Ángel xafolpox xakoeyasfʉt, cha-aelfʉt, lelspox
10
Do jawʉt,
xan taenx asan ángel,
pamaman,
fʉloek wʉt athʉlelsik itloejentat.
Pejmatnaetabijlasik alwaera duk.
Pejbe,
me-ama jit tamdadut wʉt,
jabe-aechon.
Xunakthianbejpon.
Me-ama juimt nakthian wʉt,
jaxu-aechon.
2 Xanukon pelfʉt,
cha-aelfʉt,
lelspox.
Japafʉt baꞌtas.
Majt japafʉt xakoeyas.
Poklatʉaklel tʉaknoton marminmatwʉajtat.
Soenatʉaklel tʉaknoton satat.
3 Japon ángel xabich nejlat.
Nejlat wʉt,
me-ama nuth jʉmbʉꞌt wʉt,
jajʉm-aechon.
Japox jʉmtaenx wʉt,
chamx siete veces xabich jʉmseꞌbala.
4 Do jawʉt,
xan lelasian chamx jʉm-aechpox.
Pe jawʉt,
asajame jʉmtaenx athʉlelsik najʉm-aechsik wʉt.
Japajame najʉm-aech ampox:
“¡Asew jiw nabej chapaeꞌ jʉmtaenampoxan,
chamx siete veces jʉmseꞌbalapoxan!
¡Japoxanliajwa nabej lelabej,
jʉmtaenampoxan!”
—aech japajame xanliajwa.
5-6 Japon ángel poklalel mʉaxxachose wʉt,
jʉm-aechon:
“Dios,
pomatkoicha dukpon,
japon thatbaxo is,
puexa nejmach-athʉxotpibej.
Isbejpon that,
puexa nejmach thatxotpibej.
Isbejpon mar,
puexa nejmach marxotpibej.
Ampox jʉmchiyaxaelen,
diachwʉajnakolax,
xan jʉm-an xot Dios pijaxtat.
Dios chajia jʉm-aechpox moxlisox pasliajwa.
7 Pejme asan ángel,
sietepijin,
trompeta nababeyax tʉadut wʉt,
jawʉt Dios tʉadusaxael isliajwa puexa chajiakolaxtat nejchaxoelpoxan.
Jawʉtbej,
tʉadusaxael puexa profetas jʉm-aechpoxan jiwliajwa” —aech ángel,
poklalel mʉaxxachosnik wʉt.
8 Majt jʉmtaenxjame pejme athʉlelsik najʉm-aech:
“¡Ángel,
martat tʉaknotpon,
satatbej,
japon mox soepande kifisliajwam japacha-aelpelfʉt,
baꞌtasfʉt!”
—aechox,
athʉlelsik najʉm-aech wʉt xanliajwa.
9 Do jawʉt,
xan mox soepandax japon ángel.
Xan wʉljowx japapelfʉt nachaxdusliajwapon.
Wʉljowx wʉt,
xan najʉm-aechon:
“¡Maj!
¡Xaembej!
Xaelam wʉt,
kaechxathʉꞌaxaelam.
Me-ama miel wʉt,
kaechxachiyaxaelam.
Do jawʉx,
xaelam wʉt,
nejwoejtat xasaxnikaxael.
Samata,
chawʉlawoejxaenkaxaelam” —aech ángel xanliajwa.
10 Do jawʉt,
xan ángel kifitx japapelfʉt.
Xaelx wʉt,
chiekal kaechxathʉꞌan.
Me-ama miel wʉt,
jakaechxa-an.
Biajlax wʉt,
xasaxnik tajwoejtat.
11 Jawʉt ángel pejme najʉm-aech:
“¡Puexa jiw xam chapaem Dios jʉm-aechpoxan!
Japoxan asamatkoi jachiyaxael xabich asatʉajnʉchanpijiwliajwa,
asajamechan naksiyapiliajwabej,
reyesliajwabej” —na-aech ángel,
jʉm-aech wʉt japoxan xanliajwa.