Zər Gam tə Pasənda Dəbə nda nja Nyu'unda Likatəkatə nə nda
6
Kəl ngə ya la'a Zər Gam nda tə pasənda zhang ku huɗa dəbə pampam məɗəfə inda, kəl ngə ya ngatə zhang ku huɗa sə pipi fwaɗəu inda tə ɓwanya na kurakəu wi dəradlər par, cha na, “Anda!” 2 Nda ya ndzamari ngə ya la'a taku pərtəu ana ndər dlənyi taɓəna laga. Ngə nja mbanda nyi kər na pahuɗə kər nə təlkur, ngə cha biya wi ndər kura ku pa ga cha ɓəla tsakətə kura.3 Nda Zər Gam tə pasənda mətləkunya dəbə nda, ya ngatə mətləkunya sə pipi nda tə na, “Anda!” 4 Ngə vanya taku dəzə tə biya, ngə nja nənyi gyalkur nə ndər dlə taku nda ka ga cha hənda piyarɗufəu tə dunəya, ga nja kuɗənda kərnənda. Ngə nja nənyi katsakər dəgaləu.
5 Manda Zər Gam nda tə pasənda makərkunya dəbə nda, ngə ya ngatə makərkunya sə pipi nda na, “Anda!” Ngə ya ndzamari, kəl jan taku kyakyar ta'iu! Ndər dlə taku nda tabəna sər dəkə tədəɓəkura sə ku cha cha. 6 Kəl ngə ya ngatə sə wi kurakə ku huɗa sə pipi fwaɗə inda, kwa na, “Tasau zhang nə alkama nə kwaba nda ndər mər tlər wazəba kwa uya ku ɓupəchi, ana tasau makərəu nə uhi nə kwaba nda ndər mər tlər wazəba kwa uya ku ɓupəchi, kəl ja, ngwa ka da ɗahurnda mal ana ɓitir anap wa!”
7 Nda cha pasənda fwaɗəkunya dəbə nda, kəl ya ngatə fwaɗəkunya sə pipi nda tə na, “Anda!” 8 Nda ya ndzamari, kəl jan taku na dza cha ɗəzəɗəzənyi ta'i ma ɗa! Tləmər ndər dlə taku nda nacha ngə tah, ana mbwar ngya njikə mambəl kwa nəu nyi kundəlkunya. Nja nənda gyalkur kuɗənda zhang ku fwaɗəu nə njir dunəya, ana katsakər, huɓwa, shiləka, ana kum takəu.
9 Nda cha pasənda Tufkunya dəbə nda, ngə ya la'a mambəl nji'inda nja kuɗənda aka ɓwanya Hyel, ana aka jiri nda nda ta'i təkəri, a da kiɗa dzəgana hatəmachi. 10 Nda nga na kurakə dzəgam dzəgam nda na, “Tlakə Ndər Gyalkur, ndə karti, ndər jiri, kəl sakamanə ko mərtə nyi nəuma nə njir dunəya ana ka kisəkur mashi kəea?” 11 Kəl ngə nja nənyi ləkutə pərtəu nə kala ndə ku huɗa nda, ngə nja nar nda ənda nda səkar nə bəji kushiu, kəl bəji nda ɗangkura kuvanda mavi'i ana ka zamən nda nda njo kuɗənda wi nəkənda nga tə nyabiyadza.
12 Yo ndzama, nda cha pasənda kwakunya dəbə nda. Kəl ngə hə'i tə dzədzi ual'ualəu. Pəchi tə gwa ku kutlə kəl tuɗumkura vi, hya tsəu tə sha dəzə wi mashi, 13 kəl ngə sasəlga i'i tə pəpə səya hu'i, wi ngə tə yayar kanda kwa pəpə ma gyang tə fi 'ual'ualəu. 14 Huɗamələm tə pəɗənda dzə wi ngə njo pəɗə buchi,a ya nja hənda kala məa ana hə'i nda ɓiti tə ɓandə tə mbwar ngya kənda.
15 Kəl ngə nji təltəl nda tə dunəya, njir gəla nji, njirawawa'a, njir gəna, kala mava ana kala dimur ndəu, kwa mbu ku tləl ana ku lya məa. 16 Nda kwa na nə məa ana hangu, “Dlama səya kəra ea hya mbunda ea tsa huɗəma ndə nda tə ngya ku dzəga təlkur, ana tsa huɗətlar Zər Gam na! 17 Aka dəgalər pəchir huɗətla kənda shili ti, ya wa kwa nau ta ea?”