9
A sakədar ya tsəfətə hi təkəra nawa tlər fə ga'a nə nji chichi da wa. 2 Aka zəndətə ya kwa i hi hya vala, yo wovi na hi ma'a nə njir Makidoniya a təkəra ənga. Yo na nənda nahi njir Akaya, a ɓatliya təhi fwatə ku fa nda təra nda ka hyo vala, jiri mbadzə kəhi ngə tsətə tə ɗufwa alenya njir nəu nda vu Makidoniya, tə gwa'atə nda ghəya vala. 3 Kəl ja, janə yo sə ka zama inə yada hi, hya ɓatliya aka nar nda təya ənda ənya hya tsəmtə kwaba kəhi wa, ya a da yo i wovi ɗa cha ɗa nə gəzhi wa. 4 Aka ma ea shili ka alenya njir nəu nda vu Makidoniya, ga həya a da hya ɓatliya wa, naya nda wovi na hi nənda, yo sa kuzhi. 5 Aka ənga, ya la'a a ɗatə mənakə ya gədi ka zama nda yi təvi kərɗa yi, ga nda tsəmtə ga'a nda hya ɓatliya, ga nja həya ɓatləɓatlənyi. Nacha ngə kwa char ənda ana ikur kəhi ngə hya məra a da na tuku wa.6 Hya ɗənghati, ndə nda tləkanda chuli kushiu, cho mərəya kushiu, ya ndə nda tləkanda chuli 'ualəu tsəu, cho mərəya 'ualəu. 7 Kala ndə cha fə ga'a na sənda cha ɓatliya ku ɗufwa cha, a da na huɗətla ndara wi tuku wa, aka Hyel kwa nyida ndər fə ga'a na hirgyaɗi. 8 Ya Hyel kwa nau nə hi papa'akur nyi bwaɓəu, aka ku dəhə səu, wa'atanyi hya uya sənda hyo gwa'a, ndiya matsa əngə ma'a, ka ga hya uya dəhə sənda hyo gwa'a ka mər tlər mənakəu. 9 Wi nda ɓwanya Hyel tə na,
“Cha kwa nənyi nə nji ɗaliɗali
na chi wunghəu,
tsa'atsa'akur nyi ngyatə ba'anawa.”a
10 Hyel ngə kwa nənyi chuli nə ndər tləka, kwa nənyi sərsuma, aka ənga Hyel nda nə hi chuli ka hya tləka, nacha kwa mərtə chuli kwa həa. Aka ənga cho mərtə ga'a nda hyo məra kwa shili na tsa'atsa'akur nə tlər mənakə kəhi.b 11 Hyo ɗa njir gəna ku dəhə səu, ga hya ɗa njir vala na chi wunghəu mada sakamani, ya nji tsəu kwa usaku Hyel ana vala nda hya lətə təwanə ea.
12 Aka tlər mənakəkur nə hyo mər na a da kəl ka vala njir nəu wa, kəl ja, kwa shili na ma'a usaku nə Hyel, ya kwa tsakə ɗangkura usaku nə Hyel gagaɗa. 13 Aka nəna tlər nda hya chabiya kərnəhi təwari, nji kwa usaku Hyel, aka nəu nya Hyel nda kwa nəu hir dəkəbiya nda hya dəkəbiya Mafakə Mənakə Kəristi, ana wunghəkura cha hi ka təkə sə kə'i nda ana kala ndəu. 14 Ya nda kwa pətlənya aka hi, ana nyida, aka chul ɗanghali nda Hyel tə nə hi. 15 Usaku ngya tə nə Hyel aka ga'anyi nda a sər məməla nyi da wa.