4 Aka əngə ja, a təkəra səm sənda nja tla katə ni, a zəndətə mən səda katə təkər tə dunəya nə wa, ya a vanya hyel da wa kəl Hyel zhang tanyi. 5 Madangə alenyi da njo na “hyel i” ana “tlakə i,” a ki huɗamələm ana a hu'i, 6 dəhə ka ənga namən nəkəmən Hyel zhang. Nacha ngə Ada nda tsa cha dəhə sə kwa shili, ya təwa nyi ngə məno ngya, ana Tlakə zhang nacha ngə Yesu Kəristi, nda tsa cha dəhə sə kwa shili, ya təwa nyi ngə məno ngya.

7 Kəl ja, a da dəhə nji ngə tə zəndə ngə wa, aka alenya nji ba'a sakana, manda tsəltə nda na həsəli nə katəu, nda kwa har ənda manda səm sənda nja tla nə katəu, nda kwa la'a wi hətə nyi tə nda səli nə katəu, jigadəmar ɗufwa nda ɗatə təutətətənyi, ya nda kwa la'a wi ɗatə nda hiɗahiɗa. 8 Kəl ja, sərsum da kwa shili namən dza Hyel wa, səda cho tsakətə mən ma məna səmə wa, ya səda cho tanda mən ma məna ngyar səm wa.

9 Hya gəla ja, tsa dimukur ngə da gwa'atə alenya njir nəu nda na kushir jiri da gwa ku səpəla'a. 10 Aka ma kala ndər kushir jiri tə la'a nghə nakə nda na zəndi, kwa səm sərsum ku mbwa'alə katə ya, a da kwa gwa'atə nda kwa səm sərsum nda nja tla katə nə ma? 11 Təwa ənga, zəndə nghə kwa gwa'atə zama ka kwama ingə na kushir jirikur ingə Kəristi tə tə ka nda nga, kwa sa ku səpəla'a. 12 Ma hya mər ənga, hyo mər səpəla'a nə ka zama ka kwama inda na kushir jirikur, hyo takasiya jirikur kənda, təwa ənga hyo mər səpəla'a nə Kəristi. 13 Aka əngə ja, macha sənda yo səm kwa gwa'atə zamə ɗa kwa tləhi, tsəu yo tsakətə ɗə kum pa'a wa, tsa yada gwa'atə cha mər səpəla'a.