6 Anə vanya ndə da Hyel tə səa, tləm nyi Yohana, 7 cha shili ka ga cha dəkar ɓwanya təkəra vicham nga aka ga nja nənyi jiri. 8 Kəl ja, na cha Yohana a da nacha ngə vicham ngə wa, na cha nənyi ga cha dəkar ɓwanya təkəra vicham nda nga.^a 9 Jan vanya vicham nə jirijiri nda kwa shili tə dunəya nda kwa mbəl təkəra madawa.

10 Ɓwanya nga ku dunəya cha, madangə Hyel tə mər dunəya təwa nyi, dəhə ka ənga a dunəya da zəndə nyi wa. 11 Cha shili ku pama nənyi na nji, kəl ja, a da nda dləutsə nyi wa, 12 Aka dəhə nji'inda tə dləutsə nyi, ga nənyi jiri nə tləm nyi, cha nənda gyalkur nda ɗa ka nguli Hyel. 13 Nda ɗaka nguli Hyel, a da təwa mashi wa, a da təwa kumər dzə wa, ya a da təwa ikur ndə wa, kəl ja, Hyel təkərnyi ngə adan nda.

14 Ɓwanya nda tə ɗa ka ndəu, cha ngya ku pama mən ya a la'atə mən səli nyi, səli nda kəl nacha Zər Ada nyi ngə ni. Ɓwanya nda nyinyi cha ana ɗanghali ana jiri. 15 Yohana tə dəka ana kurakə dzəgam dzəgaməu, “Jangə ndə nda ya ɓwanya nə hi təkəri bəji nda yo na ənda, ‘Ndə nda kwa shili hiɗa, a da cha təvi nja yah ɗa.’ ”

16 Aka bwaɓəkura mənakəkur nyi, cha nə mən ɗanghali vanyi təkəra vanyi a ɓəlnyi da wa. 17 Aka gadlagadla Hyel, təwa Musa shili cha, kəl ja, ɗanghali ana jiri təwa Yesu Kəristi shili nda. 18 Aka a ndə da ta la'a Hyel wa, kəl Zər nyi nda zhang tanyi, nda sə zhang na Hyel, ya Hyel cha təkərnyi, ya aku ɗufwa Ada nyi cha, ya nacha ngə tə chabiya mən nyi.

19 Njirawawa'a Yahuda inda ku Urshalima tə sə alenya fərist ana ka Levi aka nda yi jawar Yohana nda nacha wa nga. 20 Cha par nda jiri tə babal ənda, “A da naya ngə Kəristi wa.” 21 Nda tsakətə jau nyi, nakə wa nə ja? Nakə ngə Iliya ya? Ngə cha na, “A naya ngə wa.” Nakə ngə ndər mətakər nda ya? Ngə cha wum ga na, “A'a.”

22 Nda nar nyi nakə wa nə ja, aka ga ea zəndə sənda eo yi dəkarnyi nə nji'inda sə ea? Mi ko nga kərnghə na? 23 Ngə Yohana tə wuma, “Naya ngə ndə nda Ishaya ndər mətakər tə ɓwanya təkəri, kwa na ənda kurakə dzəgam dzəgaməu kwa nga kwa takəu, ‘Ɓatliya ma laku tandar nə Tlakə cha nəuwa.’ ”

24 Nji inga, njir Farisi nga sə nda. 25 Nda jau Yohana, “Macha a da nakə ngə Kəristi wa, a da nakə ngə Iliya wa, ya a da nakə ngə ndər mətakər wa ya, ka mi ko mər baɓtisma?”

26 Kəl Yohana wum ga nar nda, “Naya na'a yo mər baɓtisma na ɓiti, kəl ja, jangə vanya ndə da ta'i ku pama hi, ya a da hyo zəndə nyi wa. 27 Nacha nda ya na, vanya ndə kwa shili hiɗa, ndə nda a da ya nji ka ya pəliya sər mba ɓiɓi nyi wa.” 28 Sə'ingə dəhə tə ɗa vu Baitanya, a biyamar Dəl Urdun, a tə mbwa nda Yohana kwa mər baɓtisma ti.

