Ba'ada aku Hədza
7
Sakanə ja ka zamə ɗa, manda nahi njir zəndə gadlagadla hi, hyo ngabiya sənə yo pə na. Gadlagadla kwa mər gyalkur təkəra nji kəl ku bəji nda nda na pi. 2 Ba'ada, gadlagadla mbiya tə mala ɗəuɗəuwa nə sal nyi ma sal nda na pi. Kəl ja, macha tah, pəlpələnyi cha tsa gadlagadla nda mbiya nyi nə sal nyi nda. 3 Aka ənga, macha hə vanya sal ya tsəutanyi sal nyi nda na pi, kasalikur nda cho məra. Kəl ja, ma sal nyi tə tah, a ɗatə cha tə butər kərnyi nə gadlagadla, ya mada cha ɓəla hə vanyi ndəu, a da cha ndər mər kasalikur wa. 4 Aka əngə ja ka zamə ɗa, ba'ada nga, təkəra hi. A wurtə hi tah nə gadlagadla təwa dza Kəristi, təwa ənga hya ɗa ka nənyi, nacha nda nja hya'andə ku hwa, ga hya mər sakəda nə Hyel ku ngya kəhi. 5 Aka sakanda mən na ngya ku ndəkurndəu, mbukər səpəla'a inda gadlagadla tə shili nə kwa tsəkumən, ya dəhə sə nda mən kwa məra kwa gwa'atə məno tah. 6 Kəl ja, sakana, ɗa təmən tə butər kərnəmən tsa gadlagadla, aka tə tə mən nə gadlagadla nda tə fəu mən ku jarum. Aka ənga, a tsə'u məno mər mavakur nə ɗəɗəmər laku tsəfətsəfər gadlagadla wa, kəl nda aku taɗər laku nə Shanguɗə Hyel.Gadlagadla ana Səpəla'a
7 Mi məno na? Gadlagadla təkərnyi ya, səpəla'a cha ya? A da pa'a wa! Kəl ja, gadlagadla ngə tə chabiya ɗa ya zəndə ndara mi ngə səpəla'a. A da yo nda zəndə ndara mi ngə njo na nə huɓər sər ndə wa, macha a gadlagadla da na, “Ngwa ka da huɓur sər vanya ndə wa.” 8 Kəl ja, səpəla'a tə mər tlər na tsaubar, ga tsukutə dəhə chulkə huɓur sər ndə nda ku ya. Macha gadlagadla da wa, səpəla'a sə tətə cha. 9 Ɗakaɗa ana pi ya, ya gadlagadla da nda kwa nar ɗa məra ndara ngwa ka da mər sənənnə wa, kəl ja, nda ya zəndə tsaubar, səpəla'a tə ɗa na pi, 10 əngə ya tah. Ngə ya zəndəbiya ənda tsaubar nda kwa kina shili na pi, tə shili na tah. 11 Səpəla'a tə uya laku təwa tsaubar, cha shandə ɗa kər ga tsəya ɗa. 12 Kəl ja, ba'aka ənga, gadlagadla ana tsaubar nyi hya'atə tsa Hyel cha, tsa'atsa'a ya mənakəu. 13 Yau, kwa nau nja na ənda, sənda mənakəu tə gwa'atə ya tə ya? A'a, a da pa'a wa! Səpəla'a ngə tə gwa'ati. Təwa mər tlər na sənda mənakəu, səpəla'a tə shili na tə na'a, aka ga nja zəndə pa'akura səpəla'a. Aka təwa tsaubar səpəla'a tə biyatə babal ana dəhə pəla'akur nyi.
Pa nda aku Mən aka Səpəla'a
14 A zəndətə mən gadlagadla sənda nə shanguɗə nga, kəl ja, naya ana ndəkurndə ya, ya mava səpəla'a. 15 A da yo zəndə sənda ya kwa mər wa. Aka sənda ya kwa i ya məra a da nacha ngə ya kwa mər wa, kəl ja, sənda ngyar ya nacha ngə yo məra. 16 Ya macha sənda yo məra nacha ngə sənda pa'a yo i ya məra, a dləukərtə ya ndani ənda gadlagadla sə mənakə cha. 17 Aka vəlvəl a da naya ngə na kərɗa kwa mər sə ngə wa, kəl nda səpəla'a nda na ngya ku ya nga. 18 Ya zəndətə ya ndəkurndə ɗa da kwa ngya ɗa ya mər sə mənakə wa. Aka mada yo i ya mər sə mənakəu, a da yo nau mər wa. 19 A da yo mər sə mənakə nda yo i ya mər wa, kəl nda pəla'akur nda a da yo i ya mər wa. 20 Macha yo mər sənda a da yo i ya mər wa, a char tə ənda a da naya ngə kwa mər ngəna səwa, kəl nda səpəla'a nda na ngya ku ya nga.
21 Aka ənga a ngabiya təya sənə kwa maka ɗa na. Ma yo i ya mər sənda mənakəu, kəl pəla'akur ngə wurnya sənda tsa ya. 22 Ɗufwa ya kwa mər hirgyaɗi na gadlagadla Hyel. 23 Kəl ja, ya kwa la'a vanya gadlagadla pam kwa pa na jigadəma ɗa, ngəna gyalkur tə fəu ɗa ku jarum səpəla'a nda na ngya ku ya. 24 Kirpəu naya! Sər təhuɗəu! Wa no dləuya ɗa tsa dzə nə kwa yi na ya ku tə na? 25 Usaku nə Hyel, aka cha dləuya ɗa təwa Tlakən mən Yesu Kəristi.
Aka ənga, naya təkərɗa aku jigadəma ɗa vəlvəl yo i ya hətə nyi səli nə gadlagadla Hyel, kəl ja, aka ndəkurndə ɗa nə səpəla'a ya ɗa ka mava səpəla'a.