7 Pəshir tangərmar hanyi ku suku, ea tsəmtədza, ka səm sərsum daɓəkər^a. Bulus tə ghəya dəkə ɓwanya Hyel nə nji. Manda vanya zəkəu cho təra ngə cha təɗə ɓwanya tsa'a ya tə adala vu'i. 8 Ea kwa tsəmdzə ku vanya vi nda nja hərtə təkəra vanyi, ana təkəsə ɗang kwa. 9 Vanya zər tlakala da tləm nyi Yutikus tə ngyata nyi ku kagapəu. Sakanda Bulus kwa ɓwanya nda, Yutikus tə ghəya ndzamhanyi, hanyi nda tsəu kwa ləɓa təmatəma, tə nda ɗa cha təɗa səya hu'i hya'atə kyo makərkunya vi nda kya təkəra vanyi nda. Manda səya hətə nyi tətə cha. 10 Kəl ja, nda Bulus tə səya, cha səya piya ɓya'a təkəra cha ga gapətə nyi, ndə cha, “Ngwa hya da ɗəngha wa, ana pi cha sakana!” 11 Ngə Bulus tə ɓəl tanyi gyo vi nda kya təkəra vanyi nda, ga gi pasətsə gwazhilakə ngə ea kwasə kə'i cha. Ahir cha hanyi tə vir ɓwanya tusə pəchi, ngə cha təra. 12 Ngə nda təra na tlakala nda gu ki na pi, hirgyaɗi nda nda kwa mər a da kətəhə wa.

13 Ngə ea biyama na ma'i ku param yi Asus, ga ea yi hətə Bulus hinda. Cha ɓatliya ənga aka ana hi cho ma'i nənyi. 14 Nda cha həya ea vu Asus, ngə ea hətə nyi ku param ga təra biyo mələm Mitilin. 15 Vanya zəkəu, ngə ea hya'atə ku param tangnda ga shili dza Kiyos. Ahir hanyi zhang ngə ea dləgəlbiya shili Samos, vanya zəkə tsəu ngə ea shili Militus. 16 Bulus tə ɓatliya ka cho təranda Afisa ku param, tsa cha da ɗinya bəji tə hə'i Asiya, aka cho kusa cha dzəva Urshalima, təvi pəchir Pentikos ma cha kwa ɗa cha.

17 Bulus tə sətə nyi mafakə nə wawa'ar njir nəu nda vu Afisa nda shili həya nyi vu Militus. 18 Nda shili nda, ngə cha nar nda, “A zəndətə hi ənda ya ngya kə'i hi dəhə bəji, fwatə tə bəji nda ya dzəva tə hə'i Asiya. 19 Ana həyakər ana sələm ya mər tlər nə Tlakəu, madangə sa təya ɓwaɓwatər dzə aka sənda njir Yahuda tə haɓə ka ya. 20 A zəndətə hi ənda a da ya dzədzə tsa bəzə dəhə sənda kwa kina vala hi wa, kəl ja, ya dlədləɓə nə hi tə babal ana ka ki ka ki. 21 Anə njir Yahuda ka nji'inda pa'a njir Yahuda ya dəkə ɓwanya Hyel a pam da kwa wa, ənda nda tubi nda shili da Hyel, ana nda ɗa na jirikur ku Tlakən mən Yesu. 22 Nəchana hya zəndi, Shanguɗə Hyel kwa maɗə ɗa, ka ya təra gwa Urshalima, naya zəndə sənda kwa gwa ɗa na ya kunda wa. 23 Sənda zəndə ya, na cha ngə kala mələm nda ya gwa kwa, Shanguɗə Karti kwa nar ɗa ənda jarum ana ɓwaɓwatəu da kwa səkə ɗa. 24 Kəl ja, a da ya fiya pya ya ka vanya sə wa, kəl ga cha ɗa yo nau wurandə məməla hwi ana tlər nda Tlakə Yesu tə na'a. Nacha ngə ya bəzə Mafakə Mənakə nə papa'akur Hyel.

25 “Sakan ja, a zəndətə ya, a tsə'u ndə da kwa tsakətə la'a ɗa ku ba nahi ingə ya zhuli ku pama hi ga bəzə mafakə təlkur Hyel ngə wa. 26 Aka ənga ja, ya kwa nar hi ənya, ənda a bikər kala ndə da təkəra ya wa. 27 Aka a da ya dzədzə tsa dəkəbiya hi dəhə sənda Hyel kwa i wa. 28 Hya ɓəla kərnəhi ana njir nəu nda Shanguɗə Karti tə fəkəhi təkər ga hya ɗa ka njir ɓəla njir nəu Hyel, nda cha ɗəlbiya na mashi Zər nyi. 29 A zəndətə ya ahir ya təra, ularvwa hərtə i kwa shili ku huɗa hi, ya a da nda kwa ngatə təhuɗə biri kətəng wa. 30 Ma'a ku huɗa hi alenya nji kwa hya'atə nda kwa pə ɓwanya shakər, ka ga nda sanda njir nəu tsa nəu jiri, nda ɗa ka shawa kənda. 31 Aka ənga ngya ma na ɓəla! Hya ɗənghatə ənda makər ya fa kə'i hi, ya vu'i na pəchi a da ya ta'ində təɗəhimi nə kala ndə ku pama hi wa, ana ma'a sələm.

32 “Sakan ja, yo tsau hi ku cha Hyel, ana mafakə ɗanghali nyi, nda kwa hərtə hi kwa nə hi fa'aki ku huɗa dəhə nji nda nə Hyel. 33 A da ya ndahuɗə bəjingha, azurfa ndara dzaki madawa wa. 34 Na hi təkərnəhi zəndətə ənda ana cha ya ya mər tləra, ka ga ya uya kala sənda yo i ka nji'inda ya kə'iri. 35 Aku dəhə sənda ya məra, ya char hi ənda təwa mər tlər tsa'anyata tuku mən vala nji təutətəuta, mən ɗənghatə ɓwanya Tlakə Yesu na kərnyi nda tə na, ‘Papa'akur 'ual ku nənyi sə nə ndəu, ndiya matsa dləu sə tsa ndəu.’ ” 36 Manda Bulus tə wurandə ɓwanya nyi, ngə Bulus a uzhi kə'i nda ga pətlənya. 37 Dəhə nda kwa tiwi gagaɗa nda kwa gaɓə nyi. 38 Sənda tliya huɗa nda gagaɗa, nacha ngə, ɓwanya nyi nda cha pə ənda tsəu nda kwa la'a nyi səkə wa. Kəl ngə nda ləbiya nyi yo param ngə cha təra.