Sənda Ndər Nəu kwa Kina Məra
5
Ngwa ka da tsə ndəradəgal wa, kəl ja, ka ɓwanya nənyi na səli wi ada ngha. Nguli tlakala tsəu, ka ɓwanya nənda wi ka zamə ngha. 2 Mahi'i madiya wi ama ngha, ana ku'ipəlyakə wi ka kwamə ngha, ana dəhə chamər ɗufəu.3 Ka hətə nyi səli nə mahi'i inda shili kənda tə kuɗa, ya ndər hagwa nda chi da wa. 4 Kəl ja, macha malafi nda na nguli nyi da, ndara aji, ɗatə tuku nda ghəya char nyi nə njikə nda ənda njir ləvər Hyel nda təwa hagwa nda chi. Aka na cha ngə sənda Hyel kwa gyaɗa da. 5 Malafi nda zhang tanyi, ndər hagwa nyi chi da wa, ya a fətə təcha kər da Hyel, cho gədi ana pətlənya vu'i na pəchi ka ga Hyel hagwa nyi chi. 6 Kəl ja, malafi nda tə nənyi kərnyi nə məsɗakəkur dza, a wurtə cha tah madangə tsəutanyi na pi. 7 Ka dlədləɓətə nyi sə'inə nə njir nəuwa, tsa nja da həya nda na bikəu. 8 Kəl ja, dəhə ndə nda a da kwa ɗəngha na njikə nda wa, a da wi njir ki kənda ma'a wa, a kəpal tə cha jirikur, ya ɗimikur nyi ndiya tə ndə kəla zəndə Hyel.
9 Malafi nda njo kina vala, tuku fah nyi ɗa kwakumənyi. Ya tsəu, a da cha ɗəu ndiya zhang wa, 10 ya nji kwa fal nyi ənda tlər nyi mənakəu, cha ɗa mala nda handə nguli nyi ku laku mənakəu, cha kwa dləu mihiɓi na hirgyaɗi. Cha kwa vala nji nda nə Hyel ka nji'inda tə takasa. Mada sakamani kəl tlər mənakəkur cha kwa məra.
11 Kəl ja, ngwa ka jiga mahi'i nda shili kənda tə kuɗə ya tsə'u ta nda zər zər ku huɗa mahi'ifi wa, aka ma bəji nda mwaɓər dzanda tə ndiya dunamar nənyi jiri nə Kəristi, nda kwa ɓəla ɗəuwa. 12 Aka əngə nda kwa ɗa njir bikəu aka a da nda nyabiya səmfəla nda mər nda tangərma wa. 13 Matsa ngə ma'a, nda kwa ɗa kukufəu, nda kwa ɗinya bəji kənda tə mbwar nəu ki nji, nda kwa dlədləɓətə pə nya zazaɓə ana ɓwanya nda pa'a njo kina pəa. 14 Aka əngə ja, aku la'a ɗa a ndiya tə vi mahi'i nda shili kənda kuɗa, ya tsə'u ta nda zər zər nda ɗəuwa, nda yah ngulisha'a, nda ɓəla ki kənda, tsa njir dawa kəmən da uya lakur pə səɗimi təkəra mən. 15 Aka alenya mahi'ifi wurtə sha tanda nda kwa nəu Shantan.
16 Macha malakə da ndər nəuwa, ana mahi'ifi ku huɗa njikə nda, cha hagwa nda chi, ngwa cha da ngyanyi ni nə njir nəu wa, aka ga njir nəu uya lakur hagwa nyi chi nə alenya mahi'ifi nda pa'a na njir hagwa nda chi.
17 Wawa'ar njir nəu inda kwa mər tlər kənda tsa'atsa'a nja hətə nda səli, nja kinda nda tsa'atsa'a, a da ma'a wi nji'inda kwa mər tlər bəzə mafakə ana njir dlədləɓə nə nji wa. 18 Aka likatəkatə tə na, “Ngwa hya da fəu ɗakwata ku nya hahaldi tla sakanda cha kwa zha uhi wa.” Ana tsəu “Nji nda kwa mər tləra, a kitə nda uya wazəba kənda.” 19 Ngwa ka dləukər ma ndə tə shili na wula təkəra ndəradəgal wa, kəl ndara maka ngatə tsa nji mətləu makər təkəra cha. 20 Njir bikəu tsəu, ka guhi nda a mar dəhə njir nəuwa, ga cha ɗa ka sər təɗəhimi nə alenya nji.
21 Yo nar nghə huɗə Hyel, ana Tlakən mən Kəristi Yesu, ana Chama Hyel, ka nəu tsaubar ina, ku dəhə sənda ko məra, ngwa ka takəl nə madawa wa.
22 Ngwa ka da ba'a kusa fəkə nyi chi nə nji ka ga ka dzəvəya nda ka mər tlər Tlakə wa, ya ngwa ka fə hya kə ku mbwar hya njir səpəla'a wa. Ka mərtə kərnghə chaməu.
23 Ngwa ka da sa ɓiti hirəkə tanyi wa, kəl ja, ka satsə ɓitir anap kushə ka nyahuɗa ka, mangə a ko maka ngya yiying wa.