29 Vanya zəkəu Yohana tə la'a Yesu kwa shili da cha, cha na, “Ndzam ma, jan Zər Gam Hyel nda kwa hənda səpəla'a njir dunəya! 30 Nacha ngə ndə nda ya ɓwanya təkər ənda, ‘Vanya ndə kwa shili hiɗa, Kəl nda a ndiya ɗa tə cha, aka a da cha təvi nja yah ɗa.’ 31 Naya təkərɗa, a da ya zəndə ndə nda cho ɗa kar wa, kəl ja, ya shili yo mər baɓtisma ana ɓiti aka ga njir Isra'ila ngabiya nyi.” 32 Yohana tə dəkari, “Ya la'a Shanguɗə Hyel kwa səya kya huɗamələm wi ngə tə mbətla, ga ndzəm təkəra cha. 33 Naya ma'a a da ya zəndə nyi wa, kəl ja, ndə nda tə sə ɗa ka ya mər baɓtisma ana ɓiti nga nar ɗa, ‘Ndə nda ka la'a Shanguɗə Hyel tə səya təkəra cha ga ndzəma, nacha ngə ndə nda kwa mər baɓtisma ana Shanguɗə Karti.’ 34 Naya a la'a təya, ana yo nar hi nacha ngə Zər Hyel.”

35 Vanya zəkəu Yohana tə ta'i tangnda səkəu ana mətlə ku huɗa shawa nyi. 36 Nda cha la'a Yesu kwa ma'i, cha na, “Ndzam ma, jan Zər Gam nə Hyel nda!” 37 Nda shawa nyi inda tə ngatə ənga, kəl nda nəu Yesu. 38 Nda Yesu tə sha ga la'a nda, nda kwa nəu nyi, ngə cha nar nda, “Mi nə hyo gwa'a?” Nda nar nyi, “Maləm aman mbwar ngya ngha?” 39 Ngə cha nar nda, “A nda ma hya la'a.” Kəl ngə nda yi ga la'a mbwa nda cha tə wi saka fwaɗə nə akəu, ngə nda ɓupəchi ka cha. 40 Aku huɗa nji mətlə inda ngatə ɓwanyar Yohana ga nəu Yesu nda, Andrawus zamənya Shiman Bitrus. 41 Sə nda cha mər tangərmar ngə cha yada zamə nyi Shiman ga nar nyi “Jan ea uyatə Kəristi nda.” 42 Ngə Andrawus tə yi nacha da Yesu.

Nda Yesu tə ndzamtə nyi ngə cha nar nyi, “Nakə ngə Shiman zər Yohana, a biyama tləm nghə kwa ɗa Kefas,” nacha ngə Bitrus, “Fafa.”

43 Vanya zəkəu Yesu tə ɓatliya ka cho yi Galili, ngə cha ɓə na Filibus, ga nar nyi, “Nəu ɗa.” 44 Filibus tsəu ndər Betsaida cha, mələm ka Andrawus ana Bitrus. 45 Ngə Filibus tə uya Natana'ilu, ga nar nyi, “A uyatə ea ndə nda Musa tə tsəfə təkər ku gadlagadla nda, ətsəu njir mətakər tə tsəfə təkəra cha, nacha ngə Yesu ndər Nazarat, zər Yusufu.”

46 Ngə Natana'ilu tə nar nyi, “Nazarat! Kwa nau cha ɗa sə mənakəu kwa biya vu Nazarat ya?” Ngə Filibus tə nar nyi, “Anda ka la'a.” 47 Nda Yesu tə la'a Natana'ilu kwa shili da cha, cha na, “Janə ndər Isra'ila ujil, ndə nda a bikə da ku cha wa.”

48 Natana'ilu tə nar nyi, “Aman zəndə ɗa ka?” Ngə Yesu tə wum ga nar nyi, “A la'a nghə təya sakanda kə da kiɗa wur kanda, təvi Filibus nga ngha.”

49 Ngə Natana'ilu tə wuma “Maləm a zəndətə ya ja, nakə Zər Hyel ka, nakə tsəu Təl njir Isra'ila.” 50 Ngə Yesu tə nar nyi, “Aka ya na a la'a nghə təya a da kiɗa wur kanda nacha ngə ko dzugwa na'a jiri ya? A biyama ko la'a sə'inda ndiya nga.” 51 Yesu tə nar nyi, “Tsa'anyata yo nar ngha, ko da la'a huɗamələm banghəu, ana Chama Hyel kwa gi kwa səya a təkəra Zər Ndəu.”