3 Ma məna ɓəlatə gadlagadla Hyel, a chartə ənda kwa zəndə nyi mən. 4 Ma dəhə ndə nda na kwa zəndə nyi cha, ya a da cha ɓəlatə gadlagadla nyi wa, gəzhi ngə cha kwa tla ya jiri da ku cha wa. 5 Kəl ja, ma dəhə ndə nda ɓəlatə ɓwanya nyi, jiri, nyidar Hyel nyabiya tə dzə ku cha. Təwa ənga məno zəndə ənda ku cha mən, 6 ma ndə nda na kwa daɓə cha kər na Hyel, tuku cha ngya wi nda Yesu Kəristi tə ngya.

7 Ka bazhi ɗa nda yo nyida, a da taɗər gadlagadla nə yo tsəfə nə hi wa, a'a, ɗəɗəmənyi nda tsahi tangərma nda na. Gadlagadla ɗəɗəm na nacha ngə mafakə nda hya ngati. 8 Dəhə ka ənga, gadlagadla nə yo tsəfə nə hi na taɗə cha, jirikur nyi chabiya tə dza ku cha ana ku hi. Aka kutlə kwa tərabiya, vimbəlmbəl jirijiri tsəu kwa mbəl sakana.

9 Kala ndə nda tə na ku vimbəlmbəl cha, ya ngə cho ɗa tsa ka zamə nyi, tsəutanyi ku kutlə ba'a sakana. 10 Dəhə ndə nda kwa nyida zamə nyi ku vimbəlmbəl cha na ngya, ya səda ku cha nda kwa gwa'atə cha kwa tləhi wa. 11 Kəl ja, ma dəhə ndə nda tə ɗa tsa zamə nyi, ku kutlə nda cha, ku kutlə cho ma'i ya a da cho zəndə ba nda cho ma'i tə wa, aka kutlə wurtə wuləfə nda nyi.

12 Yo tsəfə nə hi nguli ɗa nda yo nyida, aka fartə nji səpəla'a kəhi ka tləm nyi. 13 Yo tsəfə nə hi ka ada, aka zəndə nyi təhi nacha nda fwatə ku ghəyanyi, yo tsəfə nə hi nguli tlakala, aka a kura təhi səɗimi. Yo tsəfə nə hi ngulisha'a nda yo nyida, aka a zəndətə hi Ada.

14 Yo tsəfə nə hi ka ada, aka zəndə nyi tə hi nacha nda fwatə ku ghəyanyi. Yo tsəfə nə hi nguli tlakala, aka dunama tsa hi, ya ɓwanya Hyel na ngya ku hi, ya a kura tə hi ndə ɗimi nga.

15 Ngwa hya da nyida dunəya, ndara sə'inda kwa wa. Madawa kwa nyida dunəya a nyidar Ada da ku cha pa'a wa. 16 Dəhəkura sə'inda ku dunəya, wi ka gwa'a sə'inda dzə kwa i, mwaɓər li ana wovi kərakər, a da nə Ada ngə wa; kəl ja, nə dunəya nga. 17 Aka dunəya ana dəhə sə'inda kwa, kwa tərabiya, kəl ja, nji'inda kwa mər sənda Hyel kwa i nda kwa ngya ba'anawa.

18 Nguli ɗa nda yo nyida, bəji ɗa ti ləhəu! Ya wi nda hya ngatə ənda ndər dawa na Kəristi kwa shili, ya sakana njir dawa na Kəristi shili tə ɗanghəu, təwa ənga məna zəndə ənda bəji ɗatə ləhəu. 19 Nda biya ta nda ku huɗa mən, ya ɗəɗəm ma'a a da nda nəkəmən wa, aka macha nəkəmən nda, kwa nda ngya nda kə'i mən. Kəl ja, biya kənda ku huɗa mən char tə ənda a da nda nəkəmən wa.

20 Kəl ja, ndə nda Karti dzəvəya hi ti, ya dəhə hi zəndətə jiri. 21 A da ya tsəfə nə hi aka a da hya zəndə jiri wa, kəl nda aka a zəndətə hi, ya a gəzhi da kwa biya ku jiri wa.

22 Wa ngə ndər gəzhi nga? Nacha ngə ndə nda kəpal ənda Yesu da Kəristi wa. Chulkə ngəna ndəu ndər dawa na Kəristi cha, cha ngyar Ada ana Zər. 23 Aka ndə da tə ngyar Zər kwa uya Ada wa; aka dəhə ndə nda tə dləutsə Zər dləutsətə cha Ada.

24 Hya gəzəya mafakə nda hya ghəya ngatə tangərma nda ku ɗufwa hi ja. Ma hya gəzəya ngəna mafakəu, hya kwa ngya ku daɓəkər ka Zər, ba'a Ada. 25 Nənnə ngə alkawal nda cha mərtə mən, nacha ngə pi nda ba'anawa.

26 Yo tsəfa nə hi təkəra nji nda kwa gwa'a nda sanda hi. 27 Nahi nəkə hi, a wurtə hi dləutsə Shanguɗə Karti, ya ana ngya cha kuhi, a tsə'u hyo gwa'a vanya ndə dlədləɓə nə hi wa. Aka Shanguɗə Karti kwa dlədləɓə nə hi təkəra dəhə səu, ya sənda cho dlədləɓə nə hi jiri, a da gəzhi wa. Ana əngə ja, wi nda nja dlədləɓətə hi, ngya ma ku daɓəkər na Kəristi.

28 Ya sakana, ngulisha'a nda yo nyida, ngya ma ku daɓəkər ka Kəristi tsa'aka ma cho ɓəla shili, cho shili həya hi na dunama a da hyo ɗa na kuzhi wa. 29 Mangə zəndətə hi ənda ndə tsa'atsa'a cha, a zəndətə hi ənda dəhə ndə nda kwa mər sənda tsa'atsa'a Zər Hyel cha.