Débora Baracjai jimartuk Sísaran nepetkamu
4
Ehud jakamtai pujusar israelita aina Yuusan umirtsuk ataksha tunaun takaina. 2 Tumainakai Jabín Canaánnumia ainan apuri yaakat Hasornum inamajakua nu nitan nepetak ijinati tusa Yuus inaisauwaiti. Jabínkan suntaari ainan apurigka Sísara naartin ajakuiti. Nuka Haróset-goím tutainam pujujakuiti. 3 Apu Jabínnau novecientos carro hierrojai najankamu aina arujakuiti. Nu apu, veinte uwí israelita ainan inak shir senchi waitkajakuiti. Imatramu asar Yuusa ame yaigkratkata tusar aujsaru ainawai.4 Nu tsawantin Israel shuar ainanam chichaman iwarnuka shuar Labidot ajakua nuna nuwe Yuusa chichamen etserin Débora naartin pujujakuiti. 5 Déboraka kampanak wakenmarin ekemajakuiti. Tumau asamtai Débora kampankari tujakaru ainawai. Nuka Efraínka nugken Betelnum tumajakuiti. Nui israelita aina chichaman iwarturati tusa wujakaruiti.
6 Abinoaman uchiri Barac Neftalí weantu ainan nugken yaakat Quedesnum pujaun, ujaka ikutarma tusa chikichik tsawantin Débora shuaran akuptukuiti. Turam ujakam taamtai chicharuk: Israel shuar aina nu ememattai Yuus chichartamuk: “Nain Tabor tutaiya nui weti. Tuma nui jeaa Neftalí weantu ainan, tura Sabulón weantu ainajai ipaa diez mil shuaran irumrati turamui. 7 Tura Jabínka suntaari apuri Sísara atumjai maaniktasa suntar ainajai carro ainanam entsa Quisónnum kaunkarti titatjai. Tumawarmatai atum nepetkatarma tusan wii atumin inaitustatjarme”, tusa Yuus turamui tinaiti.
8 Tusa tama Barac chichaak: “Ame wijai weakminka wisha wetatjai. Antsu ame wii weamunam winachkuminka wisha wechattajai”, tusa tinaiti.
9 Tusa tama Débora chichaak: “Wisha ame weakminka winittajai”, tusa tinaiti.
“Turasha emtikan tajame, ame Sísara maaniamunam nepetkattam nuka ima amekka turashtatme, nu turatnunka Yuus emtika wina nekamtikruayi”, tusa tinaiti.
Nuna tusa nui Débora Baracjai Quedesnum wearuiti. 10 Tuma nui jeaa Barac Zabulón weantu ainan, Neftalí weantu ainajai diez mil shuaran irumrauwaiti. Turamtai Déborasha nitajai wuwaiti. 11 Moisésa weari Hobab ajakua nu weantu quenita shuar ajakarua nuiya chikichik shuar Heber naartin nigki kanaki yaakat Quedes jeattak nugka Saanaim númi encina tutai irunmaunam pujujakuiti. 12 Barac, nina suntaari ainajai nain Tabornum wakau tamaun Sísara nekawaiti. 13 Tuma carro hierrojai najankamu ainan novecientos irumar, tura suntaari ainancha ashi yaruak, yaakat Haróset-goímnumia jiinkiar we wenakua entsa Quisónnum jeawaruiti. 14 Tumawarmatai Débora Baracan chicharuk: “Emkata, Yuus yamai Sísarajai maaniak nepetmakti tusa yainmaktatui”, tusa tinaiti.
Tutai Barac Tabornum pujau diez mil suntaran yaruak wuwaiti. 15 Tumawar igkuniaka maaniamunam Sísara carreteri ainan Yuus tumati timau asa mesekuiti. Nu tumainakai suntar ainasha sapijmakaruiti. Tumaina asar suntar aina tsekenakai Sísarasha carreterinia akaiki tsekegnaiti. 16 Tumawarmatai Barac nina suntaarijai, patatuk Haróset-goímnum ijinawaiti. Nu tsawantin maaniawaru aina nuigka Sísara suntaari ainaka ashi ijinamu asa, chikichik suntarkesha iwákuka juakchauwaiti.
17 Hasornumia apu Jabín, ajakua nuka Heber weantu ainajaigka chichaman epegtuniawar agkan pujujakaruiti. Tuma asarmatai Sísara tsekegki Hebera nuwe Jael pujamunam jeawaiti. 18 Tumamtai Jael jintuki igkug chicharuk: “Wina apuru, sapijmatsuk wina jearui wayam pujusta”, tusa tinaiti. Tusa tama jeanam wayamtai frazadajai nukuk inaisauwaiti. 19 Nui pujus Sísara senchi kitamak Jaelan chicharuk: Kitamajai entsa shikika surusta, tusa tinaiti. Tutai entsan shikik susam umaruiti, tumamtai ataksha nukuk inaisauwaiti. 20 Turam Sísara nuna nuwan chicharuk: “Ameka jea waitirinig aa pujusta. Shuar taa ininmak jui shuar waya pujatsuak tusa takaisha atsaa tusam titá”, tusa tinaiti.
21 Nuna tusa Sísara shir senchi pimpikin asa senchi kanaruiti. Tumamtai Jael martillon juki, tura númi aak shutuktai atsakamun juki yaitamtaik jeari kuish nugkani iju nugkajai irumar achia maawaiti. Sísaraka tu jakauwaiti. 22 Barac, Sísaran patatuki Jael pujamunam jeawaiti. Tuman Jael jintuki chicharuk: “Taata, ame eakum wekam nuna inaktustajme”, tusa tinaiti.
Tutai Barac aaknum waya iiyajkama, númi aak shutuktai atsakamujai kuish nagkatamunam iju nugkajai achiamu jaka tepaun wainkauwaiti.