Tangərmar Kainau
Yohana
Ɓwanyar Pi
1
Ea kwa tsəfə nə hi təkəra ɓwanyar pi, ndə nda tangngə cha fwatə ku ghəyanyi, nda ea la'a na lya ea, ea ndzama ya tsəkar tə ea na cha ea. 2 Pi nda tə chabiyadza, a la'atə ea ga ndər təkəri, ea bəzə pi nda ba'anawa nə hi, nda ɗəɗəm tsa'a na Ada cha, nda tə chabiyadzə nə ea. 3 Sənda ea la'a ga ngati, eo bəzə nə hi tsəu, aka ga hya daɓətə kər ka ea, təwa ənga məno daɓətə kər ka Ada ana Zər nyi Yesu Kəristi. 4 Ea kwa tsəfə səna, aka ga hirgyaɗi kəea nyabiyadza.Ngya ku Vimbəlmbəla
5 Nənnə ngə mafakə nda ea ngatə tsa cha ga bəzəya hi, Hyel ngə vimbəlmbəla, ya kutlə da ku cha pa'a wa. 6 Ma ea na ənda ku daɓəkər ea kə'i cha, ya tsə'uta ea kwa ngya ku kutla, gəzhi ngə eo tla, ya jiri da ku ea wa. 7 Kəl ja, ma məna ngya ku vimbəlmbəla, wi ngə cha ku vimbəlmbəl nga, məno ɗa ka njir daɓəkər, mashi Yesu zər nyi kwa chinda mən tsa dəhə səpəla'a kəmən.
8 Ma məna na a səpəla'a nda tsamən wa, kər ngə məna kwa sha nə kərnəmən, ya jiri da ku mən wa. 9 Ma məna dəkəbiya səpəla'a kəmən, na cha ndər jiri cha, ndər nyabiya sənda cha kwa pəa. Cho far na dəhə səpəla'a kəmən, ya cho chinda dəhə tar tsa'atsa'akur kəmən. 10 Ma məna na a da mən na səpəla'a wa, a fiya nyi tə mən ka ndər tla gəzhi, ya ɓwanya nyi da ku ɗufwa mən wa.