5 Ka zamə ɗa nda yo nyida, ngatə ma! Hyel tə ɗəmtsə nji'inda na ɗali tə dunəya ka ga nda ɗa ka njir gəna^a nə jirikur, ana ga nda uya təlkur nda Hyel tə mər alkawal nə nji'inda kwa nyida nyi. 6 Kəl ja, hya kwa həyatə nji ɗaliɗali, wa i ngə nji'inda kwa ɗa məndza'u na hi, kwa mbəla hi ya mar njir nəuma? A njir gəna i ngə ma? 7 A na nda ngə nji'inda kwa pə nya ɗimi, nda kwa ngəl tləm mənakə nə Yesu Kəristi ngə njo nga hi nə ngə ma?

8 Macha nda kwa nyabiya hi gadlagadla nə təlkur Hyel wi sənda tsəfətsəfə nyi ku Likatəkatə ɓwanya Hyel, a mərtə hi sə mənakəu, nacha ngə, “Ka nyida təwul ngha tang wi nda ko nyida kərngha.” 9 Kəl ja, ma ngə hya tau kəl ku pama kərnəhi aka ngyakəngya kənda, a dləgəlnda təhi dəhə gadlagadla Hyel, ya ɗatə hi ka njir mər səpəla'a. 10 Madawa tə ɓəlatə dəhə gadlagadla ga ngyar zhang dəhə nda cha ɓəlnda, ya a ɗa tə cha ndər bikəu. 11 Aka Hyel təkərnyi ngə tə na, “Ngwa ka da mər kasalikur wa,” nacha ngə tsəu tə na, “Ngwa ka da tsa ndə wa.” Mada a da ko mər kasalikur ja wa, ma ka tsəya ndəu, naka ɓəlatə gadlagadla wa, ya a ɗa tə kə ka ndər bikəu. 12 Ɓwanya kəhi ana sənda hya kwa məra, cha ɗa wi nji'inda nja kwa mərtə nda nəuma ana gadlagadla nda kwa nənda dimukur. 13 Aka Hyel da kwa təhuɗə təkəra ndə nda pa'a kwa ngatə təhuɗər kuvanyi wa. Kəl ja, ma hya ɗana təhuɗəu, Hyel tsəu cho ɗana təhuɗəu ma cho mərtə hi nəuma.

14 Ka zamə ɗa, mi sakəda nyi ma ndə tə na, jirikur tsa cha ya ngə a da cha kwa mər tlər mənakə nda kwa char jirikur nyi wa? Chulkə ngəna jirikur ja ya, kwa dləuya nyi cha ya? 15 Ma cha ɗa vanya ndər nəu da ku pama hi, ndara zama ndara kwama nda a da na sər handzə ndara sərsum wa, 16 sakəda mi cha kwa mərtə hi ma hya nar nda, “Ma'i ma ana piyarɗufəu, ga Hyel cha nə hi sənda hyo gwa'a, ya a da hya nənda sənda nda kwa gwa'a wa?” 17 Əngə tanyi tsəu, ma jirikur tə ɗa a da na tlər mənakə wa, jirikur tətə nda ya sakəda nyi da wa.

18 Kəl ja, vanya ndə kwa nau na, “Jirikur tsa ka, naya tsəu tlər mənakə tsa ya,” aman ko ɗana nau char ɗa jirikur nghə ya a da kə na tlər mənakəu wa? Naya; yo char nghə jirikur ɗa təwa tlər mənakə nda yo məra. 19 Ko na nənyi təkə jiri ənda Hyel zhang. Mənakə cha ənga! Ma a kwadzaɓi ma'a dləukərti, ya dəhə ka ənga nda kwa dzədzi ana ləvəra. 20 Nakə ndə dzadza, kəl nja nar nghə jirikur kəla tlər mənakə sakəda nyi da wa ya? 21 A da hyo ɗənghatə ənda jival kəmən Ibrahim tə ɗa tsa'atsa'a mar Hyel, təwa sə mənakə nda cha mər ku bəji nda cho gwa'a hatəmachi na zər nyi Ishaku tə dzəgana nda ma? 22 A la'a təkə ma, jirikur nyi ana tlər nyi a mərtə tlər tsa'a kya'a. Tlər nyi nyabiya tə jirikur nyi. 23 Wi nda likatəkatə ɓwanya Hyel tə na, “Ibrahim tə nənyi jiri nə Hyel, ngə Hyel tə fiya nyi ka ndər mər sə tsa'atsa'a aka jirikur nyi.” Ma'a nja kwa nga nyi bazhinya Hyel. 24 Kwa la'a hi ma, ənda ndə kwa ɗa ka ndər mər sə tsa'atsa'a mar Hyel təwa tlər mənakə nda cha məra, a da kəl ka jirikur nyi tanyi wa.

25 Əngə tsəu Rahap zawar nda, a da cha ɗa ndər mər sə tsa'atsa'a mar Hyel təwa tlər nyi ma? Aku bəji nda cha ɗəwanda njir gwa'a hya mələm inda nja səa, ga lənda nda yiying təwa vanya laku paməu.

26 Wi ngə tə ma ndə tə ɗa a da kwa səpi wa, ndə tətə nda cha, əngə tanyi tsəu jirikur nda pa'a gyapə na tlər mənakəu tətə nyi nda.