5 Kəl ja, aka ɓaɓalkur kər kəhi ana hya ngyar sha tsa mər səpəla'a ku ɗufwa hi, kwa gwa'atə hyo tsəmkər huɗətlar Hyel nə kərnəhi, pəshir huɗətlar Hyel, pəshinda nəumar Hyel nda tsa'atsa'a kwa chabiyadza. 6 Hyel kwa nənyi wazəba nə madawa məlməl na sənda cha məra. 7 Hyel kwa nənda wazəbar pi nda ba'anawa nə nji'inda tə mbabiyadzə na mər sənda mənakəu, kwa gwa'a dəgalkur ana səli ana pi nda pa'a kwa wura. 8 Kəl ja, Hyel kwa pəkər huɗətla nyi nə njir ikər, nji'inda tə ngyar mər sənda jiri, kəl mər səɗimi. 9 Hyel kwa shili na ɓwaɓwatə ana təmachi təkəra dəhə nji'inda kwa mər səpəla'a, tangərma njir Yahuda, ana tsəu alenya nji'inda pa'a njir Yahuda. 10 Kəl ja, Hyel kwa nənyi dəgalkur ana səli ana piyarɗufəu anə nji'inda kwa mər sə mənakəu, tangərma anə njir Yahuda, ana tsəu alenya nji'inda pa'a njir Yahuda. 11 Aka Hyel da kwa tazhira wa.

12 Dəhə nji nda tə mər səpəla'a ku tar zəndə gadlagadla Musa, dəhə ka ənga njo mərtə nda nəuma aka səpəla'a kənda, əngə tanyi tsəu, dəhə nji nda tə mər səpəla'a ku zəndə gadlagadla, njo mərtə nda nəuma na gadlagadla. 13 Aka a da ngatə gadlagadla tanyi ngə kwa mərtə ndə tsa'atsa'a mar Hyel wa, kəl nda ɓəlatə gadlagadla ngə kwa gwa'atə ndə kwa ɗa tsa'atsa'a mar Hyel. 14 Mada nji'inda pa'a njir Yahuda, nda pa'ada na gadlagadla Musa ma'a, kwa mər sənda gadlagadla tə na wi sənda ɗufwa nda tə char nda, nacha ngə tə chari ənda gadlagadla da ku ɗufwa nda. 15 Tlər kənda chartə ənda gadlagadla Hyel tsəfətsəfə nyi aku ɗufwa nda, aka mada jigadəma kənda kwa char nda ənda sənda nda kwa məra ɗimi ndara mənakəu. 16 Bəji kwa shili nda Hyel kwa mərtə nda nəuma təwa Yesu Kəristi təkəra sənda nda mər tə ɗəwa, nacha nə Mafakə Mənakə nə yo bəzə na.

17 Ko nga kərnghə ndər Yahuda, ko ngya kəl ka gadlagadla Musa, ko ghəna ma'a nya na ngyakəngya kəhi na Hyel. 18 Ko na ənda kwa zəndə kə sənda Hyel kwa i ka məra, ya kwa zəndə kə sənda tsa'atsa'a aka a zəndətə kə sənda gadlagadla Musa kwa dlədləɓa. 19 A zəndətə kə təkəɗəu ənda ndər cha laku ka anə ndər wuləfəu, vimbəlmbəl nə nji'inda ku kutla, 20 ndər dlədləɓə nə nji kəkəng, ana maləm nə nji kəla zəndi. Kwa zəndə kə təkəɗə ənda aku gadlagadla Musa ngə kə na dəhə zəndi ana dəhə jiri. 21 Nakə ndər dlədləɓə nə alenya nji ya, mya gwa'atə a da ko dlədləɓar nyi nə kərnghə wa? Nakə ndər bəzə ənda “Ngwa ka da həl wa,” a da ko həl ja wa? 22 Nakə ndər na, “Ngwa ka da mər kasalikur wa,” a da ko mər ja wa? Nakə ndər həyatə katəu, a da ko həl ku vi katə ja wa? 23 Nakə ndər bu kərnghə na gadlagadla Hyel, a da ko həyatə Hyel təwa ɓəlnda gadlagadla nyi ja wa? 24 Wi nda likatəkatə Hyel tə na, “Nahi njir Yahuda tə gwa'atə nji'inda pa'a da njir Yahuda kwa pə ɓwanya həyatəvi nə tləmər Hyel.”

25 Ma hya mər sənda gadlagadla kwa na, tla bədzang kəhi ɗatə na sakəda, kəl ja, ma hya ngyar mər sənda gadlagadla tə na, tla bədzang kəhi ɗatə ɓwa'atanyi, bəliya a nja nda tla wa. 26 Kəl ja ya, ma nji'inda pa'a njir Yahuda tə mər sənda gadlagadla tə na, a Hyel do hətə nyi məlməl na ndə tlatla bədzang ma? 27 Aka ənga nahi njir Yahuda, nji'inda pa'a njir Yahuda kwa tlanda hi nəuma aka hya ɓəlnda gadlagadla, madangə tsəfətsəfə nyi tsahi ya kwa tla hi bədzang. 28 Dəhə ka ənga, wa ngə ndər Yahuda nə jirijiri təwa tla bədzangha? A ndə da ndər Yahuda təwa tla bədzang nə kumər dzə wa. 29 Ndə nda ndər Yahuda nə jirijiri nacha ngə ndə nda tə tlanda nyi bədzang nə ɗufwa cha, təwa Shanguɗə Karti, a da tsəfətsəfər gadlagadla wa, chul nji wi nga kwa uya fal tsa Hyel, a da tsa nji wa.