3 Tangərma, yo i hya zəndə ənda alenya njir həyatəvi kwa biya, nda kwa mər sər həyatəvi nda kwa nəu ɗimikur jigadəma kənda nda dza nda kwa i. Nda kwa fiya hi ka sər gyaɗi, 4 nda kwa na, “A Yesu da mərtə hi alkawal nda nə bəra cho ɓəla shili ma? Ya a manə cha nani? Jival kəmən i tə ngyar dunəya ɗəɗəməu, ya janə tsəutanyi dunəya tsəkətsəkəu, səda sha matsa ənda cha ma nja ɗaka mər dunəya wa.” 5 Njir na sə'inga ana ikur kənda, fartə nda ənda təwa ɓwanya tsaubar Hyel ngə dunəya tə ɗa. Nja mərtə hə'i tə ɗa tə babal zəbiya ku ɓiti, ya ngə nja ɓandə na ɓiti. 6 Ya ana ɓiti tsəu, cha zhazhinda dunəya nda haaɗa nda, təwa mandza dunəya tə waza. 7 Təwa ɓwanya tsaubar Hyel tsəu, huɗamələm ana hə'i nə məno la'a sakanə kwa səkə bəji nda njo zhazhinda na hu'u. Hyel tə fiya nda ba'a tə bəji nda njo mərtə nyi nəuma nə nji kəla ləvər Hyel.

8 Kəl ja, ngwa hya da far sə zhang nə ja ka zamə ɗa nda yo nyida wa! Hanyi zhang a nə Tlakəu wi fah gharəu kumə cha, fah gharəu kumə tsəu, wi hanyi zhang cha. 9 Tlakə da kwa shivi na alkawal nda cha mər wi nda alenya nji kwa har wa. A təvəra ənga cho mbahuɗə na hi, aka a da cho i mada ndə zhang sa wa, kəl nda cho i madawa cha tubi tsa səpəla'a nyi. 10 Kəl ja, pəchir Tlakə kwa shili wi ndər hələu. A tə pəchi nda njo ngatə kurakə 'ual'ualəu huɗamələm kwa zhazha, dəhə sə'inda nja ɓatlə huɗamələm nə kwa ngia, ya dunəya ana sə'inda kwa, kwa zhazha. 11 Mangə dəhə sə'ingə kwa zhazhə wi nga, chul ngya manə tə ki hyo kina ngya? Ngya kəhi kwa kina ɗa karti, ana hya nənyi kərnəhi nə Hyel ku dəhə səu. 12 Hya ngya ja, hyo chim shilir pəchir Hyel, hyo mba ma'a dzə ka cha shili kuskusəu. Pəchi nda huɗamələm kwa ngia kwa zhazha, ana sə'inda nja ɓatlə huɗamələm nə kwa lə'ua ku hu'u. 13 Kəl ja, wi nda Hyel tə mər alkawal, məno səkə taɗər huɗamələm ana taɗər dunəya, tangnda tsa'atsa'akur kwa ɗa wa'atanyi.

14 Aka əngə ja, ka bazhi ɗa nda yo nyida, mangə hyo səkə pəchi nga, hya mbadzə hya ɗa nji kəla bikə mar Hyel, kəla sər ngəla, hya ngya ma nyi ana piyarɗufəu. 15 Hya ɗənghatə ənda sənda gwa'atə Tlakə kwa mbahuɗəu nacha ngə ga nja uya mbəɗa, wi nda zamən mən Bulus nda məno nyida tə tsəfətə hi, təwa dəma nda Hyel tə nənyi. 16 Nənnə ngə sənda cha na ku dəhə kainau nyi, ku bəji nda cha tsəfətə hi təkəra sə'inga. Alenya sə dzau da ku kainau nyi nda nji kəla zəndə səu, nji kəla dunama ku jirikur kwa shabiya sənda cha kari, wi nda nda kwa mər na alenya mbwa ku likatəkatə Hyel. Ya nacha ngə kwa gwa'atə ndo kuɗa.

17 Kəl ja, nahi ka zamə ɗa nda yo nyida, a wurtə hi zəndə sə'inga, hya ngya na ɓəla ja, tsa dlədləɓə nji kəla nəu gadlagadla ingə da ba'a shabiya jigadəma kəhi, cha gwa'atə hya sha tsa məngya mənakə kəhi. 18 Kəl ja, hya biyama na həa ku ɗanghali ana zəndə nə Tlakən mən Yesu Kəristi Ndər Dləuya. Səli ngya tə ngyangyanyi nənyi sakana, ana ba'anawa! Aɗəmja.