7 Ngə ea hya'atə vu Taya, ngə ea shili vu Talamayas, tangnda ea usar njir nəu ga hanyi zhang kə'i nda. 8 Vanya zəkə ea hya'atə ga shili Kaisariya, ea ngya ku ki Filibus vanya ndər bəzə mafakəu. Zhang cha ku huɗa nji məɗəfə inda nja ɗaka ɗəmtsə ka təkə sərsum nə mahi'ifi vu Urshalima nda.^a 9 Ana ku'i nyi da fwaɗəu kəla ɗəwa, inda kwa pə ɓwanya takər Hyel nə nji.

10 A hinda ea nə hanyi ɗang tanyi, kəl janə vanya ndər mətakər Hyel hya'atə vu Yahudiya ana tləm nyi Agabus. 11 Cha shili da ea, ga hətə gyarakən Bulus ga mbiya cha kərnyi ana hya cha, ndə cha, “Shanguɗə Karti tə na, ‘Tang wi nənna njir Yahuda nda vu Urshalima kwa mbiya tlakər gyarakən na, nda kwa nənyi nyi nə nji'inda pa'a njir Yahuda.’ ”

12 Nda ea ngatə ənga, na ea ka nji'inda tangnda tə gədi Bulus 'ual'ualəu, ənda ngwa cha da gwa Urshalima wa. 13 Ngə Bulus tə wum ga na, “Mi hyo tiwi, hyo tsəya ɗufwa ya? A ɓatliya təya, a da ka mba tanyi ma'a wa, ma'a ka ya tah vu Urshalima anyar tləmər Tlakə Yesu.” 14 Manda a da ea nau chirnya nyi kəpal wa, ngə ea ngya nyi sənyi ga na, “Cha ɗa wi sənda Tlakə kwa i ɗəmja.” 15 Ahir nga, ngə ea ɓatliya kərnəea ga təra gwa Urshalima. 16 Alenya njir nəu hya'atə vu Kaisariya tə ləbiya ea, ga gwa na ea ku ki vanya ndəu ana tləm nyi Manason ndər Kubrus, zhang cha ku huɗa tangərmar njir nəuwa.

17 Nda ea shili vu Urshalima, njir nəu tə dləutsə ea na chi mətləmətləu. 18 Vanya zəkəu Bulus ana naea tə yada Yakubu, ya dəhə wawa'ar njir nəu tangnda. 19 Bulus tə usa nda ga dəkar nda dəhə sənda Hyel tə mər ku pama nji'inda pa'a njir Yahuda təwa tlər nyi.

20 Nda nda ngatə, ngə nda fal Hyel, ga nar nyi nə Bulus, “Kwa la'a kə ja zama wa, ənda njir Yahuda dəbu dəbu tə nənyi jiri, ya dəhə nda tsəu tə həkəri nəubiya gadlagadla. 21 A dəkar nda tə nji mafakə təkəra ka, ənda ko dlədləɓə nə dəhə njir Yahuda inda na ngya ku pama nji'inda pa'a njir Yahuda, nda ngyar nəu tsaubar Musa, ko na ənda ngwa nda da tla bədzang nə nguli kənda, ndara nda nəu alenya sər jival kəmən wa. A da ea nənyi jiri ənda sə ɗatə əngə wa. 22 Mi sənda məno məra? Aka sə do katə tsa nda kwa ngatə ənda a shilitə kə wa. 23 Aka ənga ja, mər sənda eo nar ngha. Janə nji fwaɗəu da tsa ea, nda tə hətə salkur. 24 Ma'i kə'i nda, hya ki zəbabiya tlal chinda ndəu, ka kinda kwaba sənda njo gwa'a ka hatəmachi nda, ahir nga nda kwa nau sənda shishir kəra nda. A təwa ənga madawa kwa zəndə ənda dəhə sənda nja dəkə təkəra kə nda, jiri da kwa wa, njo la'a tsəu ənda kwa ɓəlatə kə gadlagadla Musa. 25 Nji nda pa'a njir Yahuda inda tə nənyi jiri nə Yesu nəkənda, a tsəfətə nda tə ea sənda məna ɓatliya, ənda ngwa nda səm sərsum nda nja tla katə nə wa, gwa nda ɗə kum nda na mashi ndara sərshishi nda nja ndaləkər wulya wa, ana nda ɓəlati kərnənda tsa shi'ushi'ukur.”

