1 Aka sənda gwa'atə, naya Bulus, ndə nda ku jarum aka Kəristi Yesu aka nahi nji'inda pa'a njir Yahuda, yo pətlənya kə'i hi. 2 A zəndətə ya təkəɗəu a ngatə hi ənda Hyel aku ɗanghali nyi, cha na'a tlər bəzə Mafakə Mənakə nə hi, 3 nacha nga, sə ɗəwaɗəwa nda nja chabiya ɗa, wi nda ya tsəfəbiya tsa'u tanyi. 4 Aku kəratsən nənnə ja, hya kwa nau ngabiya sə ɗəwaɗəwa nda ya zəndə təkəra Kəristi. 5 A ndə da chabiyanyi nəna sə ɗəwaɗəwa nə alenya nji ɗaka ɗa wa, kəl nda Shanguɗə Hyel tə chabiya nyi nə nji'inda nja dzəvəya, kə'i changhabal nda karti ana njir mətakər. 6 Sə ɗəwaɗəwa nga, nacha ngə ənda təwa Mafakə Mənakəu, nji'inda pa'a njir Yahuda tə ɗaka njir fa'aki dəhə nda ka njir Yahuda, njir dzə zhang, ya nji'inda kwa təkə alkawal aku Kəristi Yesu.

7 Ya ɗa ka mava Mafakə Mənakə na, təwa ga'ar ɗanghali nə Hyel nda nja na'a təwa gyalkur nyi. 8 Madangə naya ngə kushə gagaɗa aku huɗa dəhə nji cham nə Hyel, dəhəka ənga nja mərtə ɗa ɗanghali nga, ga ya bəzə 'ualkura mafakə papa'akur Kəristi nda pa'a njo nau gwa'abiya nə nji'inda pa'a njir Yahuda. 9 Hyel tə tabiya ɗa ka ga ya pəbiya tə babal nə dəhə nji, sə ɗəwaɗəwa nda ɓatliya cha, nda Hyel ndə nda tə mər dəhə səu, tə fiya ɗəwaɗəwanyi tangərma. 10 Sənda ku jigadəma nyi, nacha nga təwa njir nəuwa, dəma Hyel ku laku pampam kwa chabiyadzə nə dəhə nji təltəl ana njir gyalkur nda na ngyar huɗamələm. 11 Ghəya tə ɓatlər dunəya nənə ngə jigadəmar ɗufwa cha, nda cha wurandə təwa Kəristi Yesu Tlakən mən. 12 Aka Kəristi ana jirikur kəmən ku cha məna ya mar Hyel gangkər a da na ləvər wa. 13 Yo gədi hi ja, ngwa hya da tsəya ɗufwa hi aka ɓwaɓwatə ɗa ka hi wa, aka nacha ngə kwa da shili na səli nə hi.

14 Aka ənga yo uzhi mar Ada, 15 ndə nda kala nyandəla nji'inda na ngya kya huɗamələm ana a tə dunəya kwa uya tləm. 16 Yo gədi ənda aku bwaɓkur səli nyi cha tsakətə hi dunama ana gyalkur təwa Shanguɗə nyi ku ɗufwa hi. 17 Aka ga Kəristi cha ngya ku ɗufwa hi təwa jirikur kəhi, ətsə'u, yo gədi ənda hya ɗa na chiyadza, ana hya ngya ku nyida. 18 Yo gədi tsəu, dəhə hi ka alenya njir nəuwa, ənda hya ɗa na nau ngabiya dlaɓəkur ana pələkəkur ana dzəgaməkur ana ndzuɗakəkura nyida Kəristi. 19 Ana hya zəndəbiya dəhə nyidar Kəristi nda a nji da kwa nau gwa'abiya wa, ga hya nyabiyadzə na ngyar Hyel ku ngya kəhi.

20 Sakan ja, səli ta'i tə nə Hyel nda kwa nau mər sə nda a njo nau dəkətə wa, nda ndiya sə nda məno gədi ndara məno hari, təwa gyalkur nyi nda kwa mər tlər ku pama mən. 21 Səli ta'i tə nə Hyel aka dəgalkur nyi nda nja kwa la'a aku pama njir nəuwa ana aku Kəristi Yesu, aka kala bəji, ba'anawa, aɗəmja.