Təɗəhimi təkəra Maləm Tla Gəzhi
4
Shanguɗə Hyel tə dəkar mən tə babal ənda ku bəji batəbatə alenya nji kwa shandə nyi yi nə jirikur nə jiri, nda kwa həsəli nə shanguɗə gəzhi ana dlədləɓə nə kwadzaɓi. 2 Ngəna dlədləɓə i kwa shili təwa shakər nə njir tla gəzhi, nji'inda jigadəma kənda kuɗəkuɗənyi kurpəu. 3 Chul nji inga kwa dlədləɓə nə nji ənda, hədza ana səm alenya sərsum da tsa'atsa'a wa. Kəl ja, Hyel tə mər sərsum ka ga nja səma, a hir njir nəuwa, nji'inda tə zəndə jiri tə pətlənya nə usaku. 4 Dəhə sənda Hyel tə məra mənakə cha, sə da nda tatlər nja ngyar wa, kəl ja, dəhə sə nja dləutsə na pətlənya ana usaku, 5 aka təwa ɓwanya Hyel ana pətlənya, Hyel kwa dləutsə dəhə səu.Mava Mənakə nə Yesu Kəristi
6 Ma ka dlədləɓətə nyi əngə nə njir nəuwa, ka kwa ɗa ka mava mənakə nə Kəristi Yesu, ma ko ngya təwa shanguɗə ku jirikur wi nga, ko həa ku ɓwanya ngha ana dlədləɓə nə jiri. 7 Ngwa ka ɗinya bəji təkəra kəpal ɓwanya kəla kər nda pa'a nə Hyel wa, ka ɓutə kərnghə na mənakəkur chul nə Hyel. 8 “Ɓu nda ndə kwa mər nə dza cha nda njo la'a mənakə cha, kəl ja, ngya chulkə nə Hyel ndiyatə sakəda, aka kwa gwa'atə papa'akur ku ngya nə sakana, ana nda biyama.”
9 Ɓwanya nga təkəɗə cha, ya ɗatə tsa'atsa'a nja dləukəri. 10 Nacha ngə sənda gwa'atə məno mər tlər tsa'anyata, məna kwa mbadza, aka fətə tə mən kər da Hyel nda na pi, nda Ndər Dləuya dəhə nji, a da wi nji tə nənyi jiri ma'a wa.
11 Ka tsau nda bar ana ka dlədləɓətə nda sə'ina. 12 Madangə kə zər ngwa ka da i nja həyatə kə wa. Kəl ja, ka ɗa ka sər ba'ada ana sər dlədləɓa nə njir nəuwa, ku ɓwanya ngha, sənda ko məra, nyida ngha, jirikur ngha, ana ngya chaməu. 13 Təvi yo yi, ka kəratsəntə likatəkatə Hyel na nə nji tə babal, ka dəkətə nda Mafakə Mənakəu, ka dlədləɓtə nda. 14 Ngwa ka da ngyar ga'ar Shanguɗə Karti ngə ka dləutsə təwa ɓwanya mətakər nda nja pə təkəra ka, ku bəji nda njirawawa'a nə njir nəu tə fəkə nghə chi wa.