nagkirtin,
tura ayamrumatairi ainasha aruinamaitiat
ashamkartuina asar maanimain nekapcharmayi.
9 Ujumak shuar wári aina maaniawaru asamtai,
Israel shuar aina apurin shir anentainajai,
tura Yuusru amincha maaketi tajame.
10 Shuar wiakach
burro nuwa pujunam ekeemsarum
yujau ainatiram,
tura shuar kuitrinchau
nawek wekain ainatirmesha
nepetmakarti tusa Yuus yainmaku asamtai,
ni kantamruatarma.
11 ¡Tagku kuitamin ainatirmesha,
pegke atsurmau ainatirmesha
yaaktanam pujuchu ainatirmesha,
Yuus Israel shuar ainan
ayamruk agkanmamtika asamtai,
platillo aina awateakrum
Yuus pachisrum etserkatarma!
12 ¡Débora mijaakaipa!
¡Kakaram jasta!
Tumakum kantamata.
¡Barac Abinoaman uchiriya,
amesha mijamtsuk,
maaniaku achirmau
aina nu yaruakam egkeawarta!”
tu kantamu.
13 Tu kantama inagnakmatai
israelita apuri ainaka wearu ainawai:
Yuusnau ainaka
nita shuari kakaram ainajai
maaniawartasa nijai wearu ainawai.
14 Efraín weantu aina
Amalec shuar ainan nugken pujuina
nitasha shiakaru ainawai.
Tura Benjamín weantu ainasha
nuna ukurin nitasha shiakaru ainawai.
Tura Maquir weantu ainanmayasha
apu aina shiakaru ainawai.
Tura Zabulón weantu ainanmayasha
apu aina shiakaru ainawai.
15 Nuiyasha Isacar weantu apu aina
Débora weakai uyuntsaru ainawai.
Tura Isacar weantu aina Barac weakai
uyuntsaru ainawai.
Antsu Rubén weantu ainaka,
16 nita ovejari ainan senchi uyumaina asar
wecharu ainawai.
17 Galaad weantu ainaka
entsa Jordán amain juakaru ainawai.
Antsu Dan weantu ainaka, Aser weantu ainajai
nayantsa pakarin nita lanchari ainan kuitamuk
juakaru ainawai.
18 Antsu Zabulón
weantu aina,
Neftalí weantu ainajai
maaninak ashammainnum yujasaru
ainawai.
19 Tura Canaánnumia apu aina
yaakat Taanac kaunawar
yaakat Mequido entsanam jeastatuk a nui
maaniawaru ainawai.
Turasha nepetmakcharu asar
chikichik warínkisha jutsuk wakettraru ainawai.
20 Israelita aina
Sísarajai maaninakka
nayaimpinam
ya iruna nujaimaktsuk iruunar maaniatai tumain
maaniawaru ainawai.
21 Nita shuari ainanka
entsa Quisónnum katinan,
yumi yutuk nujagkrak
ejekkauwaiti.
¡Débora, amina shuarum aina nu nepetkam ikmakchamnau amajsattame!
22 Sísara caballori ainaka
ashamkartukar
tsekenak senchi tuturtuina.
23 Nayaimpinmaya shuar chichaak:
“Yaakat Meroz
tura shuar nui pujuinajaimak waittsarti tajai”.
Nitaka kakaram ainayat israelita aina
nita shuari kakaram ainajai maaninakai
Yuus yaigkua nui
wecharu asarmatai tinaiti.
24 Nuwa Jael naartinan
quenita shuar Heber nuatkamua
nuka chikich nuwa
ainan nagkasau
pegkernum chichartai atinaiti.
Nuiyasha ni pujamunam
nuwa aina pujuina
nuna nagkasau
shir anentam atinaiti.
25 Sísara kitamak
entsa surusta
umartajai tinaiti.
Tusa takai Jael
leche kutan pinignum
yara juki susauwaiti.
26 Tura nuna
umar tepes
kanaruiti.
Tumamtai númi atsakamun juki
martillojai mishanam iju
nugkajai irumar achiawaiti.
27 Turamu asa Sísara kaka
kakakua nuig jakauwaiti.
28 Sísara nukuri
uchiri tatsuk megkakamtai
kuntuts enentaimuk,
iimsatin jeanam
chigkaimu amaunam
winatsuash tusa iiya,
tuma atsakai chichaak:
“¿Wina uchirsha
urukamtaig ima taatsua?
¿Wina uchiru carretari maaniaku
wekatai arma nusha
urukamtai ima megkaaraya?” tusa tinaiti.
29 Tusa takai Sísara inatairi
nuwa yacha ainasha chichaina,
tumainakai Sísara nukurisha nunak
awena chichaak:
30 “Maaniawar nepetmakartsuk,
suntar aina nuwan achirar chiki chikichik
nuna turuinachkusha jimar jimarkesha nuwan
akankar juinaktsuk megkararati,
tura jaanch pegker aatkamu ainan,
chikichik jaanchin, nuiya jimar jaanchin aatka aparmau ainan
shuar maaniamunam nepetmaku suwenam anugtai ainan
yarumainaktsuk megkararati”, tusa tuina.
31 Débora Baracjai kantamainak:
“Yuusa,
amina shuarum
aina nuka
ame ashi ijinata.
Antsu amina
anenmaina nuka
etsa tutupnir etsanna
iman atii”, tu kantamawaru ainawai.
Nu maanikaru aina nui nagkamsagka israelita aina maanitsuk cuarenta uwí agkan shir pujusaru ainawai.