Guhi təkəra Kasalikur
5
Ya uya mafakə ənda kasalikur da ku pama hi, chul nda a da njo mər mada ku pama nji kəla zəndə Hyel wa, ma'a vanyi ndə tə fiya mala ada nyi wi mala nyi. 2 Hyo ma'a jalvi. A da ɗa tsa'atsa'a hya mər huɗətla hya həbiya tlakə nyi ku pama hi ma? 3 Madangə a da ya hingə kə'i hi ku dzə wa, a hingə ya ku jigadəma ɗa. Aku tləmər Tlakən mən Yesu a tlanda nyi təya nəuma nə ndə nga mər sənga, wi hingə ya. 4 Aku bəji nda hya daɓətə dzəa shanguɗə ɗa tsa'a nahi ya gyalkur Tlakən mən Yesu tsəu tsa'a nahi. 5 Hya lətənyi ndə ngə nə Shantan, aka nja nənyi ɓwaɓwatə nə kumər dza cha, ga nja mbəɗandə mambəl nyi tə pəchir Tlakəu.6 A da ɗa tsa'atsa'a hya bu kərnəhi təkəra sə'ingə wa! A da hya zəndə Tləlam kushiu kwa butə upə zukuzukə ma? 7 Aka əngə ja, həbiya ma halhalər tləlam səpəla'a nga, ka ga hya ɗa ka taɗər upə zukuzukə kəla tləlam, ya əngə ngə hi. Aka wurtə nji handa təmachi na Kəristi, nda kətəng ladər dləgəlnda kəmən. 8 Aka ənga, mən mər ladər kəmən a da na gwazhilakə nda na halhalər tləlam səpəla'a ana dzaukur wa, kəl nda ana gwazhilakə kəla tləlam, gwazhilakə nda tsa'anyata ana jiri.
9 Aku kainau nda ya tsəfətə hi nda ya na, gwa hya daɓəkər na njir mər kasalikur wa. 10 A da təkəra nji'inda pa'a kwa zəndə Hyel nə yo ɓwanya wa, njir mər kasalikur, ndara njir huɓərsəu, ndara njir həl, ndara njir həsəli nə katə wa. Macha ɗa əngə kəl nda hya biya tahi ku dunəya na. 11 Kəl ja, yo tsəfə nə hi bəra ngwa hya daɓəkər ka nji'inda kwa nga kərnənda njir nəu ya nda kwa mər kasalikur, huɓərsəu, ndara njir həsəli nə katəu, njir ngəl nji, njir wi na mbadla, njir həl. Ngwa hya səm mada sərsum ka chul nji wi ingə ma'a wa. 12 Mya həu ɗa na tla nəuma nə nji'inda pa'a nəkəməna? A nji'inda ku huɗa njir nəu ngə hyo kina tla nəuma nənda ma? 13 Hyel ngə kwa tla nəuma nə nji'inda pa'a nəkəmən. Wi nda likatəkatə tə na, “Gədlənda ma ndə ɗimi ngə ku pama hi.”