26 Vanya zəkə Bulus tə hətə nji'inda ngə nda ki chinda kərnənda. Kəl ngə cha təra gwa ku Mbwa'alə Hyel ka cha dəkar pəshi nda tlal chinda kərnənda nda kwa wura, pəshinda njo handa təmachi ka kala ndə ku pama nda.

27 Manda kaɗə hanyi məɗəfa inda wura, ngə alenya njir Yahuda tə hya'atə tə hə'i Asiya tə la'a Bulus ku Mbwa'alə Hyel. Kəl ngə nda tsəkutə dəhə dlama nji, ngə nda səya nyi, 28 nda kwa pə kurakə nda kwa na, “Njir Isra'ila, vala ea ma! Janə ndə nda kwa ma'i mada abari, cho ngəl nji kəmən, ana gadlagadla kəmən ana Mbwa'alə kəmən na. Matsa ngə ma'a, cha shili na alenya nji'inda pa'a njir Yahuda ku mbwa'ala ga dyaɓəndə mbwa Karti na.” 29 (Sənda gwa'atə nda na ənga aka nda la'a ka Bulus na Tarofimus ndər Afisa ku mələm nda, ngə nda har ənda Bulus yi tə na cha ku Mbwa'alə Hyel.)

30 Ngə ɓwanya nda tə wendə dəhə njir mələm nda, ngə nda hwi ga gwa səya Bulus ga təɗəbiya nyi zəbiya ku Mbwa'ala, ngə nja kusa haɗənda nyaki. 31 Sakanda nda kwa gwa'a nda tsəya nyi, ngə mafakə tə həya dəgal ləvaləva njir Roma ənda dəhə njir Urshalima kwa tlə mwali. 32 Təma cha tatsə wawa'ar ləvaləva ka alenya ləvaləva nda hwi səya ku huɗa dlama nji'inda. Nda nji tə la'a dəgal ləvaləva kə'i ləvaləva nyi, kəl ngə nda ngyar dəgə Bulus.

33 Kəl ngə dəgal ləvaləva nda tə yi ga səya nyi, ga na nja mbiya nyi na dzəra lyang mətləu. Kəl ngə cha jau tsa dlama nji, “Wa nə ndə na? Ya mi mər cha?” 34 Alenya nji ku dlama nji nda tə pə kurakə, ngo pə nənyi, ngo pə nənyi. Manda dəgal ləvaləva nda da uya jiri wa, aka kurakə nda nda kwa pəa, kəl cha na nja təra na Bulus go ngakə ləvaləva. 35 Nda Bulus tə shili tə mbwar fə hi ka gyo nya ngakə ləvaləva inda, kəl ngə ləvaləva inda kusa hənda nyi tsa dlama nji, aka nji kwa pə kurakə gagaɗa, nda kwa gwa'a tsəya nyi. 36 Dlama nji'inda kwa nəu nda inda tə tsakətə pə kurakə nda kwa na, “Tsəya nyi nji.”

37 Manda kaɗə nda gwa na Bulus ku ngakə ləvaləva nda, ngə Bulus tə jau dəgalər ləvaləva nda, ga na, “Kwa nau ya nar nghə vanya sə ya?” Ngə dəgalər ləvaləva nda ɓəlakə nyi, “Zah, kwa ngatə kə nya njir Heleni ndani ya? 38 A da nakə nda ndər Masar nda tə ɗaka tliya mwali ga təra na njir tlə mwali dəbu fwaɗə gwatə dadil takə ku bəji nga tərabiya ngə ma?”

39 Ngə Bulus tə wum ga na, “A'a naya ndər Yahuda ya, hya'atə vu Tarsus tə hə'i Kilikiya, zər mələm dəgal nə ya. Maki ngya ɗa ya ɓwanya nə nji.” 40 Manda cha uya laku tsa dəgalər ləvaləva nda, Bulus tə hya'atə tə ta'i kyatə mbwar fə hi nda ga har cha cha nə dlama nji'inda, nda dlama nji'inda bəgəu ɗiyu, ngə cha ɓwanya nənda ku nya kənda, nya njir Aramaya.