Dlədləɓə Ngyar Kəristi
2
Tsəɗufəu da ku ngya ku Kəristi ya? Fəɗufəu da ku nyida nyi ya? Daɓəkər da ku Shanguɗə ya? Mər mənakəkur na təhuɗə da ku ɗufwa hi ya? 2 Yau, nyabiya ɗa ma hirgyaɗi ɗa təwa dləukər kərnəhi ana dəhə ɗufwa hi, hya nyida kərnəhi, ana hya daɓəkər ku mər tlər na jigadəma zhang ana sənda hyo chima. 3 Aku dəhə səu, ngwa hya da ba'a ikəra kərnəhi wa, ngwa hya da bu kərnəhi təkəra ɓwa'atanyi wa. Kəl ja, hya həyakər nə kərnəhi ana hya hətə alenya nji ndəɗə hi ti. 4 Ngwa hya da ba'a gwa'a kəl sənda hyo i wa, kəl nda ma'a sə'inda alenya nji kwa i tsəu.5 Ngya kəhi ja, cha ɗa wi nə Kəristi Yesu.
6 Madangə Hyel cha,
a da cha la'a məlməlkur nyi na Hyel
wi vanya sə nda cho ngya kari wa.
7 Kəl ja, cha tashiya kərnyi wi a cha sə wa,
ga hətə məngyar mava.
Nja ya nyi wi ndəu.
8 Cha tashiya kərnyi wi ndəu, təwa la'a səlir Hyel,
ga tə ma'a tah kyatə taməngəla.
9 Aka ənga Hyel tə fiya nyi tə
mbwa nda tə ndiya na səli
ga nənyi tləm nda ndiya dəhə alenya tləm,
10 tsa'akar dəhə sə ndəndəu kwa uzhi nə tləmər Yesu,
sə'inda ki huɗamələm,
ana dunəya, ana sə'inda kyo ndəla hə'i,
11 ya madawa kwa na ənda,
Yesu Kəristi, Tlakə cha,
ka səlir Hyel Ada.
Vimbəlmbəl ku Dunəya
12 Aka əngə ja ka bazhi ɗa nda yo nyida, bəji nda ya kə'i hi, a nəu təhi nya ya. A tsə'u mən sakanə wa, kəl ja, sakan hyo kina tsakətə nəu nya ya. Mər ma sənda kwa char ənda a uyatə hi mbəɗa, ana ləvər Hyel gagaɗa. 13 Aka Hyel ngə kwa mər tlər ku ɗufwa hi, nacha ngə kwa nə hi gyalkur mər sənda cho i.
14 Hya mər dəhə səu, a da na huhuni ndara kəpal wa, 15 ga hya ɗa ka nji kəla bikəu, nji chaməu, nguli Hyel inda kəla sər ngəla. Hyo mbəla tang wi sasəlga aku chul bəji pəla'a nə mən kwa tə dunəya na. 16 Hya gəziya mafakə pi nga ana dunama, ga cha ɗa ka sər jalvi na'a pəshinda Kəristi kwa ɓəla shili ti, ənda a da ya hwi ndara ya mər tlər ɓwa'atanyi wa. 17 Jirikur kəhi ku Tlakəu ana tlər kəhi a ɗatə wi sər hatəmachi nənyi. Ana pya ya tsəu kwa sa ku sər hatəmachi na. Ma tə ɗa ənga, yo mər hirgyaɗi nahi dəhəu. 18 Əja, mər ma hirgyaɗi, naya tsəu yo mər ənga.
Timtawus ana Abaforiditus
19 Ma Tlakə Yesu tə i, yo sə Timtawus yada hi ɗəɗəu tanyi, ga ya uya fəɗufə təwa mafakə nda yo uya təkəra hi. 20 A ndə da ya kə'iri nda kwa ɗəngha nahi wi Timtawus wa. 21 Alenya nji inga, kəl kərnənda tanyi zəndə nda, a nda kwa ɗəngha na sənda Yesu Kəristi kwa i wa. 22 Kəl ja, kwa zəndə hi ngyar Timtawus. Ea mər tlər bəzə Mafakə Mənakə nacha wi ada na zər nyi. 23 Yo chim ya sənyi yada hi, ma ya zəndəbiya sənda kwa ɗa na ya. 24 Naya ma'a nənyi tə ya jiri nə Tlakəu, ənda yo shili da hi ahir zər bəji kushiu.
25 Kəl ja, aku la'a ɗa, a ɗatə tsa'atsa'a ya sətə hi zamə ɗa Abaforiditus, chama kəhi nda hya sə ka cha shili mər tlər na'a. Bazhi tlər ɗa cha, bazhi ɓwaɓwatə ɗa cha tsə'u. 26 Yo ɓəlandə nyi yada hi aka 'ual'ual cho chim cha la'a hi, cho ɗəngha aka hya ngatə a da cha ɗa yiying wa. 27 Tsa'anyata, a mərtə cha shiləka, wi a tətə cha ma'a. Kəl ja, Hyel tə ngatə təhuɗə nyi ana təhuɗə ɗa tsəu tsa yada ba'a mər huɗətla atə vanyi atə vanyi.
28 Nacha nga gwa'atə yo ɓəlandənyi yada hi, aka a zəndətə ya hyo mər hirgyaɗi ana la'a nyi, naya tsəu, a tsə'u ya kwa ɗəngha təkəra hi wa. 29 Hya dləutsə nyi ja ana chul nyidar njir nəu Tlakəu, hya hətə nyi səli wi nda njo kina mər nə chul nji wi nacha. 30 Aka cho nda tah a təkəra tlər Kəristi, cha far na kərnyi ka cha mərtə ɗa tlər nda pa'a hya kwa nau mərtə ɗa.