9
Baxael,
asan ángel,
cincopijin,
nababa trompeta.
Jawʉt xan taenx,
asan ángel fʉlaek wʉt that poxadik.
Me-ama ithaejt jopafʉl wʉt,
ja-aechon.
Japon ángel chaxduch llave,
pinamʉthfafapijax.
Japox mʉtht chinax matduka-el.
2 Japallavetat fafaton pinamʉth.
Do jawʉt,
japamʉthxotsin xabich itnum nakolin.
Me-ama lul pinjiyax lautas wʉt,
xabich itnum wʉt,
ja-aechox.
Japox itnum it-el thatbaxo juimt matkoipijin itkʉaꞌnikaliajwa.
3 Japa-itnumxot xabich pin-iakola suiꞌ nakola.
Potʉajnʉcha japi suiꞌ xajʉp.
Japi suiꞌ tʉa-epi.
Samata,
xajʉpi jiw pajlaliajwa.
Me-ama afʉ,
kabʉan-aech japi suiꞌ.
4 Japi suiꞌ jʉmtis:
“¡Nabej tabejs pola,
naexbej,
naechanbej!
¡Dios pejsellotat jiw makmarka-esalpi,
japikal tabejde!”
—tis,
japi suiꞌ toꞌas wʉt.
5 Japi suiꞌ tapae-esal,
jiw pajal wʉt jiw chatʉpaliajwa.
Pe japi suiꞌ tapaeis,
jiw pajal wʉt cinco juimtje xabich xaenkaliajwa.
Me-ama afʉ piafda wʉt,
jaxae-aech japi suiꞌ.
6 Jiw,
pajlasi,
nejchaxoelaxael:
“¡Xan xabich nawexaenk.
Samata,
tʉpasian kaes pejme paxaechax boejtaeflasamatan!”
—chiyaxaeli,
nejchaxoel wʉt.
Pe Dios tapaeyaxil japi jiw chatʉpaliajwa.
7 Japi suiꞌ kawaei kabʉan-aech.
Patiyaxan xafafaspi.
Me-ama nabeyax poxade fʉlaeliajwa wʉt,
ja-aech japi suiꞌ.
Suiꞌ pejmatnaetanxot,
me-ama orocorona matlʉaꞌa wʉt,
jamatnae-aechi.
Suiꞌ pejxubej,
me-ama jiwxu wʉt,
jaxu-aechi.
8 Japi suiꞌ lakasnikbej.
Me-ama wathoꞌ lakasnikpi,
jala-aech japi suiꞌ.
Suiꞌ pejbʉaꞌanbej,
me-ama nuthbʉaꞌan wʉt,
jabʉaꞌ-aechi.
9 Japi suiꞌ chanlaelabej pabok,
xʉaꞌlas wʉt xakolasamatas.
Pejbaꞌanbej xabich thiaxan-el.
Me-ama kawaei zorra xadadʉk wʉt,
nabeliajwa fol wʉt,
jabaꞌthia-aech japi suiꞌ.
10 Tʉa-ebejpi.
Me-ama afʉ,
jatʉa-e-aechi.
Japi suiꞌ pejtʉa-etat pajal wʉt,
jiw wexaenkaxaes cinco juimtje.
11 Ángel,
pinamʉth tataeflan,
chinax matduka-elmʉth,
japon japi suiꞌ tatoꞌal.
Hebreojametat japon ángel pawʉl Abadón.
Griegojametat pawʉlon Apolión.
12 Matxoelapijax babijax toep.
Pefʉk weꞌp koleyax babijax pasliajwa ampathatat.
13 Pejme asan ángel,
seispijin,
nababa trompeta.
Do jawʉt,
jʉmtaenxbej jamekal,
jʉm-aech wʉt altarxotdin.
Japox altar isas orotat.
Nukox Dios pejwʉajnalel.
Japa-altarmatwʉajtat,
kaenanʉla esquinaxot nuil,
me-ama pakmat-e,
jasi.
Japacuatro mat-exot japajame jʉm-aech wʉt,
jʉmtaenx.
14 Japajame jʉm-aech seispijinliajwa:
“¡Cuatro ángeles,
kʉspi pinjiyax nawelbabʉꞌxot,
japi jolde!
Japox nawel pawʉl Éufrates” —aechox altarxot.
15 Do jawʉt,
japi ángeles jols,
pejmatkoi wepach xot japi ángeles beliajwa xabich jiw,
la tercera parte ampathatpijiw.
Japi ángeles xabich piach wʉajnawet japox isliajwa.
16 Samata,
jawʉt japi ángeles kitoꞌapi soldaw potʉajnʉchanpijiw jiw beliajwa.
Jʉmtaenx doscientos millones soldaw kitoꞌaspox.
Chijia wʉti,
kawaeitat chafolpi.
17-18 Ja-aech japox,
masoxtat taenx wʉt,
soldaw chaflaech wʉt kawaeitat.
Japi matiafxafafas patiyaxan,
padaelmajiw xʉaꞌbalas wʉt xakolasamatas.
Japi kaenanʉla matiafxafafas pasoeyax,
pathoeyaxbej,
pawaerlax sʉapichbej.
Kaenanʉla japi pejkawaei,
pejmatnaetan,
me-ama nuthmatnaetan wʉt,
jamatnae-aech japi suí.
Kawaeikaechanxot kaechnakakolas jit,
itnuman,
azufre-itnumanbej.
Japoxantat japi xabich jiw,
potʉajnʉchanpijiw,
matkaejwas.
19 Japi kawaei pejtoꞌthimatduilxot,
me-ama jommatnaet wʉt,
jatothi-oef-aech jiw liklaliajwas.
Samata,
jiw liklas wʉt,
xabich jiw tʉp.
Jasoxtat japi kawaei xabich jiw tabejt pejkaechantat,
pejtoꞌthitantatbej.
20 Asew jiw,
tʉpa-elpi japoxtat,
japi kofa-el babijaxan ispoxan.
Kofa-elbejpi dep kawʉajanpoxan,
ídolos kawʉajanpoxanbej.
Japoxan ídolos isas orotat,
platatat,
broncetat,
iaꞌantat,
naechantatbej.
Ídolos asbʉan jʉmch ídolos.
Samata,
japoxan taeyaxil.
Jʉmtaeyaxilbejpox.
Laejaxilbejpox.
21 Jiw,
namapi ampathatat,
kofa-elbejpi asew jiw bapoxan,
pinjoeꞌaxanbej,
asew wathoꞌ bʉꞌmoejtpoxanbej.
Kofa-elbejpi natkowaliajwa.