Udiyar Ɓwanya
13
Hya biyama na nyida kərnəhi wi ka zama. 2 Ngwa hya da far mərtə nyi mənakəkur nə mihiɓi wa, aka ana mər ənga alenya nji mərtə nyi tə nə chama i'i, a da na zəndəkur kənda wa. 3 Hya ɗənghatə na nji'inda ku jarum wi nahi ngə kə'i nda ku jarum, ana nji'inda njo ɗa məndza'u nanda wi a nə hi nja kwa məra.4 Ngyar sal na mala ɗa na səli nə dəhə nji, gangər sal ana mala tsəu cha ɗa chichinyi, aka Hyel kwa mərtə nyi nəuma nə njir mər kasali ana njir mər shi'ushi'ukur. 5 Ngya kəhi cha ɗa naɗə tsa nyida kwaba, hya ngya ka sənda tsa hi, aka Hyel nati,
“A da yo ngya nghə pa'a wa,
a da yo vakənda nghə pa'a wa.”
6 Aka ənga məno nau na gangkər,
“Tlakə ngə ndər vala ɗa,
a da yo ngatə ləvər wa,
mi ndə kwa nau mərtə ɗa?”
7 Hya ɗənghatə ka gau kəhi, inda tə dəkə ɓwanya Hyel nə hi. Jigar ma dəma təkəra ngya kənda ga hya dlədləɓətə jirikur kənda. 8 Yesu Kəristi do sha wa, ənda tanyi ənah, ənya ana ba'anawa.
9 Ngwa taɗər dlədləɓə da ba'a hənda jigadəma kəhi wa. A ɗa tə mənakə papa'akur Hyel tsakətə nyi dunama nə ɗufwa mən, a da təwa ladər sərsum nda pa'a da na sakəda nə nji'inda kwa səm wa.
10 Dzəgana da tsamən nda a da nja ngyar njir mər tlər ku madləɓa həsəli nda səm sə tə wa. 11 Gau fərist kwa gwa na mashi sərshishi ku Vi nda Ndiya na Kartikur, aka cha handa təmachi ni, ka səpəla'a i'i, kəl ja, zumur sərshishi inda, nja kwa biya nginda biya tə ya mbwar daɓədzə nda. 12 Əngə tanyi Yesu tə sa ɓwaɓwatəu biya tə ya mələm, ka ga cha mərtə nji karti təwa mashi nyi. 13 Aka ənga mən təra biya tə ya mələm, aka ga məna səsə'u chulkə həyatəvi nda cha səsəuti. 14 Aka a da mən na mələm kərnəmən tə dunəya nə wa, kəl ja, məna kwa səkə mələm nda kwa shili. 15 Aka ənga, məna biyama na hatəmachi nə fal nə Hyel təwa Yesu, fal nda kwa biya ku nya mən, nda kwa dəkəbiya tləm nyi. 16 Ngwa hya da far mər mənakəkur ana təkə sənda tsa hi ka alenya nji wa, nacha ngə chulkə hatəmachi nda Hyel kwa ngatə mənakə ni.
17 Hya la'a səlir nji'inda kwa nəu na hi, hya ɗa na kəriwa nə gyalkur kənda. Aka nda kwa ɓəla hi, ya nda kwa da jiganda sənda nda mər təkəra hi nə Hyel. Hya la'a səli kənda aka ga tlər kənda ɗa ka hirgyaɗi, a da wi tlər tuku wa, aka a da cho ɗa na sakəda nə hi wa.
18 Hya pətlənya ka ea. Zəndətə ea təkəɗəu, ɗufwa ea taltaləu ana chim ənda ea kwa ngya tsa'atsa'a ku dəhə laku 19 Yo gədi hi tsa'anyata ənda hya pətlənya ka Hyel ɓəlandə ɗa yada hi a da na ɗə bəji wa.
20 Hyel ndər piyarɗufəu, nda təwa mashi alkawal nda ba'anawa, nda tə hya'andə Tlakən mən Yesu ku hwa, nacha ngə dəgalər ndər ɓəla kətəng. 21 Cha nyandə hi na kala sə mənakəu, ka hya mər sənda cho i. Ana cha mər tlər nyi ku pama mən nda kwa nənyi hirgyaɗi, təwa Yesu Kəristi, ndə nda səli ngya tə nənyi ba'a ba'anawa. Aɗəmja.
22 Ka zama yo gədi hi, hya səsəu na ɓwanya tsəɗufəu ɗa, aka a tsəfətə hi təya kainau tsau tanyi. 23 Yo i hya zəndə ənda wuniya tənji zamən mən Timtawus. Ma cha shili kuskusəu yo shili na cha ka ea la'a hi. 24 Usar ma dəhə gau kəhi ana njir nəu Hyel dəhəu. Njir Italiya kwa usa hi. 25 Papa'akur Hyel cha ngya tsa'a nahi dəhəu.