5 Ma vanya ndə tə mərtə sər huɗətla, a da huɗa ya nda cha tliya wa, təwa vanya lakəu dəhə hi nda cha tliya huɗahi. Naya tsə'u a da ufə nə ya kwa ufə hi wa. 6 Ɓu nda badəgal nə hi tə ɓu ndə nga, a nji nyi ti. 7 Sakan tsəu ja, kəl hya farbikə nyi, hya tsətə nyi ɗufəu, ngwa hya da ngya nyi huɗətla nyi zhaliya nyi wa. 8 Aka ənga yo gədi hi, hya chabiyanyi ənda kwa nyida nyi hi. 9 Ya tsəfətə hi kainau na ka ga ya dzətə hi na, ga ya la'a ndara ɓatliya tə hi ka nəu tsaubar ɗa mada sakamani. 10 Madawa hya farbikə nyi, naya tsəu fartə ya bikə nyi. Ya ma ya farbikə nyi tsəu, macha vanya səda nda yo kina farbikəu, a tə nyanə hi ngə ya farbikə nyi, a huɗə Kəristi, 11 atsa Shantan da ba uya lakur shandə mən kər, aka kwa zəndə mən kwakunakur nyi.

12 Nda ya shili ku mələm Toruwas ka ga ya bəzə Mafakə Mənakə nə Kəristi, ngə ya ngabiya Tlakə wurta mbəɗiya ɗa lakur mər tlər tangnda. 13 Dəhə ka ənga, a da ya na piyarɗufəu wa, aka a da ya la'a Titus zamə ɗa nda yo nyida wa. Ana ənga, ngə ya təkə ka nda ga təra yi Makidoniya. 14 Kəl ja, usaku nə Hyel, nacha nda kwa nəu namən məno kura ku Kəristi mada sakamani. Cho mər tlər namən ka ma'i na Mafakə zəndə nə Kəristi mada a bar wi sənda kwa shi'uni kwitəkwitəu. 15 Aka anə Hyel pabiya da sənda kwa shi'uni kwitəkwitə mən nə Kəristi. Ku pama nji'inda kwa mbəɗa ana nji'inda kwa kuɗa. 16 Anə nji'inda kwa kuɗa, wi muvuɗər tə mən nə nda, kəl ja, nə nji'inda kwa mbəɗa, muvuɗər pi mən. Wanga nji ka chul ngawa tləra? 17 Na ea ya, a da ea wi alenya njir dunəya wa, nji'inda kwa mər tlər Hyel ka gwa'a gəna wa. Kəl ja, Hyel na sə ea, ɓwanya jiri nə eo pə huɗə nyi, wi njir mər tlər na gyalkur Kəristi.