Pablo toꞌapox Tito naewʉajnaliajwa asew jiw, Pablo majt naewʉajanpoxan Titoliajwa
2
Tito,
xam naewʉajnam wʉt Jesús pejwʉajan naexasiti,
¡xam naewʉajnamwʉajan,
japawʉajan nej kaenejchaxoelax,
chimiawʉajan,
Jesús pejwʉajan sʉapich!
2 Xam naewʉajnaxaelam poejiw,
pakdiachowpi,
chiekal pajut natataeflaliajwa isasamata pachaema-elpoxan asew jiwliajwa,
asew jiw japi sitaeliajwasbej.
¡Japi pakdiachowpi naewʉajandebej majt chiekal nejchaxoelaliajwa isaxaelpoxan,
isasamata babijaxan!
¡Japi pakdiachow naewʉajandebej chiekal naexasisliajwa xan naewʉajnaxpox,
diachwʉajnakolaxpox!
¡Japi pakdiachow naewʉajandebej asew jiw nejxasinkaliajwapi!
¡Japi pakdiachow naewʉajandebej,
nabijat wʉt kofasamatapi Dios naexasitpox!
3 ¡Naewʉajandebej wathoꞌ,
pakdiachowpi,
chiekal duilaliajwa asew jiw japi wathoꞌ sitaeliajwas!
¡Japi wathoꞌ naewʉajandebej bʉxwʉajanmaenkasamata!
¡Saxa feyaxan nejxasinkaxilpibej!
¡Japi wathoꞌ chiekal nej duileꞌ,
asew wathoꞌbej nakxataeliajwas!
4 Samata,
¡japi wathoꞌ,
pakdiachow,
nej naewʉajneꞌ asew wathoꞌ,
kaes pansiachowpi,
japi wathoꞌ nejxasinkaliajwa pamaljiw,
paxibej!
5 ¡Japi wathoꞌ nej naewʉajneꞌ asew wathoꞌ,
kaes pansiachowpi,
chiekal nejchaxoelaliajwa isaxaelpoxanliajwa,
asax isasamata,
pachaema-elpox!
¡Nej naewʉajneꞌbejpi chiekal tataeflaliajwa pejbachanpijiw!
¡Nej naewʉajneꞌbejpi wathoꞌ pansiachow naexasisliajwa pamaljiw,
asew jiw jʉmchisamata babejjamechan Diosliajwa!
6 Tito,
¡xam naewʉajande poejiw,
pansiachow,
chiekal nejchaxoelaliajwa isaxaelpoxan,
japi isasamata babijaxan!
7 ¡Xambej chiekal dukde puexa pansiachow xam nakxataeliajwa!
Naewʉajnam wʉt,
¡chiekal naewʉajande diachwʉajnakolaxtat!
8 Naewʉajnam wʉt,
¡naewʉajande chimiajamechan,
asew jiw xam wʉljʉmchisamata!
Xam asax is-emil wʉt,
nadaelmajiw padalaxael nakjʉmchiliajwa babejjamechan,
xatis naexasichpis Jesús pejwʉajan.
9 ¡Naewʉajandebej esclavos,
japi naexasiti Jesús pejwʉajan,
chiekal naexasisliajwa puexa pejpaklochow tatoꞌlaspoxan,
bʉxfafonasamatabejpi!
10 ¡Naewʉajandebej esclavos,
japi natkowasamata paklochow pejew!
Ja-aech wʉt,
esclavos bʉꞌwʉajanjilaxael pejpaklochowliajwa.
Ja-aech wʉt,
puexa jiw matabijaxael Dios nakbʉꞌweyaxaelpox,
diachwʉajnakolax.
11 Xatis chiekal matabijas.
Dios nakbeltaen xot,
paxʉlan toꞌak ampathatasik puexa jiw bʉꞌweliajwapon,
japi naexasit wʉt Jesús pejwʉajan.
12 Dios nakbeltaen xot,
kofas babijaxan isaspoxan,
wajut isasiaspoxan.
Me-ama ampathatpijiw isfʉl babijaxan,
¡nabej jachitis!
Amwʉtjel,
¡chiekal nejchaxoelaxaes isaxaespoxanliajwa,
babijaxan isasamatas!
¡Isfʉlaxaeslax Dios naktoꞌapoxan!
¡Sitaeyaxaesbej Dios,
laelpas wʉt ampathatat!
13 ¡Jachiyaxaes,
wʉajnawesfʉlas wʉt Jesús pasliajwa,
me-ama Jesús nakjʉm-aech!
Japon pask wʉt,
xabich nejchachaemlaxaes.
Jesucristolap Dios.
Jawʉt japon itpaeyaxael pamamax,
xatis nakbʉꞌwia wʉt.
14 Jesús pajut natapaei asajiw jaelsliajwas,
boesaliajwasbejpon,
xatis nakbʉꞌweliajwa.
Jatis wʉton,
xatis babijaxan isaspoxan nakwejil xatisxot,
japon pejjiwaliajwas xatis isfʉlaliajwas pachaempoxan.
15 ¡Japoxanlap xam naewʉajande Jesús pejwʉajan naexasiti!
Japi nejxaejwas wʉt,
¡xam naewʉajande nejchachaemlaliajwa!
Japi is wʉtbej isaxilpoxan,
babijaxan,
¡xam japi fiaꞌe,
me-ama Dios pejjamechan jʉm-aech!
Japoxanlap Dios xabich nejxasink xam isliajwam.
¡Nabej tapaeꞌ asew jiw xam mastaeliajwa!