3 Chimər Hyel ja, hya ɗa karti, ənda hyo tyatinda kasalikur. 4 Kala ndə zəndə ənda cho ɓəlatə dza cha aku laku karti ana səli, 5 a da na mwaɓər dzə wi njir nəu katə ingə wa, nji'inda a da kwa zəndə Hyel wa. 6 Ana əngə ja, ngwa vanya ndə da zandə nyi sə nə kuvanyi ndara cha ɗiya nyi wa. Tlakə kwa tlanda nyi nəuma nə nji təkəra chul səpəla'a inga, wi nda ea nar hi ga təɗəhima hi təkəri. 7 Aka a Hyel da nga mən ka ngya ku hiɗahiɗakur wa, kəl nda, ka məna ngya ku kartikur. 8 Aka əngə ja, ndə nda tə ngyar tsaubar na, a da ndə ngə ngyar cha wa, Hyel ngə ngyar cha, nda nə hi Shanguɗə Karti.

9 Sakana ja, a təkəra nyida dza, a da kəl ea tsəfə nə hi təkər wa, aka nahi na kərnəhi Hyel dlədləɓətə hi tə hya nyida kərnəhi. 10 Wi ngə kwa nyida hi dəhə ka zama tə hə'i Makidoniya. Dəhə ka ənga eo gədi hi ka zama hya tsakətə nyida. 11 Hya mbadzə ənda hyo ɗa na ngya kərə'u, hya mər sənda manə hi tanyi, hya kwa mər tlər na cha hi wi nda ea na hya məra. 12 Təwa ənga hyo ɗa na səli mar nji'inda a da njir nəu wa, ya tsə'u a da hyo ngya ka ndə wa.

13 Ka zama, a da eo i hya ɗa na tar zəndə təkəra nji'inda kuɗa, ndara hya mər huɗətla wi nda alenya nji'inda pa'a na fəkər kwa mər wa. 14 A nənyi tə mən jiri ənda Yesu tə tah ga hya'atə səkəu, ana ənga a nənyi tə mən jiri ənda Hyel kwa fa'a njir nənyi jiri inda kuɗə sha huɗamələm tsa'aka Yesu. 15 Ea kwa nar hi sənda Tlakə tə na bəra, namən nda tsə'uta mən na pi pəshinda Tlakə kwa ɓəla shili, a da namən kwa ghəya hya'ati tsa nji'inda kuɗə wa. 16 Aka Tlakə na kərnyi kwa səya kya huɗamələm ana kurakə dzəgam dzəgaməu, ana kuraka gau chama, ana tsəu kurakər tələm Hyel. Nji nda kuɗa ku Kəristi nanda kwa ghəya hya'atə tangərma. 17 Ahir nga, namən nda tsə'uta mən na pi ku bəji nga, njo hətə mən tsa'a kanda sha ku ləmbəkəu, ka məna ɓə na Tlakə biya huɗamələm, məno ngya ka Tlakə ba'anawa. 18 Aka əngə ja hya fətənyi ɗufəu nə kərnəhi na ɓwanya nga.