Hya Ngya na Ɓəla ka Shilir Tlakəu
5
Sakan ja ka zama, a da kəl ea tsəfə nə hi təkəra bəji ana hanyi wa, 2 aka a zəndətə hi təkəɗəu ənda pəchir Tlakə kwa shili wi ndər həl əvu'i. 3 Aku bəji nda nji kwa na ənda “piyarɗufəu da ya ləvər da wa,” kəl tah kwa ghahəya nda wi ngə tə ɓəlakərya kwa ghahəya mala huɗəu, ya a da nda kwa nau mbəɗə tsar wa.4 Kəl ja, nahi ka zama, a da hi ku kutlə pəlakər bəji ngo ghahəya hi wi ndər həl wa. 5 Dəhə hi nguli vimbəlmbəl hi nə puchi. A da mən nə vu'i ndara nə kutlə wa. 6 Aka əngə ja, ngwa məna da ɗa wi alenya nji'inda kwa njihanyi wa, kəl ja, mən ngya na ɓəla ana ngya kərə'u. 7 Aka nji'inda kwa njihanyi kwa njihanyi vu'i, ana nji'inda kwa wi na mbadla kwa wi vu'i. 8 Kəl ja, manda nə vimbəlmbəl mən, məna ɗa kərə'u, məna pəndzə jirikur ana nyida ka ləkutə pa kəmən, ana fəkər uya mbəɗa ka mavəkə kəmən. 9 Aka Hyel da tabiya mən ka məna sa ɓwaɓwatər huɗətla wa, kəl nda məna uya mbəɗa təwa Kəristi Yesu. 10 Cha tə ka mən aka mada ana pi mən ndara kuɗəkuɗənyi mən, məno ngya tsa'a kə'i cha. 11 Aka ənga, hya fətənyi ɗufəu nə kərnəhi ana hya tsakətə nyi dunama nə kərnəhi, wi ngə hya kwa mər nga.
Udiyar Tsaubar ana Usa
12 Sakan ja, eo gədi hi ka zama, hya nənyi səli nə nji'inda kwa mər tlər tsa'anyata ku pama hi, nji'inda təkəra hi ku Tlakəu, ana nji'inda kwa dəkə dəma nə hi. 13 Hya gəzəya nda ana dəgalər səli ku nyida aka tlər kənda. Hya ngya na piyarɗufəu na kala ndəu. 14 Ana eo gədi hi ka zama, təɗə ma himi nə njir ngya ɓwa'atanyi ku pama hi, hya tsəɗufəu nə njir ləvəra, hya vala nji təutətəuta, hya səsəu kala ndəu. 15 Hya gəla, ngwa madawa cha ki ɗimikur na ɗimikur wa, kəl ja, wa'atanyi hya mbadzə na mər mənakəkur nə kərnəhi ana kala ndəu.
16 Hya ngya na hirgyaɗi mada sakamani, 17 hya pətlənya wa'atanyi, 18 hya ɗa na usaku ku kala səu, aka nacha ngə sənda Hyel kwa i nahi ku Kəristi Yesu.
19 Ngwa hya da katə tlər Shanguɗə wa, 20 ngwa hya da həyatə ɓwanya takər wa. 21 Hya dzətə kala səu. Hya ta'i təkəra mənakəkur. 22 Hya təkəna kala ɗimikur.
23 Hyel təkərnyi, Hyel nda na piyarɗufəu, cha chinda hi pyasəu. Ga dəhə shanguɗa hi ana mambəl kəhi ba'a dza hi cha ngya kəla bikəu tsa'a tə bəji nda Tlakən mən Kəristi Yesu kwa ɓəla shili. 24 Ndə nda tə nga hi, ndər jiri cha, ya cho mərti.
25 Ka zama hya pətlənya ka ea. 26 Hya usar ka zama ana gaɓədzə karti. 27 Yo tsau hi bar ana gyalkur Tlakə ənda hya kəratsəntə nyi mafakə na nə dəhə ka zama.
28 Papa'akur Tlakən mən Yesu Kəristi cha ngya tsa'a nahi.