6 Nanda ingə chul nji'inda kwa tləɗəu kərnənda gwa ku ki nji, nda kwa shakər nə mahi'i dzadza, inda səpəla'a kənda tə ngəya wulya nda, ya mwaɓər dəhə chulkə jigadəma pəla'a zhaliya nda ti. 7 Kala bəji nda kwa nəu taɗər dlədləɓa, kəl ja, a da nda kwa nau zəndəbiya jiri wa. 8 Tang wi nda ka Yannis na Yambris tə mər dawa na Musa, əngə tanyi tsəu nji nə kwa mər dawa na jiri, nji'inda jigadəma kənda səwasəwanyi ya jirikur kənda tsəu ɓwa'atanyi. 9 Kəl ja, a da nda kwa ma'i naɗə nə wa, aka dzadzakur kənda kwa biya tə babal wi nə ka Yannis na Yambris nda.

10 Kəl ja, naka nəubiya təkə dlədləɓə ɗa, ənda yo ngya, sənda yo i məra, jirikur ɗa, mbahuɗə ɗa, nyida ɗa ana səsə'u ɗa. 11 A zəndətə kə məndza'u na ɓwaɓwatə nda uya ɗa vu Antakiya, Ikoniya ana Listra, kəl ja, Tlakə tə mbəɗandə ɗa kwa dəhəu. 12 Jiri nga, dəhə ndə nda kwa i ka cha ngya na ləvər Hyel ku Kəristi Yesu, kəl nja ɗa məndza'u na cha. 13 Kəl ja, njir mər ɗimikur kəl tsakə ɗimikur kənda kwa tsaka, nda kwa shakər nə nji ya nanda tsəu njo shakər nənda. 14 Kəl ja, naka, ka biyama na nəu sənda ka dlədləɓətə ga nənyi jiri, aka zəndətə kə nji'inda ka dlədləɓə tsari. 15 Ka ɗənghati, a zəndətə kə likatəkatə karti nə Hyel tsəu kə zər, nda kwa nau nənghə dəma nda kwa gwa'atə ko uya mbəɗa, təwa nənyi jiri nə Kəristi Yesu. 16 Dəhə likatəkatə təwa gyalkur Hyel tsəfə nji, ya sər sakəda cha ka dlədləɓə jiri, guhi, ɓatlə dalatsən, ana tsaubar ka ngya tsa'atsa'a, 17 ka ga mava Hyel ɗa ɓatləɓatlənyi gagaɗa, ka dəhə tlər mənakəu.